Read Talaud YESAYA 58 Bible Online

YESAYA 58 - Talaud bible

YESAYA 58

¹MAWU nabbisara, “Pangintul᷊ite ringannu ahewallu auatanna! Pasingkata'e su uma-U manga rosa mangitou.

²I mangitou massubba si Ya'u miallo-miallo, wuṛṛu maapulu maasingkatta apulu-U, paṛṛimaunapa i mangitou ma'ola'a apapia, wuṛṛu satia su tita-U. I mangitou mabbisara manungku i mangitou mal᷊uassa massubba si Ya'u wuṛṛu maapulun tita-Ku apan matul᷊idda.”

³Walahanna udde naiwal᷊o, “Apa hunane mappuasa amungkangngu MAWU tawe maasilo? Apa hunane i ite mattingkawawon batanganni ite amungkangngu i Tou tawe mappandumma?” MAWU nabbisara, “Atonna-tonna manungku tantal᷊anna i yamiu mappuasa, i yamiu maddea'a auntunganna sassane wuṛṛu mammoddo manga taumatan sewanu.

⁴Tantal᷊anna mappuasa, i yamiu uatatiakka wuṛṛu uawawul᷊o wuṛṛu ma'inolaanna ringannu maṛṛagissa. Sunnanu ola'i yamiu mappuasa udde mangal᷊ore-U see maddaringikka manga aal᷊iomannu?

⁵Napawe i yamiu mappuasa, i yamiu mannansara watangannu, i yamiu uaru'uttu puanu ere rongngan wal᷊abbuka. I yamiu mammilattu kaingnga karongnga wuṛṛu mannal᷊iawukku awu, see natiilla rosone. Eteudde apan isassaggon kami mappuasa? Sunannu i Ya'u mal᷊uassa su inolaanni yamiu udde?

⁶Eteindi puasa apan ipa'apulu-U: Pallosa'e mantungngu pangangallanga wuṛṛu winabbawa mallinga, wuṛṛu pallosa'e manga taumata niallangnga.

⁷Tahiate annu su manga taumata apan mal᷊unussa, tarimmata'e manga taumata lallele su wal᷊enu. Onggol᷊eten laubba su taumata tantol᷊e, wuṛṛu arie mapawelengngu tuṛṛangngu apan ṛinone itul᷊ungnga.

⁸Ne asasemakka sarun sumabbangnga si yamiu ere matannallo, wuṛṛu manga lessanu mal᷊ihakke mapia. I Ya'u sarun makkundinganna si yamiu. Daranta-U sarun mallu'adda si yamiu wuassu al᷊awo'u pappi'uanne.

⁹Amungkangngu i yamiu umal᷊iomanna, i Ya'u sarun maddaringikka. Amungkangngu i yamiu ma'ilal᷊are si Ya'u, i Ya'u sarun sumimbakka. Ariete pangallangnga sansul᷊ungngu, addoa'e pasaseetta wuṛṛu aal᷊uandaga.

¹⁰Onggol᷊eten kanna su taumata apan mal᷊unussa, wuṛṛu ontol᷊ete manga taumata apan aallanganna. Amungkangngu inolaanni yamiu aroddi, ne ararandumma apan uapal᷊iwutta si'o, sarun mabbal᷊i masemakka ere allo.

¹¹I Ya'u sidutu sarun ua'ehetta si yamiu wuṛṛu mallaidda si yamiu su leta'a apan mamara; i Ya'u sarun mandiaga si yamiu tadea'u sidutu sehatta wuṛṛu matohassa. I yamiu sarun maola'a ere wawail᷊anna apan nasuungnga ua'ene, ere al᷊imatang kua'e apan tawe mamara.

¹²Soa apan mal᷊annute naola'a winalal᷊anna sarun iapararisikki yamiu apia su rapappake tabbe. I yamiu sarun isaggo ‘Walahanna apan napararisikku apia manga tanda'a batu wuṛṛu nanaṛṛupia manga wal᷊en apan nangkahohakka.’ ”

¹³MAWU nabbisara, “Pangaddatte allon Sabatta maola'a allo huna MAWU. Imbaṛṛangnga mammanara hausannu sassane su allo udde. Laghua'e allo udde maola'a allo al᷊al᷊uassa; Pangaddatte allon MAWU ringannu tawe sumal᷊ele; arie lai mammanara ara'e mabbisara wisara apan tawe gunane.

¹⁴Ne i yamiu sarun lumuassa ana waugu tuttuṛṛutta si Ya'u. Ya'u sarun ma'ola'a si yamiu aaddatanna su ahewallu runia. I yamiu sarun mabbiakka mal᷊uassa ringannu hessin leta'a puassa'an Yakub, iupungngu al᷊amonanu, i Ya'u, MAWU buatte nabbisara.”