Read Talaud YESAYA 7 Bible Online

YESAYA 7 - Talaud bible

YESAYA 7

¹Ratu Ahas eteudde ana'i Yotam pulunni Uzia. Sutempo i tou uaparenta Yehuda, napesangke pangalo. Rezin ratun Siria, wuṛṛu i Pekah ana'i Remalya ratun Israel, nirumanta namangalo Yerusalem. Arawe i mangitou tawe naawaddon soa udde.

²Napawe ratun Yehuda naaringikka manungku tantaran Siria sinumuttate su wageangngu Israel narambauten Israel, i tou wuṛṛu pabbawalage mangke matta'utta, na'oman sara i mangitou mangngiladda naal᷊ihidda punnu alu apan ia'io'u anginna.

³MAWU nabbisara si Yesaya, “Apira'e anangngu i Syear Yasyub wuṛṛu roote paisasomban Ratu Ahas. I'o sarun maaratingnga si tou su pentakku hoten li'u al᷊iurosone, sutampan manga mabbawansalla mammanara.

⁴Wal᷊oa'e su ratu manungku i tou ṛinone uasaddia, arawe sidutu paatammudda. I tou tawe wotongnge mata'utta ara'e umal᷊iwu. Aasa'un Ratu Pekah wuṛṛu Ratu Rezin ringannu tantarane manga taumatan Siria udde, tawe tumaniten maasilaka wuassu ruan bua anutungnga pia timbulle.

⁵Siria buatte na'ire ringannu Israel wuṛṛu ratune.

⁶I mangitou mappulu mamangalo Yehuda wuṛṛu mamata'utta tumanangnge tadea'u manamba'a si mangitou, ana see manenegi parinsin Tabeel maola'a ratu.

⁷Arawe i Ya'u, MAWU, mapal᷊iatta'a manungku olangnge udde sarun tawe mariaddi,

⁸ana waugu Siria tawe mattohasanna wuassu Damsyik inangngu soane, wuṛṛu Damsyik tawe mattohasanna wuassi Ratu Rezin. Arawe sulal᷊ummu tempo annumu pul᷊o l᷊ima su tonnane, Israel sarun massal᷊iawukka ma'oman sara tawe matatana'a ere sambau walahanna.

⁹Israel tawe mattohasanna wuassu Samaria, inangngu soane, wuṛṛu Samaria tawe mattohassanna wuassi Ratu Pekah. Amungkangngu i yamiu tawe atonna-tonna mangngimanna si Ya'u, i yamiu sarun tawe maaro'appa.”

¹⁰MAWU namasingkattu tanata waine si Ahas:

¹¹“Paddorongke tadea'u MAWU Ruatanu mangonggollu sambau tatiala si'o, tanne wuassu runian taumata nate ual᷊iu wowa ara'e wuassu langitta rosone.”

¹²Ahas sinumimbakka, “I ya'u maddiri maddorongnga tatiala. I ya'u maddiri mamono'a MAWU.”

¹³Ana see i Nabi Yesaya nabbisara, “Amungkangngu aroddi, paddaringikke ei papapulunni Ratu Daud! Tawe natimu i yamiu mannal᷊u'atta asasabbaren taumata, ma'oman sara i yamiu mannal᷊u'atta lai asasabbaren Duata'u?

¹⁴Orassa indi, MAWU sassane sarun mangonggollu tatiala si yamiu: Sangkatou maṛṛuala apan pia illoṛṛo sarun manungkangngu sangkatou ana'a esakka apan aranne isaggo Imanuel.

¹⁵Sutempo i tou wahewalle se'e wotongngete makkawessa sassane, wanua udde sarun maola'a manambo anna.

¹⁶Ana waugu tantal᷊anna tempone udde taambe nia'omanna, wanua darua apan paparentannu manga ratu apan ia'ata'unnu udde sarun itantangnga tawe loṛṛone.

¹⁷MAWU sarun mandantan ratun Asyur, ana see i'o wuṛṛu anambon lal᷊oṛṛon bal᷊enu se'e tumana'u soa sarun mamendamma manga allo napenen asasuṛṛipitta apan maggewal᷊anna wuassu sarangkanambone apan buatte niapendamanni yamiu ro'en araratuannu Israel wuṛṛu Yehuda natahia darua.

¹⁸Sutempo udde MAWU sarun mamaggo taumatan Mesir wuṛṛu taumatan Asyur, ana see walahanna darua udde rumanta naal᷊ihidda ammul᷊annu lango wuṛṛu attimpua apan uaṛṛimpulunna manga rampissa wuṛṛu loṛṛangngu watu. I mangitou sarun manaappa suapan ahuranganna ṛoaanna wuṛṛu manga tampa nannal᷊one.

²⁰MAWU sarun manewa ratun Asyur tadea'u ma'ola'a Israel naal᷊ihidda sangkatou taṛṛa pol᷊o apan mallunggukka anambon uta'a wuṛṛu waṛṛabbissu awa'a.

²¹Sutempo udde, napawe pia sangkatou tumba'u uapaddul᷊i sambau sapi anangnge wuṛṛu ambingnga darua,

²²susu apan asombanganna wuassu winatangnga udde manampal᷊iu wuassu hausannu manga taumata apan nallambe su wanua udde. Atonna, i mangitou sarun ma'inumma susu wuṛṛu pul᷊a.

²³Sutempo udde manga wawail᷊annu anggore apan sambau-sambau nisuanannu saṛṛiwu su punnene wuṛṛu aregane saṛṛiwu lai roitta sal᷊a'a, sarun tuwoannu aputta ṛoaanna.

²⁴Taumata apan inai poiaroddi ṛinone mangapiddu al᷊atianna wuṛṛu anaanna, waugu ahewallu wanua udde napenen aputta ṛoaanna.

²⁵Wuṛṛu wageangngu leta'u panenteanna apan wiasane wabbail᷊anna wuṛṛu sassuananna, udde lai napenen aputta ṛoanna, na'oman sara taumata tawe waṛṛani inai poiaroddi. Leta'a udde tumba'u pia gunane su sapi wuṛṛu domba umanna nannal᷊o.”