Read Talaud YESAYA 47 Bible Online

YESAYA 47 - Talaud bible

YESAYA 47

¹MAWU nabbisara, “Ei, Babel, lintukke wuassu adderan araratuannu, wuṛṛu a'iante su awu. I'o tate mamunga wuṛṛu maṛṛamaga ere dorone.

²Hilinga'e taponna udde ringannu watu; wu'ate tatindungngu, al᷊uisse laungngu sara wantiṛṛannu ia'asilo, wuṛṛu tumbete su manga sal᷊ukka.

³Taumata sarun maasilo si'o tantol᷊e, aal᷊uandahanna wuṛṛu pappansilianna. I Ya'u sarun mabbal᷊issa unen naungnga si'o, tawe saran sangkatou apan Ta'u iaparalukka.”

⁴Ruata na'ukkassa su Israel namallossi ite, aran-Ne MAWU Apan Lembontaṛṛino.

⁵MAWU nabbisara su Babel, “Paal᷊annabba, wuṛṛu suttate sulal᷊ummu ararandumma. I'o tate lai isaggo ‘Ratu manga araratuanna.’

⁶Dorone i Ya'u massa'u uma-U, i mangitou tate lai Ta'u ireengnga pussa'a-U. Wua'udde i mangitou Ta'u nitantilla si yamiu, wuṛṛu i'o tawe umakkanni mangitou, ewe'e lai matatatimmadde niallangngu ringannu maṛṛagissa.

⁷I'o massunna manungku i'o maola'a ratu sarangkal᷊o'enge, wuṛṛu tawe maatutukka ara'e maṛṛingiddu panginsueanne.

⁸Ana waugu udde paddaringikke si Ya'u, ei i'o apan tumba'u apulune maddea'a lal᷊umanna'a! I'o massunna manungku wiakku matammuda, wuṛṛu taweddu ere i'o. I'o maṛṛingidda tawe maola'a inawaluanna, wuṛṛu papapulunnu tawe mate.

⁹Arawe tumba'u sangkaṛṛondapa, sulal᷊ummu allo massallo, hatto darua udde sarun mariaddi maṛṛindo'a. Salaiwe i'o mappaattu wal᷊i'imata wuṛṛu laṛṛopa, awingngu esakka wuṛṛu anangungu insueanna lai.

¹⁰I'o uapendamma matammudda sulal᷊ummu al᷊al᷊eonu, unnu pahinu inolaannu tawe ellehanna. I'o iaal᷊iwun apandenu wuṛṛu asingkannu, su sunnanu taweddu ere i'o.

¹¹Arawe i'o sarun aṛṛiaannu silaka, pani'annu tawe maal᷊inda'u silaka udde. I'o sarun dantannu asasilaka, wuṛṛu tawe maaro'appa. Apapate sarun dumanta ringannu mamaṛṛoro, wuṛṛu tawe iaṛṛangngonu dorone.

¹²Panidutute al᷊awo'u daroanu wuṛṛu wali'imatanu, apan mamma katta si'o ro'en i'o ta'e addio'a. Isai masingkatta udde pia gunane si'o, tadea'u ipamata'utta manga seennu.

¹³I'o masahadda ana waugu tumanite manambo tatantiro. Doloṛṛa'e manga manani'atta iapasal᷊amatta si'o; i mangitou apan buatte nanaṛṛassidda al᷊awo'u pappi'uannu langitta wuṛṛu nassi'ol᷊a manga anumpitanna, wuṛṛu suapan bul᷊anna wakku manni'attu apa apan sarun maola'a pal᷊addu pabbiaṛṛannu.

¹⁴Pa'ellege; i mangitou ere laṛṛami apan niepoddu putungnga; i mangitou tawe mapaanal᷊amatta watanganni mangitou sassane! Ṛenggammu putungnga udde tumaniten masal᷊ihangnga si mangitou, wal᷊inewe putungnga masal᷊ihangnga panningiṛṛanna.

¹⁵Eteudde huna manga taṛṛa si'atta si'o apan ma'anambo manaranu ro'en i'o ta'e addio'a; sangkatou-sangkatou inaite nanantangngu; taweddu nirumanta mantul᷊ungngu.”