Read Talaud YESAYA 9 Bible Online

YESAYA 9 - Talaud bible

YESAYA 9

¹Walahanna apan mabbiakka sulal᷊ummu ararandumma ma'asilo semakka apan ruddiallo. Apam uatana'a al᷊ungu lintaun papate sasemaṛṛannu semakka.

²MAWU, I'o nangonggolla si mangitou al᷊al᷊uassa apan bahewalla, I'o na'ola'a si mangitou huggio. I mangitou lullala'a ana waugu apapia-Nu, naal᷊ihidda taumata apan lulluassa sutempo mangitingnga, ara'e mattahia ul᷊e niaaṛṛo.

³I'o buatte nanaṛṛia'u winabbawane apan mawakkatta wuṛṛu alu papasanna wuassu wambangnge. I'o namaddon walahanna mangngallanga udde apan mammaṛṛangnga uman-Nu. Ere lai sutempo apan nanangkal᷊iu sutempo I'o namaddon tantaran Midian.

⁴Sapatun tantara apan tuttaraddalla wuṛṛu laungnge apan napenen daṛṛa, sarun masue iepoddu putungnga.

⁵Sangkatou ana'a niasungkangnga hunang kite; i ite nionggol᷊annu sangkatou ana'a esakka. I Tou sarun maola'a piaṛṛa'i ite. I Tou isaggo: “Mananantiro Pande”, “Ruata Matohassa”. “Iamangnga Tawe Auddusanne”, “Ratun Paddarame”.

⁶I Tou mamarenta maola'a sangkatou ratu papulunni Daud, taṛṛinone tumaniten bahewalla. Wanuane sidutu su paddarame wuṛṛu su lal᷊umanna'a; pamamarentane nirapappakka su tita wuṛṛu atatul᷊idda orassa indi maddatingngu mal᷊annu-l᷊annu. MAWU Apan Lembontaṛṛino sarun manuungngu udde.

⁷MAWU buatte nangema'u ṛuumanna su araratuannu Israel.

⁸Anambon walahannu Israel wuṛṛu tumana'u Samaria sarun maasingkatta manungku ete MAWU apan na'ola'a udde. Orassa indi i mangitou namunga wuṛṛu matanggakka naungnge. I mangitou mabbisara,

⁹“Manga gedunga ara'e wal᷊en wahewalla wuassu tela leta'a naṛṛaate, arawe i yami sarun ma'ola'a manga wal᷊en wakku wuassu watu. Manga alu ara buatte nituwangnga, arawe sarun hantianni yami ringannu alun cemaran Libanon apan apianne.”

¹⁰MAWU buatte nangal᷊oren seetti mangitou tadea'u lumawangnga si mangitou.

¹¹Walahannu Siria su samba'an ra'i wuṛṛu walahannu Filistin su samba'an waṛṛatta nangaṛṛo Israel. Arawe MAWU ta'e massa'u wuṛṛu sidutu makkuumanna.

¹²Walahannu Israel taambe lai sumassilla, salaiwe buatte niṛṛuumannu MAWU Apan Lembontaṛṛino; i mangitou taambe lai mawal᷊u.

¹³Ana waugu udde tumba'u sulal᷊ummu allo massallo MAWU nakkuumannu manga piaṛṛa'u Israel wuṛṛu tumanangnge. I Tou namonggo'a wuṛṛu nandammen pua wuṛṛu tol᷊ene.

¹⁴Puane eteudde manga matatimmadde wuṛṛu taumata apan a'addatanna, tol᷊ene eteudde manga nabi apan mangngonggollu manga al᷊aṛṛa'a wuṛṛu mangngal᷊iwu.

¹⁵Manga piaṛṛa'u walahannu udde buatte nangal᷊iwu wuṛṛu nanongkakku tumana'u soa.

¹⁶Walahanna udde nassina'adde wuṛṛu nal᷊al᷊eote wuṛṛu anambon wisara mangitou lal᷊eo. Ana waugu udde suwallattu manga umbasanna tawe saran sangkatou apan niapaal᷊iu MAWU. I tou tawe niumakkannu wawine wal᷊u wuṛṛu asisitimpal᷊ussa. Arawe MAWU ta'e massa'u wuṛṛu ta'e makkuumanna.

¹⁷Al᷊al᷊eon walahanna udde mannoṛṛobba naal᷊ihidda putungnga nangepoddu anggaṛṛumunanna ṛoaanna. Ṛenggamme naal᷊ihidda mahurangnge nasoṛṛobba ringannu timbulla sussal᷊oi.

¹⁸MAWU Apan Lembontaṛṛino tumanite massa'u, wuṛṛu ṛuuman-Ne naal᷊ihidda putungnga apan lukkanganggabba wuṛṛu walahanna udde naola'a alune apan nasue. Tawe saran sangkatou apan umakkannu tuṛṛangnge.

¹⁹Su ahewallu wanua udde taumata maṛṛanggotta wuṛṛu u'anna wiakka apan botongnge iwo'o, arawe tawe maapendamma mal᷊aidda. Ewe'e i mangitou u'inassa manga hawe mangitou sassane!

²⁰Taumatan Manasye wuṛṛu taumatan Efraim uapapangalo, see na'aukka nilumawangnga Yehuda. Arawe MAWU ta'e massa'u wuṛṛu sidutu makkuumanna.