Read Talaud IMAMATTA 18 Bible Online

IMAMATTA 18 - Talaud bible

IMAMATTA 18

¹MAWU nandolokki Musa

²niapapasingkatta su walahannu Israel parenta indi, “Ete i Ya'u Ruatanu.

³Imbaṛṛangnga mattanno inolaannu taumatan Mesir, su tampa i yamiu buatte natana'a, ara'e taumatan Kanaan, watukku apa orassa indi Ya'u mangapiddi yamiu.

⁴Paatuṛṛutte su manga tita-U wuṛṛu daringiṛṛete sarangkanambone apan Ta'u iparenta. Ete i Ya'u Ruatanu.

⁵Paatuṛṛutte manga atoranna wuṛṛu manga tita apan Ta'u nionggola si yamiu. Amungkangngu i yamiu na'ola'a aroddi, wiakku masal᷊amatta. Ete i Ya'u MAWU.”

⁶MAWU nangonggolu manga atoranna indi. Imbaṛṛangnga matatamba ringannu sangkatou suwallatu tuṛṛangngu.

⁷Imbaṛṛangnga matatamban inangngu, awingngu iamangngu, ana waugu udde tatahuanne iamangngu.

⁸Imbaṛṛangnga mallobbosa iamangngu ringannu matatamba sangkatou suwallatu awingnge waine.

⁹Imbaṛṛangnga matatamba tuṛṛangngu wawine ara'e tuṛṛangngu uata'a, mawae ete nipadul᷊iananna sambal᷊eanna ringannu ara'e lai nahewalla su wal᷊en waine.

¹⁰Imbaṛṛangnga matatamban pulunnu; udde sarun mamansili watangannu sassane.

¹¹Imbaṛṛangnga matatamban bawinenu apan uapapaṛṛala inangnga ara'e inangnga sambau wuṛṛu uapapaṛṛalan iamangnga, ana waugu i tou tuṛṛangngu lai.

¹²Imbaṛṛangnga matatamba tantanu, mawae ete i tou tuṛṛangngu iamangngu ara'e tuṛṛangngu inangngu.

¹⁴Imbaṛṛangnga matatamba awingngu tuṛṛangngu iamangngu, ana waugu i tou tantanu lai.

¹⁵Imbaṛṛangnga matatamba mananambonu ara'e ringannu awingngu iamangngu.

¹⁶Imbaṛṛangnga matatamba ana'a ara'e pulunnu sangkatou wawine apan buatte nipaggaweannu. Asinungka i mangitou hawenu, wuṛṛu udde pallal᷊aghu apan tawe su ṛinone.

¹⁸Imbaṛṛangnga ma'awingngu tuṛṛangngu sawanu tantal᷊anna sawanu sassane ta'e wiakka.

¹⁹Imbaṛṛangnga matatamba bawine tantal᷊anna i tou pia radda'u wawine, ana waugu i tou sulal᷊ummu ararantinna.

²⁰Imbaṛṛangnga matatamba awingngu waine; inolaanna udde ma'aola'a si'o iya'arantinna.

²¹Imbaṛṛangnga manantillu wuassu sangkatou anangngu olaanna sasamba ipassubba si Molokh, ana waugu pallal᷊aghu udde mallobbossa arannu Ruata, MAWUnu.

²²Imbaṛṛangnga esakka matatamba rundussa esakka; Ruata maddantinnu inolaanna udde.

²³Esakka ara'e wawine, imbaṛṛangnga matatamba binatangnga; pallal᷊aghu lal᷊eo udde naarosa si yamiu.

²⁴Arie watangannu ma'ola'a paddarosa ringannu manga inolaanna udde, ana waugu ringannu olangnge udde manga walahanna apan uatana'a su Kanaan tantal᷊anna i yamiu taambe, buatte nanggalusa'a wadangngi mangitou. Ana waugu udde i mangitou nilimbuaṛṛannu MAWU, tadea'u i yamiu wotongnge mamanua su wanua udde.

²⁵I mangitou buatte na'ola'a al᷊awo'u pallal᷊aghu apan ma'arantinna udde, na'oman sara leta'i mangitou lai nabbal᷊i ma'arantinna. Ne MAWU nakkuumanni mangitou wuṛṛu tawe namalan mangitou matana'a poiaroddi. Arawe i yamiu imbaṛṛangnga ma'ola'a manga pallal᷊aghu udde. I yamiu sarangkanambone, taumatan Israel wuṛṛu taumata raho apan uatana'a suadio'a ringanni yamiu, ṛinone tumuṛṛutta atoranna wuṛṛu parentan MAWU,

²⁸tadea'u i yamiu tawe iṛṛuumanni tou wuṛṛu limbuaṛṛanna wuassu leta'a udde ere manga taumata apan tawe maaillal᷊a MAWU apan uatana'a poiaroddi ro'en i yamiu taambe nirumanta.

²⁹I yamiu masingkatta manungku isai-sai apan ma'ola'a inolaanna apan ma'arantinna udde tate lai mareengnga al᷊aṛṛana'u Ruata.

³⁰Ne MAWU nabbisara, “Paatuṛṛutte su manga atoranna apan Ta'u nionggola wuṛṛu imbaṛṛangnga mattanno inolaannu manga taumata uatana'a su leta'u Kanaan tantal᷊anna i yamiu taambe nirumanta. Imbaṛṛangnga i yamiu mandal᷊eo watanganni yamiu sassane ringannu ma'ola'a manga pallal᷊aghu udde. I Ya'u Ruatanu.”