Read Talaud IMAMATTA 5 Bible Online

IMAMATTA 5 - Talaud bible

IMAMATTA 5

¹Sasamba ipangampungnga rosa ṛinone ionggola; Amungkangngu pia sangkatou taumata ringannu atonna niroronganna massakassi su mallaṛṛuungnga, arawe tawe nanal᷊a'an sarangkanambone apan buatte niasiloanna ara'e niaringiṛṛanne, na'oman sara i tou sarun mamasanna passasala udde.

²Amungkangngu pia sangkatou nassal᷊a ana waugu ringannu tawe nipattatudda nabbal᷊i narosate, ana waugu buatte nangeṛetta sambau apan maarosa, ereinai winal᷊unannu winatangnga, wuṛṛu wua'udde naatutukka inolaane.

³Amungkangngu pia sangkatou taumata ana waugu ringannu tawe nipattatudda nangeṛṛetta saranapa ipappalli apan wuassu taumata, wuṛṛu wua'udde naatutukka pallal᷊agune.

⁴Amungkangngu pia sangkatou nassal᷊a ana waugu walate asalune nipa'ola'a al᷊awo'u manara, wuṛṛu wua'udde naatutukka pallal᷊agune.

⁵Sulal᷊ummu hatto udde, taumata apan nassal᷊a ṛinone manga'u pasasal᷊ane.

⁶Wuṛṛu su ipanubbussa rosane, i tou ṛinone mangapiddu sambau domba ara'e ambinga wawine su MAWU. Imam ṛinone mangonggolu sasamba udde tadea'u rosan taumata udde ampunganna.

⁷Arawe amungkangngu taumata nassal᷊a udde tawe maasaddia domba ara'e ambinga ipanubbussa rosane, i tou ṛinone mangapiddu sampare manu'a bakiangnga ara'e manu'a merpati saṛṛen tumuwo, sambau maola'a sasamba ipangampunga rosa, wuṛṛu sambau lai maola'a sasamba itatambunna.

⁸Manga manu'a udde ṛinone iapiddaringannu imam. Imam ṛinone malliu ṛoro mangonggolu manu'a apan buatte tinantunna maola'a sasamba aampungnga rosa. Ullekkan manu'a udde ṛinone latto'anna, arawe tawe wotongnge mabbassutta puane.

⁹Daṛṛan manu'a udde ṛinone ialassa su sandiṛṛannu mezbah, wuṛṛu lambene iramme su liuddu apampakku mezbah hunan sasamba aampungnga rosa.

¹⁰Wua'udde imam mangonggolu manu'a aruane maola'a sasamba itattambunna, uasul᷊ungngu atoranna. Etearoddi ola'u imam mangngonggolu sasamba ipangampunga rosan taumata udde, ne i tou sarun ampungannu MAWU.

¹¹Amungkangngu taumata nassal᷊a tawe maasaddia sampare manu'a bakiangnga ara'e manu'a merpati olaanna sasamba ipangampunga rosa, i tou ṛinone mangapiddu taponna sangkilo. Taponna udde tawe wotongnge lo'annu lanan zaitun ara'e lal᷊o'annu amania, ana sasamba uddewe sasamba aampungnga rosa wuṛṛu wal᷊ine sasamba ia'imbe.

¹²Taponna ṛinone iapidda ringannu imam. Imam ṛinone manganu sangkangkumma wuassu taponna udde maola'a tatiala manungku sarangkanambone buatte nionggola su MAWU. Taponna sangkangkumma udde ṛinone itambunna su wowon mezbah maola'a anna. Eteudde sasambane ipangampungnga rosa.

¹³Etearoddi olangnge imam mangngonggolu sasamba ipangampunga rosan taumata udde, ne i tou sarun ampungannu MAWU. Taponna lambene udde maola'e wageangngu imam, ere lai su aonggola gandumma.

¹⁴MAWU nangonggolu manga atoranna indi si Musa.

¹⁵Amungkangngu pia sangkatou ringannu tawe nipattatudda na'ola'a rosa ana waugu wolo'a sulal᷊ummu manantillu manga sasamba apan itattitan MAWU, ne taumata udde ṛinone mangapiddu sasamba ipallana'a arugianna. Sasamba udde ṛinone sambau domba ara'e ambinga esakka apan tawe sangkulle, wuṛṛu niarega tumuṛṛuttu arega apan ipappaatta su Rasanna MAWU.

¹⁶Taumata udde ṛinone mamaekka apa apan dorone tawe nimanarane, tambannu lai ruan pul᷊o persenna. Wua'udde i tou ṛinone manantillu winatangnga udde su imam, wuṛṛu imam ma'ola'a sasamba ipangampunga rosan taumata udde, ne i tou sarun ampungannu MAWU.

¹⁷Amungkangngu sangkatou ringannu tawe nipattatudda na'ola'a rosa ana waugu nilumawangnga sambau su wallatu parentan MAWU, taumata udde nassal᷊a wuṛṛu ṛinone mamasanna pasasal᷊ane.

¹⁸Su sasamba ipallanna'a arugianna udde i tou ṛinone mangapiddu sambau domba ara'e ambinga esakka apan tawe sangkulle wuṛṛu niarega tumuṛṛuttu arega apan ipappaatta su Rasanna MAWU. Imam ma'ola'a sasamba ipangampunga rosan taumata udde, ne i tou sarun ampungannu MAWU.

¹⁹Eteudde sasamba ipallanna'a arugiannu pasasal᷊ane apan buatte niolangnga su saruannu MAWU.