Read Talaud IMAMATTA 14 Bible Online

IMAMATTA 14 - Talaud bible

IMAMATTA 14

¹MAWU nangonggola si Musa manga atoranna indi su ola'u lal᷊aghun pamamaresi napawe napiate wuassu radda'a pisi apan ma'ata'utta. Su allo udde taumata udde sarun iapasingkatta waresi, i tou ṛinone iapidda ringannu imam,

³wuṛṛu imam mangapidda watukku liuddu paddasananna. Amungkangngu tumuṛṛuttu i tou namarikissa taumata udde napiate,

⁴imam mandolokki tou mangapiddu darua manu'u winalanganna apan ta'e wiakka wuṛṛu tawe ipappalli, ringannu sampoto alu cemara, sambua tal᷊i maṛṛamu wuṛṛu sandanna hisop.

⁵Manu'a samba'u ṛinone pototanna su urinna leta'a apan lal᷊oṛṛoannu ua'e waresi wuassu al᷊imatan kua'e.

⁶Manu'a sambau lai ringannu alu cemara, tal᷊i maṛṛamu wuṛṛu sandanna hisop ṛinone iammo sulal᷊ummu daṛṛan manu'u winalanganna apan buatte nipototta.

⁷Imam mangalassu daṛṛan manu'u winalanganna udde paapitu su taumata apan napiate, wuṛṛu namasingkatta i tou waresite. Ana see manu'u winalanganna apan ta'e wiakka ṛinone ipallossa su wadda'a.

⁸Wua'udde taumata udde ṛinone mabbansalla laungnge, mallungukka anambon utangnge, wuṛṛu mandeno. Ne nawaresite i tou, wuṛṛu wotongngete sumutta sulal᷊ummu paddasananna, arawe al᷊annune pitu allo lai i tou taambe wotongnge sumutta sulal᷊ummu rasanne sassane.

⁹Su allo appitune i tou ṛinone mallunggukka anambon utangnge, wuṛṛu omengnge, angkarimme wuṛṛu anambon waṛṛabbissa su awangnge. Ana see i tou ṛinone mabbansalla laungnge wuṛṛu mandeno. Wua'udde i tou nawaresite.

¹⁰Su allo aual᷊une taumata udde ṛinone mangapiddu darua ana'u domba esakka wuṛṛu sambau ana'u domba wawine uukke santonna, apan sambau-sambau tawe sangkulle. Wal᷊ine wua'isudde lai tatallu su kilone taponna apan buatte nilo'annu lanan zaitun wuṛṛu sepertiga su literene lanan zaitun.

¹¹Ana see imam ṛinone mangapiddi tou suadio'a ringannu sasambane udde su saruannu ngaran Dasanna MAWU.

¹²Imam ṛinone manganu sambau ana'u domba esakka wuṛṛu sepertiga su literene lanan zaitun maola'a sasamba lal᷊anna'a arugianna, wuṛṛu ionggola maola'a sasamba iatogokka su MAWU.

¹³Ana'u domba udde ṛinone pototanni tou su tampa apan buatte niṛṛae pamototanna winatangnga maola'a sasamba aampungnga rosa wuṛṛu sasamba itattambunna. Domba udde ṛinone pototanna isudde ana waugu sasamba lal᷊anna'a arugianna wuṛṛu sasamba aampungnga rosa uddewe lembon susi wuṛṛu udde maola'a wageangngu imam.

¹⁴Imam ṛinone manganu addio'a daṛṛan ana'u domba ana see iwuṛṛa su tal᷊inga aikkatanna, wuṛṛu su inangngu tal᷊imaddo lima aikkatanna wuṛṛu su inangngu tal᷊imaddon ledda aikatannu taumata apan sarun iapasingkatta waresi.

¹⁵Wua'udde imam manganu addio'a lanan zaitun wuṛṛu nilal᷊inna su pal᷊addu limane aiṛṛi sassane.

¹⁶Napawe i tou buatte nangammon tal᷊imaddo aikatanne sulal᷊ummu lana, wuṛṛu nangalassa paapitu sulal᷊ummu Rasannu MAWU.

¹⁷Ana see addio'a lana su limane ṛinone iwuṛṛa su manga tampa apan buatte niwuṛṛannu daṛṛa eteudde su tal᷊inga aikatanna, su inangngu tal᷊imaddo lima aikkatanna, wuṛṛu su inangngu tal᷊imaddo ledda aikkatanna su taumata apan iapasingkatta waresite.

¹⁸Lana lambene ṛinone ilal᷊inna su wowon puan taumata udde. Ringannu aroddi imam ma'ola'a lal᷊aghu pangangukkassa su taumata udde su saruannu MAWU.

¹⁹Wua'udde imam ṛinone mangonggolu sasamba ipangampungnga rosa tadea'u taumata apan ma'arantinna udde mabbal᷊i waresi. Wua'udde i tou ṛinone mamototta winatangnga maola'a sasamba itattambunna

²⁰wuṛṛu mangonggola suadio'a ringannu sasamba ia'imbe au wowon mezbah. Ringannu aroddi imam ma'ola'a lal᷊aghun pamamaresi su taumata udde, wuṛṛu i tou nabbal᷊ite waresi.

²¹Amungkangngu taumata udde asiangnga wuṛṛu tawe addapanne, ne su sasamba lal᷊anna'a arugianna i tou wotongnge mangapiddu sambau ana'u domba esakka maola'a sasamba itoggokka su MAWU. Wal᷊ine wua'udde lai sangkilo taponna lo'annu lanan zaitun maola'a sasamba ia'imbe, wuṛṛu mal᷊oara ahewabbal᷊anne lanan zaitun.

²²I tou lai ṛinone mangapiddu darua manu'a merpati saṛṛen tumuwo ara'e bakiangnga saṛṛen tumuwo; sambau maola'a sasamba ipangampunga rosa wuṛṛu sambau lai maola'a sasamba itattambunna.

²³Anambon sasamba udde ṛinone iapiddi tou ringannu imam su saruannu ngaran Dasanna MAWU su allo aual᷊une lal᷊aghun pamamaresi watanganne.

²⁴Imam nanganu ana'u domba wuṛṛu lanan zaitun udde wuṛṛu nionggola maola'a sasamba iatoggokka su MAWU, wuṛṛu udde maola'a wageangngu imam.

²⁵Ana see imam ṛinone mamototta ana'u domba udde ana see addio'a daṛṛane iwuṛṛa su tal᷊inga aikkatanna, inangngu tal᷊imaddo aikkatanna wuṛṛu inangngu tal᷊imaddon ledda aikkatannu taumata apan sarun iapasingkatta waresi.

²⁶Imam ṛinone mallal᷊innu addio'a lana su pal᷊addu limane aiṛṛi

²⁷wuṛṛu ringannu tal᷊imaddon lima aikkatanne i tou mangalassu lana udde paapitu sulal᷊ummu Rasanna MAWU.

²⁸Ana see addio'a lana apan su limane ṛinone iwuṛṛa su manga tampa apan buatte niwuṛṛannu daṛṛa, eteudde su tal᷊inga aikkatanna, inangngu tal᷊imaddo lima aikkatanna wuṛṛu inangngu tal᷊imaddon ledda aikkatannu taumata apan sarun iapasingkatta waresite.

²⁹Lana lambene ṛinone ilal᷊inna su puan taumata udde maola'a lal᷊aghun pamamaresi watanganne su saruannu MAWU.

³⁰Wua'udde imam ṛinone mangonggolu sambau manu'a merpati wuṛṛu bakiangnga saṛṛen tumuwo

³¹maola'a sasamba ipangampungnga rosa, wuṛṛu sambau waine maola'a sasamba itattambunna suadio'a sasamba ia'imbene. Ringannu aroddi imam na'ola'a lal᷊aghun pamamaresi taumata udde su saruannu MAWU.

³²Eteudde atoranna su ola'u lal᷊aghun pamamaresi napawe buatte namendamma radda'a pisi apan ma'ata'utta su taumata apan tawe addapanne.

³³MAWU nangonggola si Musa wuṛṛu si Harun

³⁴manga atoranna su ola'u wal᷊en apan nial᷊iuannu ṛenessa apan lullewa. Manga atoranna niapaamatta napawe walahannu Israel sumuttate su Kanaan, wanua apan nionggolu MAWU si mangitou.

³⁵Isai-sai apan naasangkalla ṛenessa sulal᷊ummu wal᷊ene, ṛinone mamasingkattu olangnge udde su imam.

³⁶Tantal᷊anna imam taambe nirumanta mamarikissa ṛenessa udde, i tou ṛinone mamarenta tadea'u sarangkanambone iapasabbangnga wuassu wal᷊en udde. Amungkangngu tawe, al᷊awo'u saranapa sulal᷊ummu wal᷊en udde mabbal᷊i ma'arantinna. Ana see imam ṛinone rumanta

³⁷mamarikissa ṛenessa udde. Amungkangngu pia titi'a ua'elomma ara'e uaṛṛamutta apan aellehanna ere ola'u nalinna su darandungnga,

³⁸imam ṛinone manantangngu wal᷊en udde wuṛṛu iwala uapal᷊e al᷊annune pitu allo.

³⁹Su allo appitune i tou ṛinone rumanta wuṛṛu mamarikissa apia. Amungkangngu ṛenessa udde tawe nilumewa,

⁴⁰i tou ṛinone mamarenta tadea'u manga watun darandunga apan naṛṛenessa udde ihohakka wuṛṛu darandunga wageangngu lal᷊umme iisanna. Plesterene asan nii'issa wuṛṛu manga watu udde ṛinone iramme su sambau tampa apan ma'arantinna su liudde soa.

⁴¹

⁴²Ana see manga watu apan niapasabbangnga udde ṛinone hantiannu manga watu wakku. Ahewallu darandungngu wal᷊en udde ṛinone pilesteranna wakku.

⁴³Amungkangngu ṛenessa udde nilumapputa apia, sumbal᷊i watu manga wal᷊en udde buatte nihantianna wuṛṛu manga darandunge buatte nii'issa wuṛṛu nipilestere apia,

⁴⁴ne imam ṛinone rumanta wuṛṛu mamarikissa wal᷊en udde apia. Amungkangngu ṛenessa udde atonna nilumewa, ne wal᷊en udde ma'arantinna

⁴⁵wuṛṛu ṛinone ihohakka. Manga watu, manga alu wuṛṛu ahewallu pilestere ṛinone iapidda watukku tampa ma'arantinna su liuddu soa.

⁴⁶Sal᷊immurine isai-sai apan sumutta sulal᷊ummu wal᷊en udde mabbal᷊i ma'arantinna maddatingngu matannallo umatuppa.

⁴⁷Isai-sai apan matiilla ara'e umanna su wal᷊en udde ṛinone mabbasansalla laungnge.

⁴⁸Arawe amungkangngu imam rumanta wuṛṛu tumuṛṛuttu parikissi tou tawe nilumatto ṛenessa apia napawe wal᷊en udde buatte nipilestere apia, i tou ṛinone mamasingkatta wal᷊en udde waresi, ana waugu ṛenessa sarangkanambone nawul᷊ite.

⁴⁹Su ipamaresi wal᷊en, imam ṛinone manganu darua manu'u winalanganna, alu cemara, tal᷊i maṛṛamu wuṛṛu sandanna hisop.

⁵⁰Manu'u winalanganna sambau ṛinone pototanna su urinna lal᷊oṛṛoannu ua'e wakku wuassu al᷊imatan kua'e.

⁵¹Ana see alu cemara, tal᷊i maṛṛamu, hisop wuṛṛu manu'u winalanganna apan ta'e wiakka ṛinone iammo sulal᷊ummu daṛṛan manu'u winalanganna apan buatte nipototta wuṛṛu sulal᷊ummu ua'e wakku. Wua'udde wal᷊en udde ṛinone wokkanna paapitu.

⁵²Manu'u winalanganna apan ta'e wiakka ṛinone ipallossa su wadda'a su liuddu soa. Ringannu aroddi imam na'ola'a lal᷊aghun pamamaresi wal᷊en, wuṛṛu wal᷊en udde nabbal᷊ite waresi.

⁵³

⁵⁴Eteudde manga atoranna su ola'u radda'u pisi apan ma'ata'utta,

⁵⁵su ola'u manga akke, pinsulla ara'e attiawu ara'e hanne su wadangnge, wuṛṛu su ola'u ṛenessa su laubba ara'e su wal᷊en.

⁵⁶

⁵⁷Manga atoranna udde hunane ipanantunna tanne saranapa udde waresi ara'e ma'arantinna.