Read Talaud YESAYA 53 Bible Online

YESAYA 53 - Talaud bible

YESAYA 53

¹Walahanna udde sinumimbakka, “Isai mangimanna apa apan buatte niaringiṛṛanni yami? Ete sisai buatte niapal᷊iatta'a taṛṛino MAWU?

²MAWU mappandumma allang-Nge udde ere solla apan tinumuwo su leta'a mamara. Tawe aṛṛamaga si tou apan ellehanni ite; taweddu ma'anemma apulun kite.

³I ite mallobbossa wuṛṛu mangindaun tou, taumata apan napenen asasusa wuṛṛu wotongnge mamassanna radda'a. Tawe saran sangkatou mappulu ma'ellega si tou, wuṛṛu i ite lai tawe manaile si tou.

⁴Suṛṛinone ete radda'i ite apan papasannananne, asasusan kite apan aapendamanne, sumbal᷊i i ite massunna asasusa udde ṛuumannu Ruata si tou.

⁵Arawe i tou nilessa ana waugu manga rosan kite, wuṛṛu nipuulla ana waugu al᷊al᷊eo kite. I Tou niṛṛuumanna tadea'u i ite masal᷊amatta, ana waugu manga apapiane i ite niapa'apia.

⁶I ite sarangkanambone nial᷊iwune ere domba, sambau-sambau maddea'a lal᷊anne sassane. MAWU buatte nangema'a si tou al᷊al᷊eo kite sarangkanambone.

⁷I tou nihesekka ringannu maṛṛagissa, arawe mangke uapasanna ringannu sabbare. I tou tawe namu'a moṛṛongnge naal᷊ihidda ana'u domba apan iapidda su tampan pallaṛṛatanna ara'e naal᷊ihidda inangngu domba apan huntinganna wambul᷊une.

⁸I tou nitaṛṛanganna wuṛṛu niparikisanna, ana see niapidda wuṛṛu niṛṛuumanna pateanna. Taweddu na'ellega nasimme; i tou nate ana waugu rosan walahanni ite.

⁹I tou nilagginga suadio'a ringannu taumata lal᷊eo; labbinge su pattangngannu taumata ala, salaiwe i tou tawe na'ola'a al᷊al᷊eo, wuṛṛu tawe saran paassa namahia.”

¹⁰MAWU mappandumma manungku i tou matataṛṛangnga, wuṛṛu manantillu watanganne maola'a sasamba ipamappassa rosa. Ne uukke sarun mal᷊o'engnga wuṛṛu maasilo papapulunne sulal᷊ummi tou apulu MAWU sarun mariaddi.

¹¹Ana waugu udde MAWU nabbisara, “Napawe buatte natataṛṛangnga sansara i tou sarun su lal᷊umanna'a wuṛṛu ma'al᷊uassa. Allang-Ku udde, apan ma'al᷊uassa naung-Ku, buatte namasanna ṛuumannu taumata nambo; sulal᷊ummi tou i Ya'u sarun mangampungnga si mangitou.

¹²Ringannu naungnga mal᷊uassa i tou nanantillu wiakke wuṛṛu nasutta su reengannu taumata lal᷊eo. I tou namasanna rosa taumata nambo wuṛṛu niumal᷊iomana tadea'u i mangitou ampunganna. Ne i tou Ta'u nionggol᷊annu taumata manambo maola'a hadiane, wuṛṛu i tou naasomba wageangnge suadio'a ringannu manga taumata apan matul᷊idda.”