Read Talaud IMAMATTA 19 Bible Online

IMAMATTA 19 - Talaud bible

IMAMATTA 19

¹MAWU nandolokki Musa

²mamasingkatta su walahannu Israel parenta indi, “Ṛinone i yamiu susi, ana waugu i Ya'u Ruatanu uddewe susi.

³Suapan taumata ṛinone mangaddata iamangnge wuṛṛu inangnge wuṛṛu maddamean alloun Sabat ere buatte Ta'u nirolokka. Ete i Ya'u Ruatanu.

⁴Imbaṛṛangnga massubba monganna. Imbaṛṛangnga ma'ola'a paal᷊uanna wuassu atta'a wuṛṛu massubba si tou. Ete i Ya'u Ruatanu.

⁵Amungkangngu i yamiu mangonggolu binatangnga maola'a sasamban paddarame, tuṛṛutte manga atoranna apan Ta'u ionggola, tadea'u sasamba udde Ta'u sengkamanna.

⁶Ṛemenne ṛinone inasanna su allon binatangnga udde pototanna ara'e su allo tiṛṛabine. Ṛemessa apan nallambe su allo atallune ṛinone tutunganna abbi,

⁷ana waugu ṛemessa udde palli. Amungkangngu ṛemessa udde inasanna lai, sasamba udde tawe Ta'u sengkamanna.

⁸Isai-sai uminassa ṛemessa udde nassal᷊a ana waugu tawe mangaregan saranapa apan niṛṛae si Ya'u. Taumata udde tate mareengnga al᷊aṛṛana'-U.

⁹Amungkangngu i yamiu mangitingnga, imbaṛṛangnga mamototta gandumma apan uatuwo su winggin bawail᷊annu, wuṛṛu arie pabbelengnga mangammullu gandumma apan nallambe su pangitinganna.

¹⁰Imbaṛṛangnga mabelengnga su waillu anggore ana inai mangammulu manga wuan anggore apan natantangnga napawe i yamiu wua nani'o wuane pa'arorone. Wuṛṛu lai manga wuane apan nanawote arie pappurutta. Wala'e udde wuattu taumata asiangnga wuṛṛu taumata raho. Ete i Ya'u Ruatanu.

¹¹Imbaṛṛangnga manna'o, mallinga ara'e mangawusu.

¹²Imbaṛṛangnga ma'ire ringannu arang-Ku amungkangngu i yamiu tawe maatipussa pa'aire udde, ana waugu ringannu udde mallobbossa arang-Ku. Ete i Ya'u Ruatanu.

¹³Imbaṛṛangnga mangallangnga sansul᷊ungngu ara'e mangaṛṛo saranapane. Lalantaku sangkatou apan mammanara ringannu arie pattaṛṛange, salaiwe tumba'u saṛṛabbi.

¹⁴Imbaṛṛangnga mamontoga taumata wengella wuṛṛu arie mantaingngu watu su saruannu taumata wuta. Ṛinone i yamiu maaddatta si Ya'u wuṛṛu matta'u-U, ana waugu ete i Ya'u Ruatanu.

¹⁵I yamiu ṛinone matul᷊idda napawe makkuungnga; arie mangempen taumata asiangnga wuṛṛu mata'uttu taumata ala.

¹⁶Imbaṛṛangnga manal᷊iawukku hahelo suwallatu sambalahannu, tadea'u i yamiu tawe maapate taumata sansul᷊ungngu. Ete i Ya'u MAWU.

¹⁷Imbaṛṛangnga mangune su saruanni sai-sai. Insuete pabbawawul᷊onu ringannu al᷊awo'u taumata, tadea'u i yamiu tawe marosa ana waugu taumata waine.

¹⁸Imbaṛṛangnga mabbal᷊issa a'une wuṛṛu maddantinnu taumata waine, arawe pandangngute sansul᷊ungngu ere lai yamiu mandangngu watangannu sassane. Ete i Ya'u MAWU.

¹⁹Paatuṛṛutte su manga parenta-U. Imbaṛṛangnga mangawingngu binatangnga apan uapapaṛṛalan walahanne. Imbaṛṛangnga massuannu darua lihiddu wualanna su sambau leta'a. Imbaṛṛangnga malluṛṛen laubba apan niraddu'a wuassu darua hatin bananna.

²⁰Amungkangngu pia sangkatou esakka naddiandi sarun mabbal᷊u'u allangnge wawine udde su esakka waine maola'a sawane aruane, wuṛṛu taumata apan ma'apulu mamalli allangnga udde taambe namaekka, ana see tatahuanne apan paarorone natatamba allangnga udde, itarua ṛinone iṛṛuumanna, arawe tawe wotongnge pateanna, ana waugu salaiwe ereapa wawine udde ta'e allangnge.

²¹Esakka udde ṛinone mangapiddu sambau domba esakka su saruannu ngaran Dasang-Ku maola'a sasamba lal᷊anna'a arugianna.

²²Imam ṛinone mangonggolu domba udde sulal᷊ummu lal᷊aghun pamamaresi, tadea'u rosan taumata udde ampunganna. Ne i Ya'u, Ruata sarun mangampungnga si tou.

²³Napawe i yamiu sinumuttate su wanua Kanaan wuṛṛu massuannu al᷊awo'u hatin aaluanna mabbua poiaroddi, ne al᷊annune tallu tonna paarorone manga wuane ipappalli kamiu wuṛṛu imbaṛṛangnga annananni yamiu.

²⁴Su tonna aiappane wuane sarangkanambone ionggola sasainaba tadea'u mapal᷊iatta'u aadiangkamannu si Ya'u, MAWU.

²⁵Su tonna al᷊imane wakkute udde i yamiu wotongnge umanna wuane. Amungkangngu i yamiu mappaamattu anambon atoranna udde, manga aaluanna pia buane sarun mabbua lembon anamboanne lai. Ete i Ya'u Ruatanu.

²⁶Imbaṛṛangnga ma'inumma daṛṛa. Imbaṛṛangnga mappaattu manga wal᷊i'immata.

²⁷Imbaṛṛangnga mamol᷊o uta'a su sandiṛṛannu puanu ara'e mangiṛṛi omengngu.

²⁸Imbaṛṛangnga makkunta'a pisinu ipa'ola'a manga tatiala ara'e ipallessa watangannu ma'ola'a tatiala lullal᷊o su taumata nate. Ete i Ya'u MAWU.

²⁹Imbaṛṛangnga mangadio'a manga anangngu wawine ringannu ma'ola'a si mangitou sussandaga su kuil. Ringannu ma'ola'a aroddi yamiu nandal᷊eo arannu wanuanu, wuṛṛu manga inolaanna apan tawe matataṛṛino sarun manambo isudde.

³⁰Ramea'e allon Sabat wuṛṛu pangaddate tampa apan niṛṛae ipassubba si Ya'u. Ete i Ya'u MAWU.

³¹Imbaṛṛangnga i yamiu maddorongnga tatantiro su tonaassa apan pia paa'ukke ringannu manga niawan taumata nate. Amungkangngu i yamiu ma'ola'a udde i yamiu mabbal᷊i ma'arantinna. Ete i Ya'u Ruatanu.

³²Arega'a wuṛṛu aaddate manga timmade. Rinone i yamiu maaddata wuṛṛu matta'u-U, ana waugu ete i Ya'u MAWU.

³³Imbaṛṛangnga ma'inolaanna lal᷊eo su taumata raho apan uatana'a su wanuanu.

³⁴Ola'ewe i mangitou ere lai yamiu ma'ola'a manga taumata sambalahannu wuṛṛu pandangngute si mangitou ere lai yamiu mandangngu watangannu sassane. Paanaunge manungku i yamiu lai buatte nabbiakka ere taumata raho su Mesir. Ete i Ya'u Ruatanu.

³⁵Imbaṛṛangnga mamahia taumata waine ringannu mappaattu aul᷊aanna, timbanganna ara'e aul᷊aanna awusu.

³⁶Pappa'ate meteranna, timbanganna wuṛṛu aul᷊aanna apan atonna. Ete i Ya'u Ruatanu, wuṛṛu i Ya'u buatte nangapiddi yamiu sinumabbangnga wuassu Mesir.

³⁷Paatuṛṛutte su manga tita wuṛṛu parenta-U. Ete i Ya'u MAWU.”