Read Talaud IMAMATTA 26 Bible Online

IMAMATTA 26 - Talaud bible

IMAMATTA 26

¹MAWU nabbisara, “Imbaṛṛangnga ma'ola'a monganna ara'e mallanginnu paal᷊uanna ara'e diṛṛi watu apan niuitta ana see subbanna. Ete i Ya'u Ruatanu.

²Ramea'e manga allon Sabat wuṛṛu manga allo wahewan agama wuṛṛu pangaddate tampa apan niṛṛae passubbanna si Ya'u. Ete i Ya'u MAWU.

³Amungkangngu i yamiu mabbiakka tuttuṛṛuta manga tita-U wuṛṛu manga parenta-U,

⁴I Ya'u sarun manossokku uranna su tempone, ma'oman sara leta'a mangonggolu hessine wuṛṛu manga aaluanna mabbua.

⁵Hessin letangngu sarun lumambalanna, ma'oman sara napawe nia'omante tempone mani'o wuan kanggore, i yamiu ta'e mangngitingnga gandumma. Wuṛṛu napawe nia'omante tempone mangasi'u gandumma, i yamiu ta'e manni'o wuan anggore. I yamiu sarun pia anna apan hatimu wuṛṛu abbiakka su lal᷊umanna'a su wanuanu.

⁶I Ya'u sarun mallu'adda wanuanu ma'oman sara i yamiu wotongnge matiilla ringannu matammudda wuṛṛu tawe mata'utti sai-sai. Manga winatangnga mal᷊aṛṛaga sarun Ta'u iapaawul᷊i wuassu wanua udde, wuṛṛu tate lai pangalo su wanuanu.

⁷I yamiu sarun botongnge mamaddon manga seennu;

⁸ringannu siri lima i yamiu wotongnge mamaddon maṛṛasutta su atoune, wuṛṛu ringannu maṛṛasutta su atoune i yamiu wotongnge mamaddon mapul᷊o ṛiwu su atoune.

⁹I Ya'u sarun mangal᷊amatta si yamiu wuṛṛu mangonggolu ana'a pulunna apan manambo si yamiu. Apa apan buatte Ta'u pina'ire si yamiu, i Ya'u sarun mapaatipussa.

¹⁰Hessin letangngu sarun lumambalanna, na'oman sara wotongnge ipaatta sulal᷊ummu santonna. Ewe'e lai yamiu sarun mapaasabangngu lambem pangitinganna paarorone tadea'u pia tampa pangadoannu pangitinganna wakku.

¹¹I Ya'u sarun matana'a su wallati i yamiu sulal᷊ummu Rasang-Ku, wuṛṛu tawe manol᷊a'i yamiu.

¹²I Ya'u sarun marundinganna si yamiu; i Ya'u sarun maola'a Ruatanu wuṛṛu i yamiu mabbal᷊i al᷊aṛṛana-U.

¹³I Ya'u, Ruatanu, apan nangapiddi yamiu sinumabbangnga wuassu Mesir tadea'u i yamiu tawe mabbal᷊i allangnga apia. Taṛṛino apan uaumpisanna si yamiu buatte Ta'u nipaddi, wuṛṛu i yamiu Ta'u niola'a taumata apan napallosse.”

¹⁴MAWU nabbisara, “Amungkangngu i yamiu tawe maddaringikka si Ya'u wuṛṛu tawe tumuṛṛutta parenta-U,

¹⁵amungkangngu i yamiu lumawangnga pa'aire apan Ta'u niola'a ringanni yamiu wuṛṛu maddiri tumuṛṛutta manga ṛarawessa wuṛṛu manga titale,

¹⁶i yamiu sarun Ta'u iṛṛuumanna. I Ya'u sarun mandantan asasilaka si yamiu, radda'a wuṛṛu sal᷊iubba apan tawe ia'undamma, ma'oman sara matanu mabbal᷊i wuta wuṛṛu i yamiu mabbiakka sansara. I yamiu sarun mabbailla arawe tawe maal᷊ewa hessine, ana waugu manga seennu sarun dumanta mamaddon kamiu wuṛṛu manginsue sinuanannu.

¹⁷I yamiu sarun Ta'u iṛṛuumanna, na'oman sara i yamiu lawaddon manga seennu wuṛṛu paparentannu manga taumata maddantinnu. I yamiu mabbal᷊i lembon matta'utta na'oman sara i yamiu tumal᷊angnga, salaiwe taweddu.

¹⁸Napawe buatte naapendamma ṛuumanna udde ana see i yamiu lai taambe tumuṛutta si Ya'u, ṛuumannu sarun Ta'u tambanna paapitu lai anambone.

¹⁹I yamiu tumaniten mawunga, arawe i Ya'u sarun mapaol᷊obbi yamiu. Uranna sarun tawe mangansala, ma'oman sara letangu mabbal᷊i mamara wuṛṛu maatikka ere atta'a.

²⁰Anambon inasaharannu tawe gunane, ana waugu letangu tawe mangonggolu hessine wuṛṛu manga sasuannu sarun tawe mabbua.

²¹Amungkangu i yamiu lai ta'e sidutu lullawanga si Ya'u wuṛṛu maddiri tumuṛutta si Ya'u, ne ṛuumannu lai sarun Ta'u tambanna lai paapitu.

²²I Ya'u sarun mandantan manga winatanga mal᷊aṛaga su pattangnganni yamiu. Manga winatanga udde sarun tumambo manga anangu, mamate winatanga papadul᷊ianannu wuṛṛu mamate si yamiu, na'oman sara reengannu mabbal᷊i addio'a, wuṛṛu manga lal᷊anna su wanuanu mabbal᷊i mal᷊annaba.

²³Napawe buatte namendamma anambon ṛuumanna udde i yamiu lai taambe naddaringikka si Ya'u, arawe ta'e sidutu lullawanga si Ya'u,

²⁴ne i Ya'u sarun manggesekka wuṛṛu makkuumanni yamiu paapitu lai awakkane wuassu manga ṛuumanna apan nal᷊iu.

²⁵I Ya'u sarun mandantan pangalo su pattangngannu ipakkuumanni yamiu ana waugu i yamiu buatte nilumawanga pa'aire-U si yamiu. Wuṛṛu amungkangngu i yamiu ma'ammula su soanu maddea'a pattillummanna, i Ya'u sarun mandantan radda'a apan tawe iapapia, na'oman sara i yamiu sarun manantilu watangannu su seennu.

²⁶I yamiu sarun asueannu anna, na'oman sara siri mapul᷊o bawine tumba'u mappanduma sambau pallol᷊oanna ipallol᷊o roti apan pia si mangitou. Anna udde sarun tahianna, wuṛṛu napawe i yamiu buatte niumanna, i yamiu lai ta'e maapendamma lunussa.

²⁷Amungkangu buatte naapendamma ṛuumanna udde sarangkanambone i yamiu ta'e lai sidutu lullawanga si Ya'u wuṛṛu maddiri tumuṛutta si Ya'u,

²⁸wuṛṛu ringannu massa'u i Ya'u sarun manggesekka si yamiu, wuṛṛu makkuumanni yamiu paapitu mabbakatanna wuassu ṛuumanna nanangkal᷊iu.

²⁹I yamiu sarun amal᷊unusanna, na'oman sara uminassa manga anangu sassane.

³⁰I Ya'u sarun makkimunsa'a manga tampa patataṛamawuanu su wowon manga wuidda, manggohakku manga mezbahnu tampa panutunganna amania, wuṛṛu mallombo manga winal᷊unannu su manga mongannu apan naṛaate udde. Ringannu maddantinna

³¹manga soanu sarun Ta'u wal᷊uanna mabbal᷊i tuidda, manga tampa patataṛamawuannu Ta'u ṛimunsaanna wuṛṛu manga sasambanu tawe Ta'u seengkamanna.

³²Wanuanu sarun Ta'u ṛimunsaanna atonna, na'oman sara manga seetta apan matana'a ṛumindu'a maasilo ahewallu asasilaka udde.

³³I Ya'u sarun mandantan papangalo su wanuanu wuṛṛu manal᷊iawukki yamiu su manga wanua waine. Manga wawail᷊annu tate lu'aranna, wuṛṛu manga soanu niwalate naola'a tuidda.

³⁴Sutempo udde tantal᷊anna i yamiu ta'e sulal᷊ummu tampan pamuanganna su wanua manga seennu, letangu apan tawe niapaillol᷊onu sutempo i yamiu uatana'a isude, sarun tawe paddul᷊iananna wuṛṛu maasomba tempone mangillol᷊o.

³⁵

³⁶Manga taumatanu apan uatana'a sulal᷊ummu pamuanganna su wanua waine, sarun Ta'u olaanna tumaniten matta'utta, na'oman sara tingikku rongnga apan nitiuppu anginna na'atal᷊anga si mangitou. I yamiu sarun tumal᷊anga naal᷊ihida a'enggenanna sulal᷊ummu pangalo, ana see nal᷊iundu'a salaiwe tawe seetta maraninu.

³⁷I yamiu sarun tumal᷊anga wuṛṛu matara sangkatou ringannu waine, salaiwe taweddu mangenggena. Wuṛṛu i yamiu tawe maal᷊awanga manga seennu.

³⁸I yamiu sarun mate sulal᷊ummu pamuanganna, pateannu manga wanuan seennu.

³⁹Sambageanganna addio'a wuassi yamiu apan ta'e wiakka su wanuan seennu sarun masusa ana waugu rosan sassane wuṛṛu rosan al᷊amonanu.

⁴⁰Arawe papapulunnu sarun manga'u rosan iupungu al᷊amonan mangitou apan buatte nanal᷊are si Ya'u wuṛṛu nilumawanga si Ya'u,

⁴¹na'oman sara i Ya'u lumawanga si mangitou wuṛṛu mallimbuakka si mangitou watukku pamuanganna su wanuan manga seetti mangitou. Panginsueanne, amungkangngu papapulunnu niawadote wuṛṛu buatte napaamattu ṛuumanna ana waugu rosan wuṛṛu lal᷊awangi mangitou,

⁴²I Ya'u sarun mannaungnga pa'aire-U si Yakub, si Ishak wuṛṛu si Abraham. I Ya'u sarun mallimbakku pa'aire-U tadea'u mangonggolu leta'a udde su walahang-Ku.

⁴³Arawe leta'a udde ṛinone iapasal᷊iu asuene tumanange, tadea'u atonna-tonna maaillol᷊o. Wuṛṛu al᷊aṛana-U sarun maapendamma anambon ṛuumanna apan Ta'u iaparanta si mangitou ana waugu maddiri tumuṛutta manga atoranna wuṛṛu manga parenta-U.

⁴⁴Arawe tantal᷊anna i mangitou ta'e uatana'a su wanuan seetta lai, i mangitou tawe Ta'u itantanga ara'e Ta'u pateanna abbi. Ana waugu amungkangngu i mangitou Ta'u pateanna, atappasanne i Ya'u namassutta pa'aire-U si mangitou, arawe i Ya'u indi MAWU, Ruatan mangitou.

⁴⁵I Ya'u sarun mallimbakku pa'aire apan Ta'u niola'a ringannu al᷊amonan mangitou, napawe i Ya'u mapal᷊iatta'u taṛino-U su al᷊awo'u walahanna ringannu mangapiddu walahang-Ku sinumabbanga wuassu Mesir, tadea'u i Ya'u, MAWU, mabbal᷊i Ruatan mangitou.”

⁴⁶Eteudde manga tita wuṛṛu manga parenta apan nionggolu MAWU su Wowon Sinai si Musa iapawal᷊o su walahannu Israel.