Read Talaud YEREMIA 15 Bible Online

YEREMIA 15 - Talaud bible

YEREMIA 15

¹MAWU nabbisara si ya'u, “I Ya'u tate umakkannu walahanna indi, salaiwe i Musa wuṛṛu i Samuel uarisikka isindi sumal᷊ande si Ya'u maiakkanna huna mangitou. Doloṛṛa'e walahanna indi massal᷊iu, i Ya'u maddirite ma'ellega si mangitou!

²Amungkangngu i mangitou maiwal᷊o si'o watukku apa i mangitou massal᷊iu, simbakke arendi, ‘MAWU nabbisara, apan nitantunna mate ana waugu maradda'a wala'e i tou mate ana waugu sa'itta. Apan nitantunna mate sulal᷊ummu pangalo wala'e i tou mate sulal᷊ummu pangalo! Apan nitantunna mate ana waugu mal᷊unussa wala'e i tou maten al᷊al᷊unussa! Apan nitantunna maola'a tawananna wala'e i tou iluranna maola'a tawananna!’

³I Ya'u, MAWU, buatte nanantunna manungku appatta ṛuumanna apan ma'ata'utta sarun mariaddi si mangitou: i mangitou sarun mate sulal᷊ummu pangalo, winal᷊unanni mangitou sarun wol᷊engannu asu, inasannu manu'u winalanganna, wuṛṛu insueannu winatangnga mal᷊aṛṛaga.

⁴I Ya'u sarun ma'ola'a anambon balahanna su runia matta'utta maasilo si mangitou. Sarangkanambone udde Ta'u olaanna ana waugu inolaanni Manasye ana'i Hizkia su Yerusalem sutempo i tou naola'a ratun Yehuda.”

⁵MAWU nabbisara, “Ei tumana'u Yerusalem, isaite apan umakkanni yamiu? Isaite apan massusa suadio'a ringanni yamiu? Isaite apan umotongnga maiwal᷊on ola'i yamiu?

⁶I yamiu buatte nanol᷊a'a wuṛṛu nanantang-Ku, ana waugu udde i Ya'u namatten lima-U ipakkimunsa'a si yamiu, ana waugu i Ya'u nawusate maṛṛaddannu asasa'u-U.

⁷Suapan soa su wanua indi i yamiu sarun Ta'u iramme ere wal᷊a'a. Salaiwe i yamiu uma-U arawe i Ya'u mamate si yamiu wuṛṛu al᷊aṛṛanangngu ana waugu i yamiu maddiri mamal᷊u ola'u pabbiaṛṛannu.

⁸Wanuanu sarun mapenen inawal᷊uanna, lumebbe wuassu anne su apanne anambone. Manga taumata sarun Ta'u pateanna sutempo ta'e umbasanna na'oman sara inangngi mangitou massusa. Sutempo allo i Ya'u mandanta sangkatou taṛṛa pate si mangitou ma'oman sara i mangitou maapendamma atata'utta wuṛṛu ussinggawangnga.

⁹Inangnga apan niawul᷊ianni siri pitu umbasanna napinsanna ana waugu sasangngone maautta. Allon pabbiaṛṛanne nabbal᷊ite marandumma, i tou ereola'u haggeloanna wuṛṛu pappansilianna. Manga seennu Ta'u irolokka iapapate apan ta'e wiakka suwallatti yamiu. I Ya'u, MAWU, buatte nabbisara.”

¹⁰Soewe atonna i ya'u indi! Apa hunane inangku nanungkangku? Ringannu anambon taumata su wanua indi i ya'u mangke uatatiakka wuṛṛu uawawisara. Salaiwe i ya'u tawe saran paassa napawallassa wuṛṛu nabballassa, arawe i ya'u niwontohannu anambon taumata.

¹¹MAWU, amungkangngu i ya'u atonna tawe ma'ola'a manara'u ringannu mapia, wuṛṛu tawe manamba'a manga seetta su saruan-Nu sutempo i mangitou naasomba silaka wuṛṛu asasusa, wala'e wontogga wuassu manga taumata mariaddi atonna-tonna. (

¹²Tawe saran sangkatou apan wotongnge maapaddi atta'a lembonete atta'a wuassu sawannakka apan buatte nilo'annu witu'a.)

¹³MAWU nabbisara si ya'u, “I Ya'u sarun mandolokku seetta iapaṛṛootta pa'aala wuṛṛu darotongngu uma-U maola'a ṛuumanna su manga rosan mangitou su ahewallu wanua.

¹⁴Su wanua waine apan awagananni mangitou, i Ya'u sarun ma'ola'a si mangitou allangngu manga seetti mangitou, ana waugu asasa'u-Ku nilumambalante ere putungnga sussal᷊oi wuṛṛu tawe iapaddumma.”

¹⁵Wua'udde i ya'u nabbisara, “MAWU, I'o ma'asunna. Naungewe, wuṛṛu ontol᷊ewe i ya'u. Wal᷊isete i mangitou apan mangngenggenna wuṛṛu mangngallangnga si ya'u. Ariewe tumaniten masabbare si mangitou ma'oman sara i mangitou wotongnge maapate si ya'u. Naungete manungku ana waugu I'o i ya'u nial᷊uandahanna.

¹⁶I'o mabbisara si ya'u, wuṛṛu naddaringikka suapan iwisara-Nu. I ya'u tatahuanannu, oh MAWU Ruata Apan Lembontaṛṛino, ana waugu udde manga wisara-Nu ma'al᷊uassa wuṛṛu maalal᷊umanna'a si ya'u.

¹⁷I ya'u tawe suadio'a mallal᷊umanna'a ringannu manga taumata apan uaammulla mallal᷊akkangnga. Ana waugu matuṛṛutta Si'o, ne i ya'u nanginsassa ringannu apendamma massa'u.

¹⁸Anio i ya'u sidutu mangke uatataṛṛangnga? Anio lessa'u mangke tawe mapia? Apa I'o pia pandumma mangaddio'a naungku ere sal᷊ukka apan nabbal᷊i mamara sutempon paddissa?”

¹⁹MAWU sinumimbakka, “Amungkangngu i'o mabbelengnga, i Ya'u sarun manarimmannu. I'o sarun maola'a allang-Ku apia. Amungkangngu i'o mabbatti'u manga inolaanna apan mahuna wuṛṛu wal᷊ine awusu, ne i'o wotongnge maola'a nabi-U apia. Manga taumata sarun dumanta apia ringannu, wuṛṛu i'o tate inai ringanni mangitou.

²⁰I'o sarun Ta'u olaanna ere tanda'a witu'a su saruanni mangitou. I mangitou sarun mamangalo si'o, arawe tawe mapamaddonu. I Ya'u sarun uaṛundinganna tadea'u mallu'adda wuṛṛu manal᷊amatta si'o.

²¹I Ya'u sarun mamallonu wuassu taṛṛino manga taumata lal᷊eo apan maṛṛagissa. I Ya'u, MAWU, buatte nabbisara.”