Read Talaud IMAMATTA 6 Bible Online

IMAMATTA 6 - Talaud bible

IMAMATTA 6

¹MAWU nangonggolla si Musa manga atoranna indi. Sangkatou ṛinone mangonggolu sasamba amungkangngu i tou na'ola'a rosa su saruannu MAWU ana waugu maddiri mamelelengngu saranapa apan niapasahipunnu sansul᷊ungnge si tou, ara'e namahia taumata, nanna'o saranapane, ara'e naasangkalla saranapa apan nawul᷊ite, arawe nabbasangkalla ringannu nassalu.

⁴Taumata apan nassal᷊a udde ṛinone mamaekka apia sarangkanambone apan niasombanganne ringannu tawe su ṛinone. Su tempu i tou niasangkal᷊anna nassal᷊a, i tou ṛinone mamaekka sarangakanambone su tatahuanne, tambannu lai darua pul᷊o persenna.

⁶Su sasamba ipallanna'a arugiannu taumata udde ṛinone mangonggolu sambau domba ara'e ambinga apan tawe sangkule wuṛṛu niarega tumuṛṛuttu arega apan ipappaatta su Rasanna MAWU.

⁷Imam mangonggolu sasamba ipangampunga rosan taumata udde, ne i tou sarun ampungannu MAWU.

⁸MAWU nandolokki Musa

⁹niapaonggola si Harun wuṛṛu manga anangnge manga atoranna indi su ola'u sasamba apan sarangkanambone itattambunna. Imam ṛinone mangandangngu sasamba itattambunna su wowon mezbah wuṛṛu niwala isudde su al᷊o'engngu ṛabbi, wuṛṛu putungnge sidutu luṛṛenggamma.

¹⁰Napawe sasamba udde nabbal᷊ite awu, imam malluṛṛen sal᷊ana maautta wuṛṛu jubah wuassu linen, ṛinone maṛṛootta awu apan pia tawane wuassu wowon mezbah wuṛṛu iaddo su sandiṛṛannu mezbah.

¹¹Wua'udde i tou ṛinone mangal᷊innu laubba wuṛṛu mangapiddu awu udde su liuddu paddasananna, su tampa apan buatte niṛṛae pangadoannu awu udde.

¹²Suapan marua'allo imam ṛinone makkunuttu alu papputunganna su wowon mezbah, mangatokku sasamban itattambunna su wowone, wuṛṛu manambunnu tawa sasamban paddarame. Putungnga su wowon mezbah ṛinone sidutu luṛṛenggamma tawe wotongnge iwala mappaddumma.

¹⁴Eteindi manga atoranna su ola'u sasamba ia'imbe su MAWU. Sasamba udde ṛinone iapiddu sangkatou wuassu papapulunni Harun su saruannu mezbah.

¹⁵I tou ṛinone manganu sangkangkumma taponna al᷊ussa wuṛṛu lana ringannu amania, ana see itambunna su wowon mezbah maola'a tatiala manungku sasamba sarangkanambone udde nionggola su MAWU. Hal᷊urun sasamba udde ma'al᷊uassa naungngu MAWU.

¹⁶Taponna lambene ṛinone olaanna roti tawe ragine wuṛṛu annanannu manga imam su tampa apan buatte niṛṛae, eteudde su rallaku Rasannu MAWU. Eteudde wageangngu manga imam apan nionggolu MAWU si mangitou wuassu sasamba anna. Anna udde lembon susi, ere sasamba ipangampunga rosa wuṛṛu sasamba ipallanna'a arugianna.

¹⁸Saran mal᷊annu-l᷊annu suapan esakka papapulunni Harun wotongnge umanna roti udde; eteudde wageangngi mangitou apan sidutu wuassu anna apan nionggola su MAWU. Taumata waine apan napangeṛṛetta anna apan buatte niola'a sasamba udde, sarun maasomba asasilaka ana waugu atatohassu asasusine.

¹⁹MAWU nangonggola si Musa manga atoranna indi

²⁰su ola'u sasamba wuṛṛu mapatenegu sangkatou imam papapulunni Harun. Su allo i tou itenega, i tou ṛinone mangonggolu sangkilo taponna wuassu gandumma su MAWU. Sambageanganna ionggola su marua'allo wuṛṛu lambene su tempo wawallo.

²¹Taponna udde ṛinone lo'annu lana, ana see itambunna su pallahanne, wua'udde ringa'e iṛṛitanna wuṛṛu ionggola maola'a sasamba ia'imbe. Hal᷊urun sasamba udde ma'al᷊uassa naungngu MAWU.

²²Ma'oman saran mal᷊annu-l᷊annu suapan papapulunni Harun apan itenega mabbal᷊i Imam Bahewalla ṛinone mangonggolu sasamba udde. Sarangkahewalle ṛinone itambunna maola'a sasamba su MAWU.

²³Suapan sasamba ia'imbe apan ionggolu imam ṛinone sarangkahewalle itambunna, saran addio'a imbaṛṛangnga annananna.

²⁴MAWU nandolokki Musa

²⁵mangonggola si Harun wuṛṛu manga anangnge manga atoranna indi su ola'u sasamba ipangampunga rosa. Winatangnga maola'a sasamba ipangampunga rosa ṛinone ṛatanna su tampa pamamototanna winatangnga maola'a sasamba itattambunna. Sasamba udde lembon susi.

²⁶Imam apan nangonggolu sasamba udde ṛinone umanna su tampa apan buatte niṛṛae, eteudde su rallaku Rasanna MAWU.

²⁷Salaiwe isai ara'e salaiwe manga apa apan nangeṛṛetta ṛemessu winatangnga udde sarun maasomba asasilaka ana waugu atatohassu asasusine. Amungkangngu sambau laubba niaṛṛente'annu daṛṛan binatangnga udde, laubba udde ṛinone wansal᷊anna su tampa apan buatte niṛṛae.

²⁸Urinna leta'a apan nipaatta pallahanna ṛemessa sasamba udde ṛinone pesanganna. Amungkangngu nipaatta udde urinna atta'a, urinna udde ṛinone radassanna ana see ukkasannu ua'e.

²⁹Suapan taumata esakka sulal᷊ummu amonannu manga imam botongnge umanna sasamba apan lembon susi udde.

³⁰Winatangnga apan ipaatta su lal᷊aghun pangangampunga rosa apan nianu wuassu sambageanganna daṛṛane apan iapidda watukku Wabbo'a Susi, ṛinone itambunna ma'oman sara masue wuṛṛu tawe wotongnge annananna.