Read Talaud YEREMIA 16 Bible Online

YEREMIA 16 - Talaud bible

YEREMIA 16

¹MAWU nabbisara apia si ya'u, wisara-Ne,

²“Arie pa'awingnga wuṛṛu maasomba ana'a sutampa indi.

³Sarun Ta'u iwal᷊o si'o apa apan sarun mariaddi ringannu manga al᷊aṛṛana'a apan masungkangnga isindi wuṛṛu ringannu haggurangnge.

⁴I mangitou sarun mate amatannu sa'itta apan mangipiddi mangitou su papate, wuṛṛu i mangitou sarun mate sulal᷊ummu pangalo ara'e maten al᷊aṛṛutumma. Tawe saran sangkatou apan lumuai ara'e mallabbingngi mangitou. Winal᷊unanni mangitou sarun massal᷊iawukka ere pupukka su leta'a, wuṛṛu inasannu manu'u winalanganna wuṛṛu winatangnga mal᷊aṛṛaga.

⁵Arie inai su wal᷊en taumata apan tantal᷊anna lullal᷊o, Yeremia. Arie lumal᷊on sisai-sai. I Ya'u tate lai mangal᷊amatta uma-U ringannu lal᷊umanna'a, wuṛṛu tate lai mamasilon apendamma u'akkanna ara'e tatal᷊antuppa si mangitou.

⁶Taumata ala wuṛṛu taumata asiangnga su wanua indi sarun mate ringannu taweddu mallabbingngi mangitou. Taweddu saran sangkatou apan manansara watanganne ara'e mallunggukka puanne tatialan lullal᷊o mangitou.

⁷Taweddu lai apan mappulu ma'ola'a andeangnga ipallimbatta taumata apan tantal᷊anna lullal᷊o. Taweddu lumal᷊o suadio'a ewe'e lai ringannu taumata apan niawul᷊iannu iamangnga ara'e inangnga.

⁸Arie passutta su wal᷊en taumata apan tantal᷊anna ma'ola'a andeangnga. Arie paanna ara'e ma'inumma ringanni mangitou.

⁹Paddaringikke si Ya'u, MAWU Apan Lembontaṛṛino, Ruatan Israel, indete mabbisara si'o. Tingikku al᷊al᷊uassa wuṛṛu lal᷊ala'a su andeangngu awingnga Ta'u iapaal᷊annabba abbi. Olangnge udde sarun aellehannu manga taumata wiakka sutempo udde.

¹⁰Napawe i'o mamasingkattu sarangkanambone indi si mangitou, asinungka i mangitou sarun maiwal᷊o anio i Ya'u makkuumanni mangitou aroddi ahewalle. I mangitou sarun maiwal᷊o apa pasasal᷊a wuṛṛu rosa mangitou si Ya'u, MAWU Ruata mangitou.

¹¹Wal᷊oa'e si mangitou manungku i Ya'u nabbisara arendi, ‘Al᷊amonanu buatte nanantang-Ku inai massubba wuṛṛu mattaṛṛamawu manga mawu waine. I mangitou tuttal᷊iudda si Ya'u wuṛṛu maddiri tumuṛṛutta manga atorang-Ku.

¹²Arawe i yamiu ma'ola'a lembon al᷊al᷊eone lai. Puang kamiu maattikka wuṛṛu tumba'u tuttuṛṛutta apulunu sassane apan dal᷊eo. I yamiu tawe tumuṛṛutta si Ya'u.

¹³Ana waugu udde, i yamiu sarun Ta'u limbuaṛṛanna wuassu wanua indi wuṛṛu Ta'u iramme su sambau wanua apan awagananni yamiu wuṛṛu al᷊amonanu. Poiaroddi i yamiu sarun mattaṛṛamawu allo ṛabbi su manga mawu waine, wuṛṛu i Ya'u tate umakkanni yamiu. ’ ”

¹⁴MAWU nabbisara, “Sarun a'omanna tempone taumata tate lai massalu ringannu arang-Ku, Ruata apan biakka, apan nangapiddu umattu Israel sinumabbangnga wuassu Mesir,

¹⁵ewe'e ringannu arang-Ku, Ruata apan biakka, apan nangapiddu umattu Israel sinumabbangnga wuassu sambau wanua su sawannakka wuṛṛu wuassu anambon banua waine suapa i mangitou buatte Ta'u nisal᷊iawukka. I mangitou sarun Ta'u iapidda apia watukku leta'i mangitou, wanua apan buatte Ta'u nionggolla su al᷊amona mangitou.”

¹⁶MAWU nabbisara, “I Ya'u sarun mamaggo manambo samakka iapasametta manga taumata indi. Wua'udde i Ya'u mamaggo manambo matataṛṛia su iapasametta si mangitou suapan bowone wuṛṛu wuidda, wuṛṛu su manga loṛṛangngu wuidda watu.

¹⁷I Ya'u naasilo al᷊awo'a apan a'olaanni mangitou. Taweddu uawuni si Ya'u; manga rosan mangitou lai buatte niasiloang-Ku.

¹⁸Rosa wuṛṛu al᷊al᷊eo mangitou sarun Ta'u iwal᷊issa ringannu ṛuumanna paarua anambone, ana waugu i mangitou buatte nandal᷊eo wanua-U ringannu manambo paal᷊uanna. Manga paal᷊uanna udde tawe niawane ere asuangnga.”

¹⁹MAWU, ete I'o apan ual᷊u'adda si ya'u wuṛṛu nangonggollu atatohassa si ya'u; I'o nantul᷊ungku sutempon asasusa. Manga walahanna wuassu pentakku runia sarun dumanta ringan-Nu wuṛṛu mabbisara, “Al᷊amonan kami tumba'u pia mawu awusu apan mangke tawe gunane.

²⁰Wotongngewe taumata ma'ola'a mawune sassane? Tantu tawe! Apan olaanne udde tantu wal᷊ine Ruata.”

²¹“Ana waugu udde,” unnu MAWU, “paassa indi Ya'u sarun ma'ola'a manga walahanna maapendamma taṛṛino wuṛṛu atatoha-U tadea'u saran mal᷊annu-l᷊annu i mangitou sarun maasingkatta manungku ete i Ya'u MAWU.”