Read Talaud YEREMIA 12 Bible Online

YEREMIA 12 - Talaud bible

YEREMIA 12

¹“Amungkangngu i ya'u mangapiddu hatto'u su saruan-Nu, oh MAWU, isudde mangke asingkatanna manungku ete I'o apan atonna. Arawe i ya'u mappulu lai ma'iwal᷊o Si'o su ola'u atatul᷊idda; Anio taumata lal᷊eo mabbal᷊i su lal᷊umanna'a? Anio ewe'e taumata taṛṛa linga mabbal᷊i ala?

²I'o nassuanni mangitou ere sinuananna, ana see i mangitou nakkamutta, tinumuwo, wuṛṛu nabbua. I mangitou sidutu mabbisara wisara mangkapia su ola'u watangan-Nu, arawe sulal᷊ummu naungnga, i mangitou tawe mappandumma Si'o.

³Arawe I'o, oh MAWU, masingka'u. I'o ma'asilo inolaangku, wuṛṛu I'o masingkattu ereapa apendammu naungku Si'o. Apira'e manga taumata lal᷊eo udde sumabbangnga, apira'e i mangitou ere domba su pamamototanna. Riagaite i mangitou maddatingngu tempone i mangitou ṛatanna.

⁴Ta'e sangkura lai al᷊annune wanua indi mamara, wuṛṛu nannal᷊o tumolangnga su al᷊awo'u wawail᷊anna? Manu'u winalanganna wuṛṛu winatangnga waine nate ana waugu al᷊al᷊eon balahanni yami. I mangitou nabbisara, manungku i ya'u sarun tawe maasilo ola'u pabbiaṛṛanni mangitou.”

⁵MAWU nabbisara, “Yeremia, amungkangngu i'o nallomete mattalummu taumata, tawe mariaddi i'o mattalummu awal᷊o? Amungkangngu su leta'a apan mal᷊angnganna i'o matta'utta, apate apan olaannu amungkangngu i'o su mahurangnge maappalla su winggin Yordan?

⁶I'o buatte nil᷊al᷊eo ewe'e wuassu tuṛṛangngu sassane; i mangitou lai suadio'a mammangalo si'o. Arie pangimanna si mangitou salaiwe wisara mangitou matemangnga.”

⁷MAWU nabbisara, “Tampa atatanaang-Ku tate lai iṛṛingi-U, wanua apan maola'a pussa'a-U buatte nitantang-Ku, wuṛṛu uma-U apan arangnguang-Ku buatte Ta'u nitantilla su lima manga seenne.

⁸Walahanna apan nipile-U lullawangnga si Ya'u; ere singa su mahurangnge etearoddi i mangitou mammaṛṛo si Ya'u. Ana waugu udde i Ya'u maddantinni mangitou.

⁹I mangitou ere manu'u winalanganna apan a'aṛṛatannu asiaṛṛe wuassu al᷊awo'u tampa. Waggoite anambon winatangngu ahuranganna iapainsue si mangitou.

¹⁰Manambo tembonannu raho apan buatte nanggohakku waillu anggore pussa'a-U wuṛṛu ringanna naṛṛinda manga wawail᷊ang-Ku. Wanua-U apan maṛṛansangnga niwal᷊un mangitou nabbal᷊i wadda'u anne apan mal᷊annabba.

¹¹Ore, i Ya'u naasilo si mangitou na'ola'a wanua-U tampa mal᷊annabba wuṛṛu ma'asusa. Sarangkanambone niwala aroddi, taweddu mamadul᷊i.

¹²Wuassu samba'an wadda'u anne su panenteanna, manga taumata nirumanta maddea'a mangaṛṛo. I Ya'u nandantan pangalo panggohakku ahewallu wanua ma'oman sara tate sangkatou apan botongnge mabbiakka su paddarame.

¹³Walahang-Ku mangngasi'u ganduma, arawe ete ṛoa'a apan niitingnga. I mangitou mattinsahadda arawe sahadde udde tawe gessine. I Ya'u tumaniten nasa'u na'oman sara pangitinganni mangitou tawe loṛṛone.”

¹⁴MAWU nabbisara, “Eteindi tanata-U su manga araratuanna ual᷊indongannu Israel apan buatte nanggohakka wanua apan Ta'u nionggolla su uma-U Israel. Ere sinuananna apan niabbutta wuassu leta'a, etearoddi lai manga taumata lal᷊eo udde sarun Ta'u iapasabbangnga wuassu manga wanua mangitou, wuṛṛu Yehuda sarun ipallossa wuassu lima mangitou.

¹⁵Arawe napawe buatte napasabbangngi mangitou, i Ya'u sarun umakkanni mangitou apia; suapan balahanna sarun Ta'u iapidda mabbelengnga su wanuane sassane.

¹⁶Amungkangngu i mangitou ringannu ahewallu naungnga mappulu manengkamma agaman uma-U wuṛṛu mappulu massalu ringannu mabbisara, ‘Riangannu arannu MAWU apan biakka,’ — ere lai dorone i mangitou mangngaṛṛa'a uma-U massalu ringannu aranni Baal — ne i mangitou lai sarun mareengnga uma-Ku wuṛṛu maola'a ala.

¹⁷Arawe walahanna apan maddiri tumuṛṛutta si Ya'u, sarun Ta'u abbutanna ere sasuanna wuṛṛu Ta'u punanna. I Ya'u, MAWU, buatte nabbisara.”