Read Talaud IMAMATTA 27 Bible Online

IMAMATTA 27 - Talaud bible

IMAMATTA 27

¹MAWU nangonggola si Musa

²atoranna indi iapaamatta su walahannu Israel. Napawe sangkatou ionggola maola'a sasamba su MAWU ipanubbussa riandine sassane, taumata udde wotongnge tubbusannu roitta anambone

³tumuṛṛuttu arega apan ipappaatta su Rasannu MAWU: — nal᷊iu wuassu 60 su tonnane uukke: esakka & 15 roitta sal᷊a'a wawine & 10 roitta sal᷊a'a — suwallatu 20-60 su tonnane uukke: esakka & 50 roitta sal᷊a'a wawine & 30 roitta sal᷊a'a — suwallatu 5-20 su tonnane uukke: esakka & 20 roitta sal᷊a'a wawine & 10 roitta sal᷊a'a — wuassu uukka 5 tonna inawa: esakka & 5 roitta sal᷊a'a wawine & 3 roitta sal᷊a'a

⁸Amungkangngu taumata apan naddiandi tumaniten asiangnga maddea'a mamaekka arega apan buatte nitantunna, i tou ṛinone mangapidu taumata apan buatte niola'a sasamba su MAWU udde ringannu Imam. Imam ṛinone manantunnu arega apan mabbawoanna tadea'u taumata udde maawaekka.

⁹Napawe paddariandi udde naṛṛia'a su winatangnga tawe ipappalli apan wotongnge maola'a sasamba su MAWU, taumata apan naddiandi udde imbaṛangnga manu'adda ringannu winatangnga waine, ana waugu sarangkanambone apan nionggola su MAWU udde maola'a pussa'an MAWU. Amungkangngu i tou manal᷊iu, darua winatangnga maola'a pussa'an MAWU.

¹¹Arawe amungkangngu paddariandi udde naṛṛia'a su winatangnga ipappalli apan tawe wotongnge maola'a sasamba su MAWU, taumata apan naddiandi ṛinone mangapiddu winatangnga udde ringannu imam.

¹²Imam sarun manantunnu aregane tumuṛuttu ahewallu winatangnga udde. Wuṛṛu arega apan buatte nitantunna tate iawal᷊u.

¹³Amungkangngu taumata udde mappulu manubbussa winatangnge, i tou ṛinone mamaekka aregane wuṛṛu tambannu ruan pul᷊o persenna.

¹⁴Amungkangngu pia sangkatou mangonggolu sasamba wal᷊ene su MAWU, imam manantunnu aregane tumuṛuttu ola'u wal᷊en udde. Arega apan buatte nitantunna tate iawal᷊u.

¹⁵Amungkangngu taumata udde mappulu manubbussa wal᷊ene, i tou ṛinone mamaekka aregane tambannu lai ruan pul᷊o persenna.

¹⁶Amungkangngu pia sangkatou mangonggolu sasamba sambageanganna wuassu letange su MAWU, aregane ṛinone itantunna tumuṛuttu anambon wualanna apan ipaatta ipassuanna leta'a udde. Suapan ruan pul᷊o su kilone ganduma aregane mapul᷊o roitta sal᷊a'a.

¹⁷Amungkangngu leta'a udde nionggola ro'en Tonna Pamelenganna, aregane ṛinone waeṛanna abbi.

¹⁸Amungkangngu leta'a nionggola sasamba udde nal᷊iu wuassu Tonna Pamelenganna, imam ṛinone mattakaseren aregane waeṛanna abbi tumuṛuttu anambon tonna manattaka oṛṛassa udde maddatingu Tonna Pamelenganna manansuna, wua'udde manantunnu arega apan amuranne.

¹⁹Amungkangngu taumata apan nagonggolu sasamba wawail᷊anne udde mappulu manubbussa wawail᷊anne udde, i tou ṛinone mamaekka aregane wuṛṛu tambannu ruan pul᷊o persenna.

²⁰Amungkangngu i tou mabbal᷊u'u wawail᷊anne udde ringannu tawe manubbussa dorone wuassu MAWU, i tou tate maatuahuanna manubbussa wawail᷊anne.

²¹Sulal᷊ummu Tonna Pamelenganna apan manansunna, wawail᷊anna udde maola'a tatahuanannu MAWU saran mal᷊annu-l᷊annu, wuṛṛu ionggola su manga imam.

²²Amungkangngu pia sangkatou mangonggolu sasamba su MAWU santampa wawail᷊anna apan buatte niwallianne,

²³imam ṛinone mattakaseren aregane tumuṛuttu anambon tonna su orassa udde maddatingngu Tonna Pamelenganna apan manansunna. Ana see taumata udde ṛinone mamaekka aregane su allo udde lai. Roitta udde maola'a tatahuanannu MAWU.

²⁴Sulal᷊ummu Tonna Pamelenganna, wawail᷊anna udde ṛinone iwelengnga su tatahuanne apan dorone ara'e su papapulunne.

²⁵Anambon arega ṛinone itantunna tumuṛuttu arega apan ipappaatta su Rasannu MAWU.

²⁶Winatanga apan paarorone niasungkanga udde maola'a tatahunannu MAWU, nariaddi imbaṛanga ionggola olaanna sasamban al᷊al᷊uassu naungnga. Ana'u sapi, ana'u domba ara'e ana'u ambinga apan paarorone niasungkanga udde, tatahuanannu MAWU.

²⁷Arawe winatanga ipappalli apan paarorone niasungkanga wotongnge tubbusanna tumuṛuttu arega apan ipappaatta su Rasannu MAWU tambannu lai ruan pul᷊o persenna. Amungkangu tawe tubbusanna, winatanga udde wotongnge iwal᷊u'a su taumata waine tumuṛuttu arega apan ipappaatta su Rasannu MAWU.

²⁸Tawe saran sangkatou apan wotongnge mabbal᷊u'a ara'e manubbussa apa apan buatte niṛṛae ringannu tawe taweddu maal᷊angnga su MAWU, mawae udde taumata, winatanga ara'e leta'a. Udde tatahuanannu MAWU saran mal᷊annu-l᷊annu.

²⁹Ewe'e lai taumata apan buatte niṛṛae su MAWU hunan pateanna tawe wotongnge tubbusanna; i tou ṛinone pateanna.

³⁰Sepere mapul᷊o wuassu anambon hessin leta'a, mawae ganduma ara'e wuan manga aaluanna, udde hunane su MAWU.

³¹Amungkangu sangkatou mappulu manubbussa sambageanganna wuassu hessine udde, i tou ṛinone mamaekka aregane apan buatte nitantunna tambannu ruan pul᷊o persenna.

³²Sambau wuassu mapul᷊o winatanga papadul᷊iananna udde tatahuanannu MAWU. Amungkangu winatanga udde ireengnga, suapan sambau winatanga appul᷊one maola'a tatahuanannu MAWU.

³³Tatahuannu winatanga udde imbaranga mamile suapa apan apianne, suapa apan al᷊eoanne. I Tou lai tawe wotongnge manal᷊iu. Amungkangu i tou mangke nanal᷊iu, darua winatanga udde maola'a tatahuanannu MAWU wuṛṛu tawe wotongnge tubbusanna.

³⁴Eteudde manga parenta apan nionggolu MAWU si Musa su puiddu Wowon Sinai maola'a parenta su walahannu Israel.