Read Talaud YESAYA 6 Bible Online

YESAYA 6 - Talaud bible

YESAYA 6

¹Sulal᷊ummu tonna i Ratu Uzia nate, i ya'u naasilo MAWU. I Tou ua'ianna su adderan araratuan-Ne apan matanggakka wuṛṛu mawantuga. Juba-Ne uataappa ahewallu Wal᷊en MAWU.

²Uapal᷊iwutta si Tou uarisikka manga riaddianna apan lukkenggamma ere putungnga, sambau-sambau pia papaidde annumma. Papaidde darua ual᷊indumma hatine, darua uataappa waddangnge, wuṛṛu darua lai ipappaatta tuttalla'a.

³I mangitou mangngintul᷊i sambau ringannu waine: “Susi, susi, susi. Susi MAWU Apan Lembontaṛṛino. Runia napenen daranta-Ne apan mawantuga.”

⁴Tingikki mangitou naaola'a apampakku Wal᷊en MAWU tinumaraddalla, wuṛṛu Wal᷊en MAWU udde sassane napenen timbulla.

⁵Wua'udde i ya'u nabbisara, “Nasilakate! Tate antimma lai si ya'u, ana waugu moṛṛongku kotore ana waugu rosa, wuṛṛu i ya'u uatana'e su pattangngannu walahanna ereudde lai. Sallaiwe aroddi, ringannu mata'u sassane i ya'u buatte naasilo Ratu, MAWU Apan Lembontaṛṛino!”

⁶Wua'udde sambau suwallattu riaddianna udde tinumalla'a ringangku uaapiddu waṛṛa apan nianun sasipitta wuassu mezbah.

⁷I tou nangeṛṛetta wiwi'u ringannu waṛṛa udde, see nabbisara, “Waṛṛa indi buatte nieṛṛetta su wiwikku, orassa indi pasasal᷊anu buatte nipappassa wuṛṛu rosanu buatte niampungannu MAWU.”

⁸Ana see i ya'u naaringikka tingikku MAWU nabbisara, “Isai apan Ta'u irolokka? Isai apan sarun maola'a mangangapiddu watti'i ite?” I ya'u sinumimbakka, “Indi i ya'u. Doloṛṛa'e i ya'u!”

⁹Ana see i Tou nandolo'u inai mangapiddu tanata indi su taumata: “I yamiu sidutu maddaringikka, arawe tawe maasunna. I yamiu sidutu mannutukka, arawe wagga apate apan sarun mariaddi.”

¹⁰Ana see i Tou nabbisarate si ya'u, “Paal᷊umua'a ṛingirannu manga taumata udde, paawengel᷊a'a tal᷊ingane wuṛṛu paawuta'a matane, tadea i mangitou tawe maasilo, maddaringikka ara'e maasunna, ana see mabbelengnga ringang-Ku wuṛṛu maola'e mapia.”

¹¹I ya'u naiwal᷊o, “Pira al᷊annune olangnge sarun iapaamatta, MAWU?” I Tou sinumimbakka, “Ma'oman sara manga soa mahohakka abbi sara tate tumatanangnge, manga wal᷊en tate atanaanna lai, wuṛṛu leta'a naola'a tawe loṛṛone wuṛṛu lol᷊okke,

¹²tumana'u manga soa udde sarun Ta'u limbuaṛṛanna watukku tampa apan marau, na'oman sara ahewallu leta'a mabbal᷊i mal᷊annabba.

¹³Ewe'e amungkangngu suwallattu siri mapul᷊ong katou ta'e pia sangkatou apan uatana'a su wanua udde, i tou lai sarun pateanna. Arawe ere alu nunu'a amungkangngu tuwanganna ta'e pia tuidde, aroddi lai ta'e pia lambene pabbawalaga udde apan maola'a panattaṛṛannu umatta apan na'ukkassa.”