Read Talaud IMAMATTA 23 Bible Online

IMAMATTA 23 - Talaud bible

IMAMATTA 23

¹MAWU nangonggola si Musa

²manga atoranna su ola'u ramean agama, apan ṛinone iapasingkatta maola'a allo wahewa ipattaṛṛamaawu.

³Pia annummu allo ipammanara, arawe allo appitune, allon Sabat, eteudde allo pangillol᷊oanna apan niṛṛaen MAWU. Su allo udde ṛinone i yamiu ma'ola'a ammul᷊annu patataṛṛamawu wuṛṛu imbaṛṛangnga mammanara.

⁴Eteindi manga allo wahewalla apan nitantunnu MAWU wuṛṛu ṛinone ial᷊iata su tempo apan buatte nitantunna.

⁵Allo Wahewan Paskah apan iramea ipangaddatta MAWU, manattakka wuassu tempo matannallo umattuppa su allo appul᷊one appata wul᷊anna paarorone.

⁶Tiṛṛabbine, allo apul᷊o l᷊imane, manattakke Ramean Doti tawe Ragine, wuṛṛu al᷊annune pitu allo i yamiu tawe wotongnge umanna roti apan niaola'a napaattu ragi.

⁷Al᷊annune pitu allo udde i yamiu ṛinone mangonggolu sasamba anna su MAWU. Su allo paarorone wuṛṛu appitune wuassu ramea udde i yamiu ṛinone ma'amullu patataṛṛamawu wuṛṛu imbaṛṛangnga mamanara manara mawakkata.

⁹Amungkangngu i yamiu na'omate su wanua apan nionggolu MAWU si yamiu, wuṛṛu mangngammulu hessin leta'a, hessin gandumma apan niitingngi yamiu paaororne ṛinone iapidda ringannu imam.

¹¹Su allo al᷊al᷊iuddu allon Sabat, imam ṛinone mangonggolu gandumma udde maola'a sasamba iatogokka su MAWU, tadea'u MAWU mal᷊uassa si'o.

¹²Su allo i yamiu mangonggolu gandumma udde, i yamiu ṛinone mangonggolu lai sasamba itattambunna sambau ana'u domba esakka uukke santonna wuṛṛu tawe sangkulle.

¹³Su sasamba anna onggol᷊a'e rua kilo taponna lal᷊o'annu lanan zaitun. Hal᷊urun sasamba udde ma'al᷊uassa naungngu MAWU. Suadio'a ringannu udde onggol᷊a'a lai sanlitere ua'en anggore.

¹⁴Tantal᷊anna taambe nangapiddu sasamba udde su MAWU, i yamiu tawe wotongnge umanna saran kadio'a wuassu gandumma wakku udde, mawae tae tata, nipangganga ara'e nilol᷊o maola'a roti. Atoranna udde ṛinone tuṛṛutannu anambon papapulunnu saran mal᷊annu-l᷊annu.

¹⁵Manattakka wuassu allo napawe Sabat nal᷊iudda, su tempo i yamiu mangonggolu sasamba su MAWU hessin gandumma paarorone, i yamiu ṛinone mandeengngu pitun kamisa tuudda.

¹⁶Su allo al᷊iman pul᷊one, eteudde allo appitune napawe Sabat nal᷊iudda, i yamiu ṛinone mangapiddu sasamba ia'imbe su MAWU.

¹⁷Suapan amonanna ṛinone mangonggolu ruan bau roti maola'a sasamba itattogokka su MAWU. Suapan roti ṛinone olaanna wuassu rua kilo taponna al᷊ussa lo'annu ragi wuṛṛu ṛinone itantilla su MAWU maola'a sasamba hessin leta'a paarorone.

¹⁸Suadio'a ringannu roti udde walahannu Israel ṛinone mangonggolu pitu ana'u domba uukke santonna, sambau sapi esakka saṛṛen tumuwo wuṛṛu darua ambinga. Sambau-sambau tawe wotongnge pia sangkulle wuṛṛu ṛinone ionggola maola'a sasamba itattambunna su MAWU, ringannu sasamba ia'imbe wuṛṛu sasamba ua'e anggore. Hal᷊urun sasamba udde maal᷊uassa naungngu MAWU.

¹⁹Pangonggola lai ambinga esakka sambau maola'a sasamba ipangampunga rosa wuṛṛu darua domba esakka uukke santonna maola'a sasamban paddarame.

²⁰Roti wuṛṛu darua ana'u domba udde ṛinone ionggolu imam maola'a sasamba iatogokka su MAWU, wuṛṛu udde maola'a wageangngu imam. Manga sasamba udde susi.

²¹Su allo udde i yamiu ṛinone ma'ola'a ammul᷊annu patataṛṛamawu wuṛṛu tawe wotongnge mammanara mawakkata. Atoranna indi ṛinone tattuṛṛutannu papapulunnu saran mal᷊annu-l᷊annu, su al᷊awo'u tampa i mangitou uatana'a.

²²Amungkangngu i yamiu mangitingnga, arie mamototta gandumma apan uatuwo su lul᷊unnu wawail᷊annu wuṛṛu imbaṛṛangnga mabelengnga mangammulu gandumma lambene wua pinangitinganna. Wala'e udde su taumata asiangnga wuṛṛu taumata raho. MAWU eteudde Ruatanu.

²³Su allo paarorone wul᷊anna appitune ṛinone iramea maola'a sambau allo pangillol᷊oanna. Allo udde tialannu tingikku trompetta, wuṛṛu i yamiu ṛinone ma'ola'a ammul᷊anne patataṛṛamawu.

²⁵Pangonggole sasamba anna su MAWU wuṛṛu arie mammanara mawakkata su allo udde.

²⁶Allo appul᷊one wul᷊anna appitune eteudde allo lal᷊aghun santonna pangangampunganna rosan balahannu Israel. Su allo udde i yamiu ṛinone mappuasa wuṛṛu ma'ola'a ammul᷊annu patataṛṛamawu apiddu mangapiddu sasamba ana su MAWU.

²⁸Arie pammanara, ana waugu allo udde allo pangampunganna rosa, tadea'u i yamiu maasomba aampungnga su saruannu Ruatanu.

²⁹Isai-sai umanna sambau anna su allo udde, tate mareengnga al᷊aṛṛana'u Ruata.

³⁰Wuṛṛu isa-sai apan mammanara su allo udde, iṛṛuumannu MAWU sassane ringannu ṛuumanna pateanna.

³¹Atoranna indi matataṛṛino su anambon papal᷊unna su al᷊awo'u tampa i mangitou uatana'a.

³²Manattakka wuassu matannallo umattuppa su allo assione wul᷊anna udde maddatingngu matannallo umatuppa su allo appul᷊one, i yamiu ṛinone maddamean allon Sabat, allo apan niṛṛae pangillol᷊oanna. Su alo'engngu allo udde i yamiu ṛinone mappuasa.

³³Sawakku Rasannu Rongnga manattakka wuassu allo mapul᷊o l᷊ima wul᷊anna appitune wuṛṛu al᷊annune pitu allo.

³⁵Su al᷊annune pitu allo udde, miallo-miallo i yamiu ṛinone mangonggolu sasamba anna. Su allo paarorone wuṛṛu aual᷊une i yamiu ṛinone ma'ola'a ammul᷊annu patataṛṛamawu wuṛṛu mangonggolu sasamba anna su MAWU. Arie mammanara mawakkatta su allo udde.

³⁷Eteudde manga allo ramean agama apan nitantunnu MAWU wuṛṛu ṛinone iapasingkatti yamiu. Su manga ramea udde i yamiu ṛinone mangaddatta MAWU ringannu ma'ola'a ammul᷊annu patataṛṛamawu wuṛṛu mangonggolu sasamba anna, sasamba iattambunna sasamba ia'imbe, sasamba winatangnga wuṛṛu sasamba ua'e anggore, anambone apan pappandumanna su miallo-miallo.

³⁸Manga ramea udde tatambane manga su allon Sabat wiasa, nariaddi manga sasamba udde eteudde lai tatambane aonggola wiasa, su sasambanu ipanubbussa riandi, ara'e sasamba tawe iwata'a apan ionggoli i yamiu su MAWU.

³⁹Napawe buatte nangitingnga, manattakka allo appul᷊one lima wul᷊anna appitune, i yamiu ṛinone ma'ola'a ramea al᷊annune pitu allo. Allo paarorone wuṛṛu allo aual᷊une eteudde allo apan niṛṛae pangillol᷊oanna.

⁴⁰Su allo paarorone i yamiu ṛinone mani'o manga wuan kalu apan apianne wuassu wawail᷊annu, wuṛṛu lai manga rongngu palma wuṛṛu manga rannane wuassu manga punnu alu apan rongngane uasaṛṛihalo arae masaṛṛimbuwune, ana see manattakke ramean lal᷊uassa ipangaddata Ruatanu.

⁴¹Ramea udde ṛinone olaanni yamiu al᷊annune pitu allo. Atoranna udde ṛinone tuṛṛutannu papapulunnu saran mal᷊annu-l᷊annu.

⁴²Pitu allo al᷊annune anambon balahannu Israel ṛinone matana'a su manga rasanna rongnga,

⁴³tadea'u papapulunnu maasingkatta manungku MAWU nandolokku walahannu Israel matana'a sulal᷊ummu manga rasanna sambengessa, su tempo i Tou nangapiddi mangitou sinumabbangnga wuassu Mesir. Ete i Tou Ruatanu.

⁴⁴Etearoddi i Musa namasingkatta su walahannu Israel manga atorannu ramea ipangaddata MAWU.