Read Talaud YESAYA 60 Bible Online

YESAYA 60 - Talaud bible

YESAYA 60

¹Pabbuatte wuṛṛu ariaddite asasemakka ei Yerusalem, ana waugu semakku asasal᷊amannu nirumantate; Ruata mannemakka si'o ringannu awawantu-Ge.

²Runia nioossu ararandumma, manga walahanna tataapannu ṛabbi wasa; arawe asasemakku MAWU sarun dumanta si'o, semakku daranta-Ne nilumiatta'a si'o.

³Manga walahanna nirumanta mangngelekka watukku asasemakku, manga ratu ninumemman asasemakka apan nirumanta si'o.

⁴Pa'ellege apa apan nariaddi su uapal᷊iwutta si'o; tumana'u soa ma'ammulla ana mapul᷊e ringannu. Manga anangngu esakka nirumanta wuassu tampa marau, manga anangngu wawine wawawananna.

⁵Naasilo udde i'o tinumiangnga wuṛṛu hatinu nasemakka; i'o naherangnga wuṛṛu nahewalla naungnga. Darotongngu manga walahanna niapidda ringannu, pa'aala wuassu samba'an tahal᷊oangnga niombo si'o.

⁶Wanuanu niṛṛulunannu manambo unta, i mangitou nirumanta wuassu Midian wuṛṛu Efa. Wuassu Syeba taumata nangapiddu wul᷊awanna wuṛṛu amania, lapiddu maddal᷊o inolaannu MAWU.

⁷Ambingnga domba wuassu Kedar niapidda ringannu domba mendangenna wuassu Nebayot nasaddiate su ipattaṛṛamawunu. Sasamba udde ma'al᷊uassa naungngu MAWU i Tou nalloggakka Wal᷊en-Ne apan napenen awawantuga.

⁸Apate udde apan tuttalla'a ere winabbawa naal᷊ihidda merpati apan tantal᷊anna tuttalla'a mapul᷊e?

⁹Eteudde manga apalla apan rumanta mabbal᷊ango mangngapiddu umattu Ruata mapul᷊e wuassu wanua marau. Sal᷊a'a wuṛṛu wul᷊awanna niapidda lai tadea'u ipaddalo MAWU Ruatanu; su Ruatan Israel Apan Lembonsusi, apan na'ola'a uman-Ne a'addatanna.

¹⁰MAWU nabbisara su Yerusalem, “Taumata raho sarun dumanta mamangunna apia darandungngu, wuṛṛu manga ratu sarun mangimbe si'o. Dorone i Ya'u nakkuumannu sulal᷊ummu asasa'u-U, arawe orassa indi Ya'u mappulute umakkannu.

¹¹Allo ṛabbi ngaran soanu sarun wawu'anna, tadea'u pa'aala manga araratuanna wotongnge iuntudda si'o, wuṛṛu manga ratun mangitou maola'a tawananna.

¹²Walahanna wuṛṛu araratuanna apan maddiri tumuṛṛutta si'o, sarun mate wuṛṛu mawul᷊i tawe baddi'a.

¹³Al᷊al᷊uassu mahurangngu Libanon sarun ṛuwoanna ringannu alu berangan, cemara wuṛṛu eru ipa'ola'a Wal᷊e-U apan maṛṛansanga, wuṛṛu ipalloggakka tampa i Ya'u uarisikka.

¹⁴Manga ana'u mangangallangngu rumanta umal᷊intudda, iapa apan buatte nangal᷊uandaga si'o sarun massuṛṛubbawa, i'o sarun isaggo ‘Soa MAWU’, ‘Sion, Soan Duata Susin Israel’.

¹⁵I'o sarun tawe itantangnga wuṛṛu iarantinna, wuṛṛu tawe iwala maola'a mal᷊anna-l᷊annabba. I'o Ta'u olaanna al᷊al᷊uassa sarangkal᷊o'enge, tampa ilallala'a saran mal᷊annu-l᷊annu.

¹⁶I'o sarun paddul᷊ianannu manga walahanna wuṛṛu manga ratu, ere sangkatou inangnga mappadul᷊i anangnge. Ne i'o maasingkatte manungku i Ya'u MAWU, Mananal᷊amannu, wuṛṛu manungku Ruatan Israel apan matohassa Mamamallonnu.

¹⁷I Ya'u uaapiddu wul᷊awanna ipangganti witu'a, wuṛṛu sal᷊a'a ipangganti atta'a. Ta'u nionggol᷊annu witu'a ipangganti alu, wuṛṛu atta'a ipangganti watu. Wanuanu sarun Ta'u olaanna matammudda wuṛṛu mal᷊angnganna, wuṛṛu paparentanna ringannu atatul᷊idda.

¹⁸Tate lai batti'a su ola'u araṛṛagissa su wanuanu, su ola'u araṛṛimunsa'a ahahohakka su wageangngu letangngu. Naal᷊ihidda darandungnga i Ya'u ual᷊u'adda si'o, wuṛṛu i'o sarun maddalo si Ya'u mananal᷊amannu.

¹⁹I'o salaiwe lasa'e semaṛṛannu matannallo sutempo allo, wuṛṛu lasa'e lai semaṛṛannu wul᷊anna sutempo ṛabbi. Ana waugu i Ya'u MAWU naola'a asasemakka tutune si'o, i Ya'u mannemakka ringannu awawantu-U.

²⁰Ete si'o pia matannallo apan tawe umattuppa, wuṛṛu wul᷊anna apan tawe mansa'a. Ana waugu i Ya'u MAWU maola'a mananemakka apan tutune si'o tempon lal᷊alonu sarun masue.

²¹Tumana'u soanu mammanara ringannu ṛinone, i mangitou sarun manahuanna wanua saran mal᷊annu-l᷊annu. I mangitou naal᷊ihidda ranna cangkokka apan nisuang-Ku sassane, tadea'u mapal᷊iatta'u awawantu-U.

²²Ewe'e lai amonanna apan addio'a wuṛṛu masa'ina sarun mabbal᷊i walahanna apan bahewalla wuṛṛu matohassa. I Ya'u MAWU sarun mal᷊ihakke mammanara sutempo apan na'etta'a ara'e natantunna.”