Read Talaud IMAMATTA 11 Bible Online

IMAMATTA 11 - Talaud bible

IMAMATTA 11

¹MAWU nangonggola si Musa wuṛṛu si Harun manga atoranna indi

²su walahannu Israel. Anambon binatangnga apan mabbiakka su ammaranne wuṛṛu paarua sumappa wuṛṛu anuune wua'udde tawe ipappalli wuṛṛu wotongnge inasanni yamiu.

⁴Imbaṛṛangnga uminassa unta, pelanduk ara'e kelinci. Winatangnga udde ipappalli ana waugu salaiwe paarua sumappa, anuune tawe nawa'a.

⁷Imbaṛṛangnga uminassa wawi. Winatangnga udde palli, ana waugu salaiwe anuune nawa'a, i tou tawe sumappa paarua.

⁸Ṛeme imbaṛṛangnga inasanna wuṛṛu winal᷊unanne lai tawe wotongnge indinganna ana waugu winatangnga udde palli.

⁹I yamiu wotongnge uminassa al᷊awo'u inassa pia papaidde wuṛṛu pia onamme.

¹⁰Winatangnga apan mabbiakka sulal᷊ummu ua'e arawe tawe papaidde wuṛṛu tawe onamme uddewe palli, nariaddi tawe wotongnge inasanna, wuṛṛu winal᷊unanne tawe wotongnge indinganna.

¹³Su wallatu manga manu'u winalanganna, apan manansunna indi imbaṛṛangnga inasanna ana waugu palli: manu'a rajawali, manu'a hantu, al᷊awo'u asiaṛṛe, nasar, gagak, manu'a unta, camar, blekok wuṛṛu al᷊awo'u hatin baṛṛoa, undan, manu'a kasa wuṛṛu pani'i.

²⁰Anambon winatangnga maradio'a apan pia papaidde uddewe palli,

²¹tabbene'e iapa wotongnge sumolo'a.

²²Nariaddi saṛṛappalanna, jangkerik wuṛṛu saṛṛappalanna ma'elomma wotongnge inasanna.

²³Arawe al᷊awo'u wal᷊e'a waine apan pia papaidde wuṛṛu lai tuttondo udde ipappalli.

²⁴Sangkatou nabbal᷊i maarantinna maddatingngu matannallo umattuppa amungkangngu i tou nangindingnga winal᷊unannu winatangnga indi: winatangnga apan pia anuune, tabene'e anuune nawa'a wuṛṛu sussappa paarua, wuṛṛu winatangnga leddane appata wuṛṛu pia aalakke. Isai-sai apan mangapiddu hatin winal᷊unannu winatangnga udde ṛinone mabbansalla laungnge, arawe i tou ta'e maarantinna maddatingngu matannallo umattuppa.

²⁹Wal᷊awon leta'a, wal᷊awo wahewalla, wal᷊awo ti'o, kadal, al᷊awo'u hatin aakka, landak, bengkarung, watto'a wuṛṛu tingkaru uddewe ipappalli.

³¹Isai-sai apan nangindingnga winatangnga udde ara'e winal᷊unanne mabbal᷊i ma'arantinna maddatingngu matannallo umattuppa.

³²Amungkangngu winal᷊unannu winatangnga udde nanawo su sambau saranapa, ne saranapa udde mabbal᷊i ma'arantinna. Olangnge udde mariaddi su al᷊awo'u hatin saranapa wuassu alu, mal᷊aṛṛenessa, pisi, ara'e nasa karongnga wuṛṛu tawe maola'a hatto su ola'u saranapa udde i pappaatta. Saranapa udde ṛinone ilakkumma sulal᷊ummu ua'e, arawe sidutu ma'arantinna maddatingngu matannallo umattuppa.

³³Amungkangngu winal᷊unanna udde nanawo sulal᷊ummu urinna leta'a, al᷊awo'a sulal᷊ummu urinna udde mabbal᷊i ma'arantinna, wuṛṛu urinna udde ṛinone pesanganna.

³⁴Anna apan niawosoannu ua'e wuassu urinna udde mabbal᷊i ma'arantinna, wuṛṛu ua'e sulal᷊ummu urinna udde lai ma'arantinna.

³⁵Al᷊awo'u saranapa apan nanawo su winal᷊unanna udde mabbal᷊i ma'arantinna. Sunggilla ara'e tampan panambunanna wuassu leta'a apan naeṛṛetannu winal᷊unanna udde ṛinone pesanganna ana waugu ma'arantinna.

³⁶Tabbene'e al᷊imatan kua'e ara'e paṛṛihi, al᷊awo'a waine mabbal᷊i ma'arantinna amungkangngu aeṛṛetannu winal᷊unanna.

³⁷Amungkangngu winal᷊unanna udde manawo su wualanna apan sarun iasi'a, wualanna udde sidutu waresi.

³⁸Arawe amungkangngu wualanna udde tantal᷊anna ilallakumma sulal᷊ummu ua'e ana see nanawoannu winal᷊unanna udde, ne wualanna udde nabbal᷊i ma'arantinna.

³⁹Isai apan napangassa winal᷊unannu winatangnga apan tawe ipappalli mabbal᷊i ma'arantinna maddatingngu matannallo umattupa.

⁴⁰Taumata apan uaapidda ara'e niumanna winal᷊unanna udde ṛinone mabbansalla laungnge, arawe i tou sidutu ma'arantinna madatingngu matannallo umattupa.

⁴¹Anambon binatangnga apan uaṛṛulunna su leta'a, mawae ete tuttondo, ara'e leddane appata ara'e leddane manambo, uddewe ipappalli wuṛṛu udde imbaṛṛangnga inasanna.

⁴³Imbaṛṛangnga ma'ola'a watangannu ma'arantinna ringannu uminassa winatangnga hatine udde.

⁴⁴Ete i Ya'u MAWU Ruatanu, ana waugu udde paariagaite tadea'u i yamiu sidutu susi, ana waugu i Ya'u susi.

⁴⁵Ete i Ya'u Ruatanu apan nangapiddi yamiu sinumabbangnga wuassu Mesir, tadea'u i Ya'u wotongnge maola'a Ruatanu. Ṛinone i yamiu susi, ana waugu i Ya'u susi.

⁴⁶Eteudde atoranna su ola'u winatangnga, nasutta lai manu'u winalanganna, winatangnga apan mabbiakka sulal᷊ummu ua'e wuṛṛu uaṛṛulunna su leta'a.

⁴⁷I yamiu wotongnge ma'ellega paṛṛalane wuṛṛu ma'arantinna, su wallatu winatangngu apan botongnge inasanna wuṛṛu winatangnga apan tawe wotongnge inasanna.