Read Talaud IMAMATTA 3 Bible Online

IMAMATTA 3 - Talaud bible

IMAMATTA 3

¹Amungkangngu sangkatou mangonggolu sapi maola'a sasamban paddarame, sapi udde wotongnge esakka, wotongnge lai wawine, arawe imbaṛṛangnga pia sangkulle.

²Taumata apan nangonggola ṛinone mangaddon limane su wowo puan binatangnga udde ana see ṛatanna su saruannu ngaran Dasannu MAWU. Manga imam papapulunni Harun ṛinone mangalassu daṛṛan sapi udde su mezbah sandiṛṛanne appata.

³Hunan sasamban paddarame su MAWU, imam ṛinone mangonggolu manga wageangngu winatangnga udde: aṛiwungkalu apan uapi'unna tinaine,

⁴wabbatune ringannu tawane wuṛṛu wageangngu atenene apan apianne.

⁵sarangkanambone udde suadio'a ringannu sasamba itattambunna waine, ṛinone itambunna su wowon mezbah. Hal᷊urun sasamba anna udde ma'al᷊uassa naungngu MAWU.

⁶Amungkangngu nionggola maola'a sasamban paddarame udde sambau domba ara'e ambinga, winatangnga udde wotongnge esakka, wotongnge lai wawine, arawe tawe wotongnge pia sangkulle.

⁷Amungkangngu pia sangkatou mangonggolu domba, i tou ṛinone mangapidda watukku Rasannu MAWU.

⁸Isudde i tou ṛinone mangandangngu limane su wowon puan domba udde ana see imam ṛinone mangalassu daṛṛan domba udde su mezbah sandiṛṛanne appata.

⁹Su sasamban paddarame su MAWU, imam ṛinone mangonggolu manga wageangngu domba udde: tawane, ahewallu tol᷊ene apan pia tawane wuṛṛu pototanna maranin duṛṛin liudde, aṛiwungkalune,

¹⁰wabbatune ringannu tawane, wuṛṛu wageangngu atene apan apianne.

¹¹Imam apan mammanara ṛinone manambunnu sarangkanambone udde su wowon mezbah maola'a sasamba ia'imbe su MAWU.

¹²Amungkangngu niola'a sasamba sambau ambinga, taumata apan nangonggola udde ṛinone mangapidda watukku Rasannu MAWU.

¹³Isudde i tou ṛinone mangandangngu limane su wowon puan ambinga udde ana see ṛatanna su saruannu Rasanna. Imam ṛinone mangalassu daṛṛan binatangnga su mezbah sandiṛṛanne appata.

¹⁴Su sasamba anna ionggola su MAWU, imam ṛinone mangonggolu manga wageangngu ambinga udde: aṛiwungkalu apan uapi'unna tinaine,

¹⁵wabbatune ringannu tawane wuṛṛu wageangngu ate apan apianne.

¹⁶Imam apan mammanara ṛinone manambunnu sarangkanambone udde su wowon mezbah. Hal᷊urun sasamba anna udde ma'al᷊uassa naungngu MAWU. Anambon tawan binatangnga udde ionggola su MAWU.

¹⁷Taumatan Israel imbaṛṛangnga umanna tawa ara'e daṛṛa. Atoranna udde iapaamatta saran mal᷊annu-l᷊annu wuṛṛu tattuṛṛutannu suapan taumatan Israel apan uatana'a su al᷊awo'u tampa.