Read Talaud IMAMATTA 9 Bible Online

IMAMATTA 9 - Talaud bible

IMAMATTA 9

¹Massallo apawe nal᷊iudde lal᷊aghun patatenega, su allo aual᷊une, i Musa namago si Harun wuṛṛu manga anangnge see lai manga piaṛṛa'u walahannu Israel.

²Unni Musa si Harun, “Panganute sambau sapi esakka saṛṛen tumuwo wuṛṛu sambau domba esakka, itarua udde ṛinone tawe sangkulle. Onggol᷊a'e binatangnga darua udde su MAWU, sapi esakka maola'a sasamba ipangampungnga rosa, wuṛṛu domba esakka maola'a sasamba itattambunna.

³Ana see doloṛṛa'e walahannu Israel mangonggolu sambau ambinga esakka maola'a sasamba ipangampunga rosa wuṛṛu sambau ana'u sapi wuṛṛu sambau lai ana'u domba apan sambau-sambau uukke santonna wuṛṛu tawe sangkulle maola'a sasamba itattambunna.

⁴Doloṛṛa'e lai i mangitou mangonggolu sambau sapi esakka wuṛṛu sambau ambinga esakka maola'a sasamban paddarame. Sarangkanambone udde ṛinone ionggoli mangitou su MAWU suadio'a ringannu sasamba ia'imbe apan pia lanane, ana waugu allo indi MAWU nirumanta ringanni mangitou.”

⁵Sarangkanambone apan nitanatan Musa niapiddi mangitou su saruannu Rasanna, wuṛṛu ṛuanganna sarangkanambone naammulla isudde mattaṛṛamawu su MAWU.

⁶Ana see i Musa nabbisara, “MAWU nandolokki yamiu niapaola'a indi tadea'u i yamiu wotongnge maasilo semakku darantan MAWU.”

⁷Wua'udde i tou nabbisara si Harun, “Roote watukku mezbah wuṛṛu panaddiate sasamba ipangampungnga rosa wuṛṛu sasamba itattambunna, tadea'u rosanu wuṛṛu rosan ṛuangannu ampungannu MAWU. Ola'e udde ere buatte niparentan MAWU.”

⁸Ne i Harun inaite watukku mezbah wuṛṛu naṛṛata sapi esakka apan sarun ionggola maola'a aampunga rosane sassane.

⁹Manga ana'i Harun nanogokku daṛṛan binatangnga udde si Harun, wuṛṛu i tou nangammon tal᷊imaddone sulal᷊ummu daṛṛa udde, apiddu namuṛṛa su manga tatandu'a su mezbah pabbuuanne appata. Wua'udde daṛṛa lambene niwokka su apampakku mezbah.

¹⁰Tawa, wabbatune wuṛṛu wageangnge apianne wuassu winatangnga udde nitambunni tou su wowon mezbah, ere buatte niparentan MAWU si Musa.

¹¹Arawe ṛemessa wuṛṛu pisin binatangnga udde nitambunna su liuddu paddasananna.

¹²Wua'udde i Harun namototta binatangnga maola'a sasamba itattambunna hunan batanganne sassane. Manga ana'i Harun namasingkattu daṛṛa udde si tou, ana see i tou namokka mezbah sandiṛṛanne appata.

¹³Wua'udde i mangitou nanantilla si tou pua wuṛṛu manga wageangnge waine wuassu winatangnga udde, wuṛṛu nitambunni tou su wowon mezbah.

¹⁴Wua'udde lal᷊oṛṛon tianne wuṛṛu palangngu binatangnga udde niukkassa wuṛṛu nitambunni tou ringannu sasamba itattambunna su wowon mezbah.

¹⁵Wua'udde i tou nangonggolu sasamba ambinga maola'a sasamba aampunga rosan taumata. Ambinga udde nipototti tou ere su sasamba pinangampunga rosane sassanee.

¹⁶Wua'udde i tou nanganu binatangnga maola'a sasamba iatattambunna, wuṛṛu nionggoli tou tumuṛṛuttu atoranna.

¹⁷Wua'udde i tou nangonggolu sasamba ia'imbe; i tou nanganu taponna sangkangkumma, wuṛṛu nitambunni tou su wowon mezbah. Udde tatambane su sasamba itattambunna mamiallo.

¹⁸Ana see i tou naṛṛata lai sapi esakka sambau wuṛṛu domba esakka sambau maola'a sasamban paddarame su taumata. Manga ana'i Harun nanoggokku daṛṛan binatangnga udde si tou, ana see i tou namokka su mezbah sandiṛṛanne appata.

¹⁹Wageangnge apan pia tawane wuassu sapi wuṛṛu ambinga udde niaddo mangitou

²⁰su wowon do'on binatangnga darua udde, ana see nitambunni Harun su wowon mezbah.

²¹Ro'o wuṛṛu palangnge aikkatanna udde nionggola maola'a sasamba iattogokka su MAWU. Eteudde wageangngu manga imam, ere buatte nirolokki Musa.

²²Napawe buatte nangonggolu anambon sasamba udde, i Harun namatten limane su wowon ṛuangannu Israel wuṛṛu nangal᷊amatta si mangitou, ana see i tou sinumossokke.

²³Wua'udde i Musa wuṛṛu i Harun sinumuttate sulal᷊ummu Rasannu MAWU. Wua'udde itarua sinumabangnga wuṛṛu nangal᷊amatta ṛuanganna. Ana see anambon ṛuangannu Israel naasilo semakku darantan MAWU.

²⁴Inaṛṛombanganne MAWU nanossokku putungnga apan nanutungnga na'oman sara nasue sasamba itattambunna wuṛṛu manga wageangnge apan pia tawane su wowon mezbah. Su tempo ṛuangannu Israel naasilo i mangitou mangngintul᷊i wuṛṛu apiddu nassubba.