Read Talaud IMAMATTA 20 Bible Online

IMAMATTA 20 - Talaud bible

IMAMATTA 20

¹MAWU nandolokki Musa

²mabbol᷊on olangnge indi su taumatan Israel, “Suapan taumata suwallati yamiu ara'e taumata raho apan uatana'a su wallati yamiu apan nangonggolu anangnge si Molokh, ṛinone anambon tumanangnge manuntungngu watu si tou.

³Taumata apan nangonggolu sasamba anangnge si Molokh, napaarantinnu Rasang-Ku wuṛṛu mallobbossa arang-Ku apan susi. I tou sarun Ta'u iṛṛuumanna wuṛṛu tate lai mareengnga al᷊aṛṛana-U.

⁴Amungkangngu tumana'u soa nanutubbu mata su inolaannu taumata udde wuṛṛu tawe mapaamattu ṛuumanna pateanna su taumata udde,

⁵ne i Ya'u sassane apan sarun makkuumanni tou, anambon amonanne, see lai anambon taumata suadio'a ringanni tou nanantang-Ku wuṛṛu nassubba si Molokh. I mangitou tate lai mareengnga al᷊aṛṛana-U.

⁶Taumata apan inai maddorongnga tatantiro su tonaassa apan pia paaukka ringannu ṛimuuddu taumata nate sarun Ta'u iṛṛuumanna wuṛṛu tate lai mareengnga al᷊aṛṛana-U.

⁷Paatehamma tadea'u i yamiu sidutu susi, ana waugu i Ya'u Ruatanu.

⁸Paatuṛṛutte manga tita-U, ana waugu ete i Ya'u MAWU apan naṛṛae kamiu huna-U.”

⁹MAWU nangonggolu manga atoranna indi, “Taumata apan mammontoga iamangnge ara'e inangnge ṛinone iṛṛuumanna pateanna. I tou nate ana waugu sal᷊ane sassane.

¹⁰Amungkangngu sangkatou Israel sinumandaga ringannu awingngu taumata sambalahanne, i tou wuṛṛu wawine udde ṛinone iṛṛuumanna pateanna.

¹¹Sangkatou esakka apan natatamba ringannu sangkatou awingngu iamangnge, nangaṛṛo pussa'an hakku iamangnge. Esakka wuṛṛu wawine udde ṛinone iṛṛuumanna pateanna. Itarua nate ana waugu pasasalan tarua sassane.

¹²Amungkangngu sangkatou esakka nattamba mananambone wawine, taumata darua udde iṛṛuummanna pateanna. Itarua buatte sinumandaga, wuṛṛu nate ana waugu pasasalan tarua sassane.

¹³Amungkangngu sangkatou esakka natatamba rundussa esakka, itarua na'ola'a pallal᷊aghu apan dal᷊eo wuṛṛu ma'asili, wuṛṛu itarua ṛinone iṛṛuumanna pateanna. Itarua nate ana waugu pasasalan tarua sassane.

¹⁴Amungkangngu sangkatou esakka na'awingngu sangkatou wawine see lai inangngu wawine udde, i mangitou tallu ṛinone itambunna ma'oman sara mate, ana i mangitou na'ola'a pallal᷊aghu apan tawe matataṛṛino. Inolaanna ereudde tawe wotongnge pia su wallati yamiu.

¹⁵Amungkangngu sangkatou esakka natatamba binatangnga, taumata wuṛṛu winatangnga udde ṛinone pateanna.

¹⁶Amungkangngu sangkatou wawine natatamba binatangnga, wawine wuṛṛu winatangnga udde ṛinone pateanna. I mangitou nate ana waugu pasasalan mangitou sassane.

¹⁷Amungkangngu sangkatou esakka natatambam tuṛṛangnge wawine ara'e ringannu tuṛṛangnge apan iamangnga sambau inangnga waine ara'e inangnga sambau iamangnga waine, itarua tate lai mareengnga al᷊aṛṛana-U. I mangitou buatte na'ola'a inolaanna apan tawe su ṛinone wuṛṛu ṛinone mamasanna pangillul᷊eanne.

¹⁸Amungkangngu sangkatou esakka natatamba sangkatou wawine apan pia radda'u wawine, itarua tate lai mareengnga wageangu al᷊aṛana-U.

¹⁹Amungkangu sangkatou esakka natatamba tuṛangu inangnge, itarua ṛinone mamasanna illul᷊eannu inolaanna udde.

²⁰Amungkangu sangkatou esakka natatamba awingngu tuṛṛangngu iamange, i tou nallobossa tuṛṛangngu iamange. Esakka wuṛṛu wawine udde ṛinone mamasanna ṛuumanne. Ma'oman sara mate itarua tawe maasomba ana'a.

²¹Amungkangu sangkatou esakka nangaṛo awingu tuṛṛangnge, i tou nallobossa tuṛṛangnge wuṛṛu na'ola'a inolaana apan tawe matataṛino. Ma'oman sara mate itarua tawe maasomba ana'a.”

²²MAWU nabbisara, “Paatuṛute su anambon tita wuṛṛu parenta-U, tadea'u i yamiu tawe limbuaṛṛana wuassu wanua Kanaan, suapa i Ya'u sarun mangapiddi yamiu.

²³Imbaṛṛangnga mattanno inanaramannu walahanna apan uatana'a poiaroddi. I mangitou ma'arantinna si Ya'u ringannu al᷊awo'u inolaanna apan dal᷊eo. Ana waugu i mangitou Ta'u nilimbuaṛṛana, tadea'u i yamiu wotongnge maasutta su wanua udde.

²⁴Leta'a apan ala wuṛṛu masuwukka udde buatte Ta'u pina'ire si yamiu, nariaddi Ta'u ionggola maola'a pussaanu. Ete i Ya'u Ruatanu apan naṛṛae kamiu wuassu manga walahanna waine.

²⁵Ana waugu udde i yamiu wotonge ma'ellega suapane winatanga ipappalli wuṛṛu suapane winatanga tawe ipappalli. Arie pa'inassa winatanga apan ipappalli. Winatanga udde Ta'u isago palli, nariaddi amungkangngu inasanna i yamiu mabbal᷊i marosa.

²⁶I yamiu Ta'u iṛae wuassu manga walahanna waine tadea'u mabbal᷊i pussa'a-U. I yamiu ṛinone susi ana waugu ete i Ya'u MAWU, wuṛṛu i Ya'u susi.

²⁷Suapan taumata esakka ara'e wawine apan ma'ola'a pa'a'aukka ringannu manga ghaṛṛahon taumata nate ṛinone tuntungannu watu ma'oman sara mate. Taumata udde nate ana waugu sal᷊ane sassane.”