Read Talaud YESAYA 65 Bible Online

YESAYA 65 - Talaud bible

YESAYA 65

¹MAWU nabbisara, “Ya'u nasaddiate sumimbakka uma-U, arawe i mangitou tawe umal᷊iomanna si Ya'u. Ya'u uasaddia paisasombanni mangitou, arawe i mangitou tawe maddea'a si Ya'u. Walahanna udde maddiri mamaggo si Ya'u, salaiwe i Ya'u nasaddiate sumimbakka: i Ya'u indite!

²I Ya'u sidutu uasaddia manal᷊oho uma-U, arawe i mangitou apulune lumawangnga. Walahanna udde ma'ola'a al᷊al᷊eo wuṛṛu tuttuṛṛuta hol᷊agge sassane.

³I mangitou sidutu ma'ola'a si Ya'u massa'u ana waugu mangngonggollu sasamba su manga wawail᷊anna huna manga monganna wuṛṛu mannambunnu amania su manga mezbahne.

⁴Sutempo ṛabbi i mangitou inaite watukku manga liangnga wuṛṛu lal᷊abbinganna maddorongnga tatantiro su manga ṛimuuddu taumata nate. I mangitou u'inassa wawi wuṛṛu ma'inumma sawon ṛemessa apan isassingadda.

⁵I mangitou mabbisara ‘Roote paarau, arie pangeṛṛetta si yami ana waugu i yami na'ukkassa wuṛṛu uaṛṛae wuassi yamiu!’ I Ya'u tawe maaṛṛaddanna maasilo pallal᷊aghu mangitou! Asasa'u-U si mangitou naal᷊ihidda putungnga apan tawe mappaddumma.

⁶Ṛuumanni mangitou uawoṛṛette su saruang-Ku. Atonna, i Ya'u tawe matatana'a mal᷊annabba. I Ya'u buatte nabbal᷊issa al᷊al᷊eo mangitou

⁷ana waugu rosa mangitou wuṛṛu rosa al᷊amona mangitou. I mangitou mallobbossa si Ya'u ringannu mannambunnu amania huna manga monganna su tampa pasasubbanna su wuidda. I Ya'u buatte nabbal᷊issa si mangitou uasul᷊ungngu inolaanni mangitou su allo nanangkal᷊iu.”

⁸MAWU nabbisara, “Wuang anggore apan ta'e pia ua'ene tawe iramme, arawe olaanna ua'en anggore. Aroddi lai pabbawala-U tawe Ta'u pateanna abbi, ana waugu suwallatti mangitou ta'e paiddu apan mattaṛṛamawu si Ya'u.

⁹Sambageanganna taumatan Israel wuassu ṛuanganni Yehuda sarun Ta'u al᷊amatanna, wuṛṛu papapulunni mangitou sarun maapussa'a leta'u panenteang-Ku. Manga taumata nipile-U apan mattaṛṛamawu si Ya'u sarun matana'a poiaroddi.

¹⁰Uma-U sarun massubba si Ya'u; domba wuṛṛu sapi mangitou sarun manioma su Leta'u Saron wuṛṛu su Wawal᷊annu Akhor.

¹¹Arawe wal᷊ine aroddi pal᷊addu manga taumata apan nanantang-Ku, apan tawe pandumme su Sion, wui-U apan susi, apan mannengokku anna si Gad wuṛṛu si Meni, manga mongannu auntunganna wuṛṛu pal᷊addu taumata.

¹²I yamiu sarangkanambone sarun mate maola'a sol᷊eng karaṛṛagissa. Ana waugu, sutempo i Ya'u mammaggo, i yamiu tawe sumimbakka, wuṛṛu sutempo i Ya'u mabbisara, i yamiu maddiri maddaringikka. I yamiu mappianne lumawangnga si Ya'u wuṛṛu ma'ola'a al᷊al᷊eo.

¹³Mangke atonna, taumata apan massubba si Ya'u sarun umanna, wuṛṛu i yamiu amal᷊unusanna. I mangitou sarun ma'inumma, arawe i yamiu amarouanna. I mangitou sarun lumuassa, arawe i yamiu pansilianna.

¹⁴Mangke atonna, i mangitou sarun lumala'u al᷊al᷊uassa, arawe i yamiu lumuai ringannu sussangitta.

¹⁵Manga taumata nipile-U sarun mappaattu arannu maola'a wawontoga; ‘Antimanna MAWU Apan Atanggaṛṛanne mamate si yamiu ere lai si mangitou!’ Arawe taumata apan matuṛṛutta si Ya'u sarun Ta'u onggol᷊annu aranna wakku.

¹⁶Suapan taumata su wanua udde apan maddorongnga al᷊amatta, sarun maddorongnga al᷊amatannu Ruata apan satia. Suapan taumata apan massalu, sarun massalu ringannu arannu Ruata apan satia. Ana waugu asasusa apan dorone nawul᷊ite wuṛṛu nitimbul᷊ianante.”

¹⁷MAWU nabbisara, “I Ya'u sarun mandiaddi langitta apan bakku wuṛṛu runia apan bakku. Manga riaddianna tempon dorone sarun timbul᷊iananna wuṛṛu tate naunganna lai.

¹⁸Lalluasse wuṛṛu lallala'e saran mal᷊annu-l᷊annu ana waugu sarangkanambone apan niriaddi-U. I Ya'u na'ola'a Yerusalem wakku napenen al᷊al᷊uassa, wuṛṛu tumanangnge pasi lagge.

¹⁹I Ya'u sassane sarun lumuassa ana waugu Yerusalem, wuṛṛu lumala'a ana waugu tumanangnge. Su soa udde tate lai lal᷊uai, wuṛṛu tate lai aintul᷊i ma'iontolla.

²⁰Al᷊aṛṛanangnge taweddu nate ta'e maradio'a, wuṛṛu timmadde sarun ma'oman uukka mal᷊o'engnga. Taumata apan uukke maṛṛasutta su tonnane ellehanna ere saṛṛentumuwo, wuṛṛu apan nate taambe sutempo udde, naṛṛinoannu ṛuumang-Ku.

²¹Taumata sarun mapararisikku wal᷊en wuṛṛu matana'a sassane; taumata waine sarun tawe maatana'a. I mangitou sarun massuannu waillu anggore wuṛṛu ma'inumma ua'ene; taumata waine sarun tawe mapa'inumma. Uma-U uukke sarun mal᷊o'engnga ere punnu alu, wuṛṛu maatemma hessin inasaharanni mangitou.

²³Sarangkanambone apan a'olaanni mangitou sarun mahessi, wuṛṛu al᷊aṛṛana'i mangitou tawe aṛṛombanganne mate. I mangitou wuṛṛu papapulunni mangitou sarun Ta'u al᷊amatanna saran mal᷊annu-l᷊annu.

²⁴Tantal᷊anna i mangitou taambe naddorongnga, i Ya'u buatte sinumimbakka; tantal᷊anna i mangitou taambe nuddussa inumal᷊iomanna, i Ya'u buatte naddaringikka aal᷊iomanni mangitou.

²⁵Serigala wuṛṛu ana'u domba su sampunna u'anna nannal᷊o; singa u'anna laṛṛami ere lai sapi, wuṛṛu atoanna tate lai maasilaka. Su ahewallu wui-U apan na'ukkassa, taweddu lai apan mallinga ara'e ma'ola'a al᷊al᷊eo.”