Read Talaud YESAYA 8 Bible Online

YESAYA 8 - Talaud bible

YESAYA 8

¹MAWU nabbisara si ya'u, “Panganute sambau watunlei wahewalla, ana see'e woṛṛeta'e ringannu manga huruppa apan masemakka: ‘Pallaṛṛampassa apan Matal᷊ingkassa, Pangangaṛṛo apan Mal᷊ihakka.’

²Waggoite maola'a matatialane ruan katou apan wotongnge apangimananna, eteudde i Imam Uria wuṛṛu i Zakharia, ana'i Yeberekhya.”

³Manga pira tempo wua'udde awingku piate illoṛṛo. Sutempo ana'i yami niasungkangnga, MAWU nabbisara si ya'u, “Saggoa'e i tou ‘Mallaṛṛampassa apan Matal᷊ingkassa, Pangangaṛṛo apan Mal᷊ihakka.’

⁴Waugu tantal᷊anna ana'a udde ta'e addio'a taambe maasaggo ‘Papa’ wuṛṛu ‘Mama’, anambon paa'alan Damsyik wuṛṛu anambon saranapa niṛṛampassu Samaria sarun ṛuwoanna ringannu ratun Asyur.”

⁵MAWU nabbisara apia si ya'u,

⁶wisara-Ne, “Walahanna indi nanol᷊a'u ua'e apan matilangnga wuassu ana'u Sal᷊ukku Syiloah, wuṛṛu mal᷊uassa ringanni Ratu Rezim wuṛṛu i Ratu Pekah.

⁷Ana waugu udde i Ya'u, MAWU, sarun maparantan ratun Asyur wuṛṛu anambon tantarane mapapangalo Yehuda. I mangitou sarun lumempangnga ere Sal᷊ukku Efrat apan mattaṛṛatompe'a wuṛṛu mangngelekka su manga rampinne.

⁸I mangitou sarun mangelekka su Yehuda ere manawangnga atanggakke sara ullekka manggal᷊amon kal᷊awo'a.” Ruata uarundinganna si ite! Papaid-De apan uasiappakka uatillumma wanuan kite.

⁹Pa'ammule ringannu mangngindo, ei anambon al᷊awo'u walahanna! Paddaringikke ei manga pentakku runia! Pasasaddiate inai mappangalo, arawe ringannu naungnga apan mawawo! Ore, pasasaddiate, arawe ringannu apendamma mangngindo!

¹⁰Panngol᷊age, arawe sarangkanambone tawe maola'a. Pakkawesse, arawe tawe gunane, ana waugu Ruata uaṛundinganna si yami.

¹¹I ya'u nitaṛṛinoannu MAWU wuṛṛu nionggol᷊annu tatagu tadea'u tawe mallaṛṛenggenna lal᷊anna apan amatannu walahanna udde. Wisara-Ne,

¹²“Arie massunna komplotanna apan aellehanni mangitou komplotanna, wuṛṛu arie mata'uttu manga inolaanna apan iaata'utti mangitou.

¹³Naungete manungku i Ya'u, MAWU Apan Lembontaṛṛino uddewe susi. Tumba'u i Ya'u apan ṛinone iaata'unnu.

¹⁴Ana waugu i Ya'u lembon susi, i Ya'u na'ola'a watu atarannu tumana'u Yehuda wuṛṛu Israel, wuṛṛu sedda apan mannametta tumana'u Yerusalem.

¹⁵Manambo taumata apan sarun manawo matara wuṛṛu mal᷊essa. I mangitou sarun mawul᷊ussa sulal᷊ummu sedda.”

¹⁶I yamiu, mallal᷊aṛṛenggengku ṛinone manahipunna wuṛṛu mappadul᷊i manga tanata apan nionggollu Ruata si ya'u.

¹⁷MAWU buatte namunin batangan-Ne wuassu pallaṛṛiten Yakub, uman-Ne, arawe i ya'u mangngimanna wuṛṛu uaantimma si Tou.

¹⁸Indite i ya'u wuṛṛu al᷊aṛṛana'u apan nionggollu MAWU si ya'u. MAWU Apan Lembontaṛṛino apan uaparenta su Sion, nandolokki yami maola'a tiala su umattu Israel.

¹⁹Arawe manga taumata apan mandolokki yamiu madorongnga tatantiro wuassu manga taṛṛa pasangkadda apan uasasal᷊imburunga wuṛṛu wiwikke u'alore. Taumata udde sarun mabbisara, “Wal᷊inewe i ite ṛinone maddorongnga tatantiro wuassu manga ṛimuuddu taumata nate tadea'u hunan taumata wiakka?”

²⁰Simbakke arendi, “Paddaringikke al᷊aṛṛa'u MAWU! Taumata apan tawe mabbisara uasul᷊ungngu al᷊aṛṛa'a udde, tawe antimma.”

²¹Manga taumata apan naṛṛiaannu susa wuṛṛu mal᷊unussa sarun mamal᷊intaddu wanua udde. Ana waugu mal᷊unussa, i mangitou mangke mandona na'oman sara mangnganen datu wuṛṛu Ruata mangitou. Suapan tampa i mangitou ma'ellega, tumatingngara,

²²ara'e mangngintanno, i mangitou tawe maasilo manga apa tumba'u asasuṛṛipitta wuṛṛu ararandumma se'e lai asasul᷊aubba apan mangngaitta. I mangitou sarun iramme sutampa apan marandumma udde.

²³Arawe tawe saran mal᷊annu-l᷊annu wanua udde aṛṛiaannu asasuṛṛipitta. Wageangngu leta'a apan atatanaannu manga ṛuanganni Zebulon wuṛṛu Naftali tawe ellehannu MAWU mawawo. Arawe sutempo apan addantane, i Tou sarun mangaddatta su ahewallu leta'a wuassu Tahal᷊oangnga Tangngane watukku ra'i maddatingngu samba'an Sal᷊ukku Yordan, ewe'e lai maddatingngu Galilea apan wawanuannu taumata raho.