Read Talaud IMAMATTA 4 Bible Online

IMAMATTA 4 - Talaud bible

IMAMATTA 4

¹MAWU nandolokki Musa niapal᷊iata su walahannu Israel manungku isai-sai apan ringannu tawe nipattatudda na'ola'a rosa ana waugu nilumawangnga sambau su wallatu manga titan MAWU, ṛinone tumuṛṛutta atoranna indi.

³Amungkangngu na'ola'a rosa udde Imam Bahewalla, na'oman sara balahannu Israel nassal᷊ate lai, i tou ṛinone mangonggolu sambau sapi esakka saṛṛen tumuwo apan tawe angngone su saruannu MAWU tadea'u manga rosane ampunganna.

⁴Sapi udde ṛinone iapidda watukku ngaran Dasannu MAWU. Imam Bahewalla ṛinone mangandangngu limane su wowon puan binatangnga udde, ana see maṛṛata sapi udde su saruannu Rasanna.

⁵Sambageanganna wuassu daṛṛane ṛinone iapiddi tou sumutta sulal᷊ummu Rasanna.

⁶Ana see i tou mangammo tal᷊imaddone sulal᷊ummu daṛṛa udde wuṛṛu iwokka paapitu su saruannu pampele apan uawallata Wabbo'a Susi.

⁷Sambageanganna wuassu daṛṛa udde ṛinone iwuṛṛa su manga tatandu'a wuṛṛu su manga pabbuuannu mezbah dupa mawangngi sulal᷊ummu Rasanna, wuṛṛu lambene ṛinone iwokka su apampakku mezbah sasamba itattambunna apan uaraddo su saruannu Rasanna.

⁸Imam ṛinone manganu anambon tawan sapi esakka udde, eteudde aṛṛiwungkalu apan uapi'unna lal᷊oṛṛon tianne,

⁹wabbatune wuṛṛu tawane wuṛṛu wageangnge apan apianne wuassu atene.

¹⁰Sarangkanambone udde ṛinone itambunna su wowon mezbah sasamba itattambunna ere su sasamban paddaramae.

¹¹Arawe ṛemessu sapi udde, pisine, puane, leddane, lal᷊oṛṛon tianne nasutta lai tinaine,

¹²nariaddi sarangkanambone tabbene'e wageangnge apan buatte niṛṛae, ṛinone iapidda su liuddu paddasananna. Isudde sapi udde ṛinone itambunna su putungnga su tampan pandammeannu awu, eteudde tampa apan niṛṛae pandammeannu awu udde.

¹³Amungkangngu na'ola'a rosa anambon balagu Israel, ana ringannu tawe nipattatudda nilumawangnga sambau titan MAWU,

¹⁴ne paal᷊ihakka napawe rosa udde niasingkatante, walahanna udde ṛinone mangapiddu sambau sapi esakka saṛṛen tumuwo su saruannu Rasanna MAWU. Winatangnga udde ṛinone ionggola maola'a sasamba ipangampunga rosa.

¹⁵Manga piaṛṛa'u walahanna udde ṛinone mangandangngu liman mangitou su wowon puan binatangnga udde, ana see makkata su tampa udde.

¹⁶Imam Bahewalla ṛinone mangapiddu sambageanganna daṛṛan binatangnga udde sumutta sulal᷊ummu Rasanna.

¹⁷I tou isudde ṛinone mangammon tal᷊imaddone sulal᷊ummu daṛṛa udde ana see iwokka paapitu su saruannu pampele apan uawallata Wabbo'a Susi.

¹⁸Sambageanganna lai ṛinone iwuṛṛa su manga tatandu'a su manga wu'un mezbah amania sulal᷊ummu Rasanna, wuṛṛu lambene ṛinone ialassa su apampakku mezbah tampan sasamba itattambunna apan uaraddo su ngaran Dasanna.

¹⁹Anambon tawan binatangnga udde anuanna ana see itambunna su wowon mezbah.

²⁰Olangnge naal᷊ihidda ere nangonggolu sapi esakka maola'a sasamba ipangampungnga rosa. Etearoddi ola'u Imam Bahewalla mangngonggolu sasamba ipangampunga manga rosan taumata, ne manga rosa udde sarun ampungannu MAWU.

²¹Wua'udde sapi esakka udde ṛinone iapidda watukku liudde, wuṛṛu itambunna su liuddu paddasananna, ere lai su sasamba sapi esakka su ipangampungnga rosan Imam Bahewalla udde sassane. Etearoddi olangnge mangonggolu sasamba ipangampungnga rosan taumata.

²²Amungkangngu na'ola'a rosa udde sangkatou tembonanne ana waugu ringannu tawe nipattatudda i tou nilumawangnga sambau suwallatu parentan MAWU,

²³ne napawe i tou naatutukka, i tou ṛinone mangonggolu sambau ambinga esakka apan tawe sangkulle ipangampungnga rosane.

²⁴I tou ṛinone mangandangngu limane su puan binatangnga udde, ana see ṛatanna su samba'an sawannakku mezbah, su tampa pamototanna winatangnga olaanna sasamba itattambunna.

²⁵Imam ṛinone mangammon tal᷊imaddone sulal᷊ummu daṛṛan binatangnga udde ana see iwuṛṛa su manga tatandu'a su manga wu'un mezbah wuṛṛu lambene iwokka su apampakku mezbah.

²⁶Wua'udde anambon tawan binatangnga udde ṛinone itambunna su wowon mezbah, ere lai su sasamban paddarame. Etearoddi olangnge imam mangngonggolu sasamba ipangampunga rosan taumata tembonanne, ne taumata udde sarun ampungannu MAWU.

²⁷Amungkangngu pia wuassu sangkatou tumana'u soa na'ola'a rosa ana waugu tawe nipattatudda nilumawangnga sambau su wallatu parentan MAWU,

²⁸ne ringannu mal᷊ihakka napawe naatutukke, i tou ṛinone mangonggolu sambau ambinga wawine apan tawe sangkulle.

²⁹I tou ṛinone mangandangngu limane su wowon puan binatangnga udde, ana see potottanne su samba'an sawannakku mezbah su tampa pamototanna winatangnga maola'a sasamba itattambunna.

³⁰Imam ṛinone mangammon tal᷊imaddone sulal᷊ummu daṛṛan winatangnga udde, ana see iwuṛṛa su manga tatandu'a su manga pabbuuannu mezbah wuṛṛu lambene iwokka su apampakku mezbah.

³¹Anambon tawan binatangnga udde ṛinone anuanna naal᷊ihidda su sasamban paddarame. Tawane udde ṛinone itambunnu manga imam su wowon mezbah, tadea'u hal᷊urune ma'al᷊uassa naungngu MAWU. Etearoddi olangnge imam mangngonggolu sasamba ipangampunganga rosan tumana'u soa, ne taumata udde sarun ampungannu MAWU.

³²Amungkangngu pia sangkatou nangonggolu sambau domba ipangampungnga rosane, domba udde ṛinone wawine wuṛṛu tawe sangkulle.

³³I tou ṛinone mangandangngu limane su wowon puan binatangnga udde, ana see maṛṛata su samba'an sawannakku mezbah, su tampa pamototanna binatangnga maola'a sasamba itattambunna.

³⁴Imam ṛinone mangammon tal᷊imaddone sulal᷊ummu daṛṛan binatangnga udde, ana see iwuṛṛa su manga tatandu'a su manga pabbuuannu mezbah, wuṛṛu lambene iwokka su apampakku mezbah.

³⁵Wua'udde anambon tawan binatangnga udde ṛinone anuanna ere su sasamban paddarame. Tawa udde ṛinone itambunna su wowon mezbah, suadio'a ringannu sasamba anna apan nionggola su MAWU. Etearoddi olangnge imam mangonggolu sasamba ipangampunga rosan taumata udde, ne i tou sarun ampungannu MAWU.