Read Talaud YEREMIA 11 Bible Online

YEREMIA 11 - Talaud bible

YEREMIA 11

¹MAWU nabbisara si ya'u,

²“Paatutuṛṛe'o manga surattu paaire apan niola-U ringannu uma-U. Wal᷊oa'e su taumatan Yehuda wuṛṛu tumana'u Yerusalem manungku

³i Ya'u, MAWU Ruatan Israel, namontoga sisai-sai apan tawe tumuṛṛutta manga atorannu pa'aire-U udde.

⁴Pa'aire udde buatte Ta'u niola'a ringannu al᷊amona mangitou sutempo i mangitou Ta'u niapidda sinumabbangnga wuassu Mesir, wanua apan ere naraka si mangitou. I Ya'u nandolokki mangitou matuṛṛutta si Ya'u wuṛṛu ma'ola'a al᷊awo'a apan Ta'u iparenta si mangitou. Orassa indi buatte Ta'u niwal᷊o lai su taumatan Yehuda wuṛṛu tumana'u Yerusalem manungku napawe i mangitou matuṛṛutta si Ya'u, i mangitou sarun maola'a uma-U wuṛṛu i Ya'u Ruata mangitou.

⁵Amungkangngu i mangitou ma'ola'a sarangkanambone udde, i Ya'u sarun manipussa pa'aire-U su al᷊amona mangitou manungku wanua apan masuwukka wuṛṛu ala, apan orassa indi wawanuanni mangitou, sarun Ta'u ionggolla si mangitou.” I ya'u sinumimbakka, “Aroddite, MAWU.”

⁶Wua'udde MAWU nabbisara si ya'u, “Roote watukku manga soa su Yehuda, wuṛṛu su manga lal᷊anna su Yerusalem. Wal᷊oa'e tanata-U indi su manga taumata poiaroddi. Doloṛṛa'a i mangitou manutukka wuṛṛu tuttuṛṛutta manga parentan paaire-U.

⁷Sutempo i Ya'u nangapiddu al᷊amona mangitou sinumabbangnga wuassu Mesir, ringannu ma'ikkatta i Ya'u napanaungnga si mangitou tadea'u matuṛṛutta si Ya'u. Naddatingngu sara orassa indi lai Ya'u ta'e sidutu mappanaungngu uma-U su olangnge udde,

⁸wuṛṛu mandolokki mangitou tuttuṛṛutta pa'aire-U udde, arawe i mangitou maddiri maddaringikka wuṛṛu maddiri tumuṛṛutta. Ewe'e lai i mangitou sidutu lullawangnga wuṛṛu lal᷊eo ere dorone. Ana waugu udde al᷊awo'u ṛuumanna apan uawoṛṛetta sulal᷊ummu pa'aire buatte Ta'u niṛṛia'a si mangitou.”

⁹Wua'udde MAWU nabbisara apia si ya'u, “Taumatan Yehuda wuṛṛu tumana'u Yerusalem buatte nabbaidda lumawangnga si Ya'u.

¹⁰I mangitou buatte na'ola'a rosa apan niola'u al᷊amona mangitou apan maddiri tumuṛṛutta si Ya'u, i mangitou massubba mawu waine wuṛṛu maddiri tumuṛṛutta parenta-U. Mawae Israel aroddi lai Yehuda lullawangnga paaire apan buatte Ta'u niola'a ringannu al᷊amonan mangitou.

¹¹Ana waugu udde, i Ya'u, MAWU, mapanaungnga manungku i Ya'u sarun mandantan asasilaka si mangitou wuṛṛu i mangitou tawe maal᷊inda'a. Amungkangngu i mangitou mailal᷊are maiontolla si Ya'u, i Ya'u maddiri maddaringikka.

¹²Ana see taumatan Yehuda wuṛṛu tumana'u Yerusalem inaite naiontolla su manga mawu waine apan sassubbanni mangitou ringannu nangonggollu sasamba. Manga mawu tawe mapanal᷊amatta si mangitou sutempo asasilaka udde rumanta.

¹³Manga mawun taumatan Yehuda manambo atonna, anambone ere manga soa mangitou. Tumana'u Yerusalem napararisikku manga mezbah anambone ere manga lal᷊anna su soan Yerusalem ipangonggollu sasamba su Monganna Baal.

¹⁴Ana waugu udde, Yeremia, ariete umal᷊iomanni mangitou ara'e maiontolla si Ya'u huna mangitou! Amungkangngu i mangitou sulal᷊ummu asasusa wuṛṛu maiontolla si Ya'u, i Ya'u maddiri maddaringikka si mangitou.”

¹⁵MAWU nabbisara, “Uma-U apan arangnguang-Ku buatte na'ola'a inolaanna apan dal᷊eo. I mangitou tawe su ṛinone rumanta su Wal᷊e-U. I mangitou massunna manungku ringannu ma'ola'a pa'aire, wuṛṛu mangngonggollu winatangnga, i mangitou tawe maasomba asasilaka. Apa ringannu udde i mangitou wotongnge mal᷊uassa?

¹⁶I Ya'u buatte nanaggon mangitou punnu zaitun apan uasaṛṛihalo, napene manga wuane apan mangkapia. Arawe, orassa indi ringannu tingikka ruddalu'a apan ma'ikkatta sarun Ta'u soṛṛowanna manga rongngane wuṛṛu Ta'u paddianna anambon rannane.

¹⁷Ete i Ya'u apan napararisikku Israel wuṛṛu Yehuda, i Ya'u, MAWU Apan Lembontaṛṛino. Arawe, orassa indi i Ya'u buatte nakkiinna mandantan asasilaka si mangitou. Ete i mangitou sassane apan naarantaran sarangkanambone udde, ana waugu i mangitou buatte na'ola'a al᷊al᷊eo, eteudde mangngonggollu sasamba si Baal na'oman sara i Ya'u nasa'u.”

¹⁸MAWU namasingkatta si ya'u su ola'u hol᷊agu see'u apan dal᷊eo si ya'u.

¹⁹I ya'u naal᷊ihidda domba apan ringannu tawe antimma lal᷊eo niapidda sutampa pamamototanna. I ya'u wagga manungku ete i ya'u apan maola'a punnu manga hol᷊agi mangitou apan dal᷊eo udde. I mangitou nabbisara, “Wette i ite manuwangnga alu indi tantal᷊anna i tou ta'e mangngonggollu wuane; i ite mamate si tou tadea'u aranne abbul᷊ianannu taumata.”

²⁰Ana see i ya'u inumal᷊iomanna, “Oh MAWU Apan Lembontaṛṛino, I'o mallaṛṛuungnga apan matul᷊idda; ete I'o apan masingkattu ṛingidda wuṛṛu naungngu taumata. Hatto'u indi ta'u itantilla Si'o. Doronganna i ya'u wotongnge maasilo Si'o mabbal᷊issa inolaannu manga taumata udde.”

²¹Manga taumatan soa Anatot mappulu tadea'u i ya'u mate. I mangitou mabbisara, “Amungkangngu i'o mangke sidutu mammasingkattu manga tanata MAWU si yami, i'o sarun pateanni yami.”

²²Ana waugu udde, MAWU Apan Lembontaṛṛino nabbisara, “I Ya'u sarun makkuumanni mangitou! Manga taumata dario'i mangitou sarun nate sulal᷊ummu pangalo, wuṛṛu al᷊aṛṛana'i mangitou sarun nate amal᷊unusanna.

²³I Ya'u buatte nanantunnu tempone mandantan asasilaka su manga taumatan Anatot, wuṛṛu napawe tempon ṛuumanni mangitou nia'omante, tawe saran sangkatou apan mal᷊iudda.”