Read Talaud YESAYA 52 Bible Online

YESAYA 52 - Talaud bible

YESAYA 52

¹Pabbangunte, ei Yerusalem, pabbangunte! Tohasse naungngu! Luṛṛea'e laubbu awawantugu! Ei Yerusalem, soa apan susi, taumata marosa tate lai maasutta sumabbi su ngaranu.

²Darisikke wuassu awu, ei Yerusalem, tontonga'e awu apan uareetta si'o. Luatte ṛate apan uaiitta ullekkanu, ei tumana'u Sion apan niatawanna!

³MAWU nabbisara uman-Ne, “I yamiu niwal᷊u'a ringannu tawe bawaekke, nariaddi orassa indi ipallosse ringannu tawe bawaekke lai.

⁴Dorone i yamiu inaite watukku Mesir wuṛṛu natana'e isudde naola'a taumata raho. Wua'udde Asyur nangallangnga si yamiu ringannu tawe pinangiananne.

⁵Orassa indi apate manara-U isindi? Taumatan Babel nanawanna si yamiu ringannu walate apulune. I mangitou apan mangngallangnga si yamiu mammunga wuṛṛu sidutu mallobbossa si Ya'u.

⁶Ana waugu udde i yamiu sarun manga'u manungku i Ya'u Ruata, wuṛṛu sutempo udde i yamiu sarun maasingkatta manungku ete i Ya'u apan nabbisara si yamiu.”

⁷Al᷊uassawe eteapa maasilo darantan daroloṛṛanna; i tou u'amatta malliu panenteanna wuṛṛu uaapiddu watti'a mapia, watti'u al᷊al᷊uassa, watti'u asasal᷊amatta su Sion; wisarane, “Ruatanu Ratu!”

⁸Paddaringikke aikkuittu al᷊al᷊uassu mandariaga soa, i mangitou mangngintul᷊i suadio'a! Ana waugu ringannu mata pua sassane i mangitou naasilo MAWU nabbelengnga su Sion.

⁹Paggiote, ei manga winalal᷊annu Yerusalem, ana waugu MAWU nalluassa uman-Ne wuṛṛu namallossu Yerusalem.

¹⁰MAWU napal᷊iatta'u taṛṛino-Ne su saruannu matan anambon walahanna. Ne ahewallu runia sarun maasilo asasal᷊amatta wuassu Ruatan kite.

¹¹Roote! Tantanga'e soan Babel, ei i yamiu apan uaapiddu aola'u wal᷊en Duata! Imbaṛṛangnga mangindinga saranapa tawe waresi, ukkasse watangannu tantal᷊anna taambe umamatta.

¹²I yamiu sarun tawe masasaṛṛawutta inai, wuṛṛu tawe ere taumata tumal᷊angngu watanganne. Ana waugu MAWU sarun mangehetta si yamiu; Ruatan Israel mallu'adda si yamiu wuassu anambon pappi'uanne.

¹³MAWU nabbisara, “Mangke atonna, allang-Ku sarun maasomba ina'ul᷊e; i tou sarun dal᷊oanna wuṛṛu itanggakka.

¹⁴Dorone manambo taumata niṛṛumindu'a naasilo si tou, pahudde nihohakka na'oman sara tate ere taumata lai.

¹⁵Arawe orassa indi manambo walahanna apan niolangnge tinumiangnga, manga ratu nimoune tinangngone. I mangitou sarun maasilo wuṛṛu maasunna, apan dorone awagananni mangitou.”