Read Talaud IMAMATTA 10 Bible Online

IMAMATTA 10 - Talaud bible

IMAMATTA 10

¹Su allo sambau i Nadab wuṛṛu i Abihu, manga ana'i Harun, nanganu tanpan putungngu sambau-sambau wuṛṛu tinaṛṛoannu waṛṛa. Ana see itarua nangaddon amania su putungnga udde wuṛṛu nionggola sasamba su MAWU. Arawe putungnga udde tawe waresi ana waugu MAWU tawe nandolokki tarua niapaonggolu sasamba.

²Ne MAWU nandantan putungnga apan nanutungnga sitarua na'oman sara nate su Rasannu MAWU.

³Ana see i Musa nabbisara si Harun, “Eteudde apan niapasingkattu MAWU su tempo i Tou nabbisara, ‘Sarangkanambone apan mangngimbe si Ya'u ṛinone mangaddata asasusi-U. I Ya'u sarun mapal᷊iatta'u awawantu-U su ahewallu walahanna-Ku.’ ” Arawe i Harun mal᷊anna-l᷊annaba.

⁴Wua'udde i Musa namago si Misael wuṛṛu si Elsafan, manga ana'i Uziel, tuṛṛangngu iamangngi Harun. Unni tou si mangitou, “Rantate inawarendi, al᷊appe winal᷊unannu tuṛṛangngu su Rasannu MAWU wuṛṛu addoa'e su; liuddu paddasananna.”

⁵I mangitou nirumanta wuṛṛu nangapiddu manga winal᷊unanna apan ta'e lal᷊uṛṛeannu laubba udde watukku liuddu paddasananna, ere buatte nirolokki Musa.

⁶Ana see i Musa nabbisara si Harun wuṛṛu manga anangnge waine, eteudde i Eleazar wuṛṛu i Itamar, “Arie pabbala'a utangngu tawe aṛṛoanna, wuṛṛu arie panggesa'a laungngu apan mapal᷊iatta'a manungku iraddua massusa wuṛṛu lullal᷊o. Amungkangngu iradua ma'ola'a aroddi, iradua sarun mate, wuṛṛu anambon ṛuangannu Israel asa'uannu MAWU. Arawe anambon taumatan Israel waine wotongnge lumal᷊on duang katou apan nate ana waugu putungnga wuassu MAWU.

⁷Imbaṛṛangnga manantangngu Rasannu MAWU tadea'u i yamiu tawe mate, ana waugu amungkangngu i yamiu buatte nitenegu lanan lal᷊aghun iapa'imbe MAWU.” I mangitou na'ola'a ere buatte niwisaran i Musa.

⁸MAWU nabbisara si Harun,

⁹“Napawe buatte na'inumma ua'e anggore ara'e ua'e ma'awu'anna, i'o wuṛṛu manga anangngu imbaṛṛangnga sumutta sulal᷊ummu Rasang-Ku. Amungkangngu i yamiu lumawangnga atoranna udde, i yamiu sarun mate. Parenta udde sarun daringiṛṛannu anambon papapulunnu.

¹⁰I yamiu ṛinone wotongnge mapadaṛṛalan apan niṛṛae su Ruata, wuṛṛu tawe niṛṛae suwallatu nassal᷊a wuṛṛu tawe nassal᷊a.

¹¹Anambon tita apan Ta'u nionggola si'o wuassi Musa, ṛinone wotongnge iaṛṛa'i yamiu su walahannu Israel.”

¹²I Musa nabbisara si Harun wuṛṛu su anangnge darua, i Eleazar wuṛṛu i Itamar, “Panganute gandumma lambene wuassu anna apan nionggola su MAWU. Wuassu taponna udde ola'e roti apan tawe ragine, ana see ante su sandiṛṛannu mezbah, ana waugu sasamba udde lembon susi.

¹³Roti udde ṛinone annananna su tampa apan susi, ana waugu wuassu anna apan nionggola sasamba su MAWU, roti udde maola'a wageangngu wuṛṛu manga anangngu esakka. Eteudde parentan MAWU si ya'u.

¹⁴Arawe i yamiu wuṛṛu manga anangngu esakka wuṛṛu wawine wotongnge uminassa ro'on sasamba nitogokka wuṛṛu palangngu sasamba apan niṛṛae. Eteudde wageangngu manga imam wuassu sasamban paddaramen walahannu Israel. I yamiu wotongnge umanna al᷊awo'u anna su tampa apan tawe ipappalli.

¹⁵Palangnga sasamba apan niṛṛae wuṛṛu ro'on sasamba nitogokka udde ṛinone iapidda suadio'a ringannu tawa wuṛṛu sasamba itattambunna maola'a sasamba iṛṛae su MAWU. Manga wageangnge udde maola'a pussaanu wuṛṛu manga anangngu saran mal᷊annu-l᷊annu, ere buatte niparentan MAWU.”

¹⁶Wua'udde i Musa naiwal᷊o su ola'u ambinga maola'a sasamba ipangampunga rosa. I tou nipasingkatanna manungku ambinga udde buatte nitambunna wangu. Olangnge udde i Musa naasa'u si Eleazar wuṛṛu si Itamar, wuṛṛu i tou nabbisara si mangitou,

¹⁷“Anio sasamba ipangampunga rosa udde nianni yamiu su tampa apan susi? Sasamba udde lembon susi; MAWU nangonggolla si'o, tadea'u rosan taumatan Israel ampunganna.

¹⁸Daṛṛan ambinga udde tawe niapidda su Rasannu MAWU, nariaddi ṛinone sasamba udde annananni yamiu isudde ere buatte ta'u niparenta.”

¹⁹Sasimbakki Harun, “Atonna allo indi ṛuangannu Israel buatte nangonggolu sasamba aampunga rosa wuṛṛu sasamba itattambunna su MAWU. Salaiwe aroddi, asasilaka indi naṛṛia'e si ya'u. Unnu wisara allo indi ya'u umanna sasamba ipangampunga rosa udde, apa MAWU mal᷊uassa si ya'u?”

²⁰I Musa naapemdamma mal᷊uassa ringannu sasimbakka udde.