Read Talaud YESAYA 51 Bible Online

YESAYA 51 - Talaud bible

YESAYA 51

¹MAWU nabbisara, “Paddaringikke si Ya'u, ei i yamiu apan mappulu iapasal᷊amatta wuṛṛu rantate ringang-Ku paddorongnga aontolla. Naungete wowone watu wuassuapa i yamiu nipaangnga, wuṛṛu ma'al᷊i watu wuassuapa i yamiu nial᷊i.

²Naungete iupungngu al᷊amonanu i Abraham wuṛṛu i Sara apan nanungkangngi yamiu; sutempo i Ya'u namaggo si Abraham, i tou tawe ana'a; wua'udde i Ya'u nangal᷊amatta si tou wuṛṛu Ta'u nionggol᷊annu pallaṛṛite apan manambo.

³Yerusalem, i Ya'u sarun malluassa si'o, wuṛṛu sarangkanambone apan uatana'a su winalal᷊annu. Manga wadda'a apan mamara Ta'u olaanna wailla, naal᷊ihidda Eden, wawail᷊ang-Ku apan masuwukka. Isudde taumata sarun lumuassa wuṛṛu lumala'a wuṛṛu ma'adiangkamanna ringannu manga aantari.

⁴Panutukke tingi-U, ei pabbawala-U, paddaringikke manga wisara-U, ei uma-U. I Ya'u nangongollu al᷊aṛṛa-U su manga walahanna, manga tita-U sarun manualaga si mangitou.

⁵Asasal᷊amatta apan Ta'u ionggolla maranite; tempon auntungang-Ku maranite ma'oma. I Ya'u sassane sarun mamarenta manga walahanna. Manga wanua apan marau mangke uaraṛṛaddo si Ya'u wuṛṛu uaantimma inolaang-Ku apan matohassa.

⁶Pa'ellege langitta wuṛṛu panailete runia; langitta sarun mawul᷊i ere timbulla wuṛṛu runia sarun matabbe ere laṛṛeme, anambon tumanangnge sarun mate ere namu'a. Arawe asasal᷊amatta apan Ta'u nionggolla sidutu sarangkal᷊o'enge, wuṛṛu auntungang-Ku tawe panguddusanne.

⁷Paddaringikke si Ya'u, ei pabbawala-Ku, i yamiu masingkattu apa apan naṛṛino; al᷊aṛṛa-U sasahipunanna sulal᷊ummu naungngu. Arie paata'utta amungkangngu i yamiu eetannu taumata, arie passinggawanga amungkangngu i yamiu al᷊uandahanni mangitou.

⁸I mangitou sarun mate wuṛṛu mawul᷊i, naal᷊ihidda laubba niannu wa'u'a wuṛṛu mal᷊aṛṛenessa wambul᷊un domba niannu wa'u'a. Arawe asasal᷊amatta apan Ta'u nionggolla sidutu sarangkal᷊o'enge, auntungang-Ku uata'a sara maṛṛana'a mappulunna.”

⁹Darisikke oh MAWU, ontol᷊ete i yami, papaasal᷊amata'awe i yami ringannu taṛṛino-Nu. Darisikke ere sutempo dorone sutempo I'o nakkimunsa'a si Rahab wuṛṛu nangusu'a nagan tahal᷊oangnga udde na'oman sara nate.

¹⁰I'o lai apan napaamaran tahal᷊oangnga, ua'en laudda apan mal᷊al᷊umma. I'o na'ola'a lal᷊anna malliu ua'e udde, tadea'u manga taumata apan iapasal᷊amatta wotongnge tumumbe.

¹¹Ne manga taumata apan nipallossu MAWU sarun mapul᷊e i mangitou sumuttate su Yerusalem ringannu paggahahio hati mangitou matilangnga ana waugu al᷊al᷊uassa tutune. I mangitou lulluassa wuṛṛu lullala'a, asasusa wuṛṛu sasal᷊iomanna mangke nawul᷊ite.

¹²MAWU nabbisara, “Ete i Ya'u MAWU apan malluassa si yamiu. Anio i'o matta'uttu taumata apan mattate, su taumata apan niramme ere wal᷊abbuka?

¹³Ṛatadde i'o naabul᷊ite MAWU Mandariadinu apan namilattu langitta wuṛṛu nangaddo mal᷊ita'u runia? Anio su al᷊o'engngu allo i'o matta'utta? su araṛṛagissu taumata lal᷊eo apan nasaddiate makkadda'a? Mangke atonna, araṛṛagissi mangitou udde tawe ma'autinga si'o.

¹⁴Manga atawanna sarun mal᷊ihakke ipallossa; i mangitou sarun tawe asueannu anna, wuṛṛu sarun tawe mate wuṛṛu ilabbinga.

¹⁵Ana waugu ete i Ya'u MAWU Ruatanu, apan napatandi'u tahal᷊oangnga na'oman sara luangnge ruddapa. Apan Lembontaṛṛino uddewe arang-Ku.

¹⁶Ete i Ya'u apan namilattu langitta wuṛṛu nangaddon manga mal᷊ita'u runia. Ya'u nabbisara si Sion: Ete i'o uma-U; i Ya'u mangonggollu al᷊aṛṛa-U si'o wuṛṛu manillumma si'o ringannu taṛṛino-U.”

¹⁷Pabbangunte, ei Yerusalem, pabbangunte! Ṛuumanna apan niema'u MAWU ana waugu asasa'u-Ne buatte niamannu na'oman sara nasue.

¹⁸Wuassu tumanangngu taweddu nangehetta si'o, wuassu mamamanuanu taweddu namiaṛṛangngu.

¹⁹I'o niaṛṛiaannu asasilaka darua hatine; pangillul᷊eannu pangalo wanuanu naromanna wuṛṛu tumanangngu nate niamal᷊unusanna. Taweddu umakkanna wuṛṛu malluassa si'o.

²⁰Suapan pentakku lal᷊anna manga taumatanu nal᷊iundu'a niasueannu ikkatta ere rusa apan nul᷊ussa su pu'itta. I mangitou naṛṛiaannu asasa'u Mawu, wuṛṛu naṛṛinoannu lal᷊imbuakku Ruatanu.

²¹Paddaringikke ei manga taumata apan niallangnga, apan sussassendekka ere taumata wu'anna!

²²Etearendi wisara MAWUnu, MAWU Ruatanu apan nanamba'a si yamiu, “Asasusa apan Ta'u nionggolla sulal᷊ummu asasa'u-U, sarun Ta'u ul᷊eanna apia wuassi'o. Asasa'u-Ku sarun mompo'a, wuṛṛu i yamiu tate lai mamasanna udde.

²³Asasusa udde Ta'u nionggolla su mangangallangu, apan buatte nandolokku niapaatiilla su leta'a, wua'udde nakkinda si yamiu, ere ola'u i yamiu lal᷊anna apan a'amatannu taumata.”