Read Talaud YEREMIA 18 Bible Online

YEREMIA 18 - Talaud bible

YEREMIA 18

¹MAWU nabbisara si ya'u,

²“Roote watukku wal᷊en mandarunna urinna; poiaroddi sarun Ta'u iapasingkatta si'o tanata-U.”

³Ne i Ya'u inaite watukku wal᷊en mandarunna urinna wuṛṛu i Ya'u naasilo i tou tantal᷊anna mammanara ringannu pakakanne.

⁴Napawe urinna apan mammanaranne udde ta'e lal᷊eo, i tou mammanara apia mabbal᷊i urinna apan baine, uasul᷊ungngu ere ipa'apulune.

⁵Wua'udde MAWU nandolo'u mamasingkatta su taumatan Israel,

⁶“Ei uma-U, ṛatadde i Ya'u tawe maal᷊anginna si yamiu ere apan niola'u mandarunna urinna udde ringannu leta'a maddeetta? Ere leta'a mareetta sulal᷊ummu liman mandarunna urinna, aroddi lai i yamiu sulal᷊ummu lima-U.

⁷Napawe su sambau tempo i Ya'u makkawessa mamate, maṛṛa'a wuṛṛu makkimunsa'a sambau walahanna ara'e araratuanna,

⁸ana see walahanna udde mawal᷊u wuassu rosane, ne i Ya'u sarun tawe mapaamattu apulu-U udde.

⁹Mawal᷊i'a, napawe i Ya'u makkawessa mamangunna ara'e manohassa sambau walahanna ara'e araratuanna,

¹⁰arawe wua'udde walahanna udde tawe tumuṛṛutta si Ya'u wua'udde ma'ola'a al᷊al᷊eo, ne pandumang-Ku sarun tawe ipariaddi.”

¹¹MAWU nabbisara si ya'u, “Orassa indi, wal᷊oa'e su manga taumatan Yehuda wuṛṛu tumana'u Yerusalem manungku i Ya'u tantal᷊anna makkiinna mando'appa si mangitou, wuṛṛu mannaddiate ṛuumanna ionggolla si mangitou. Doloṛṛa'e i mangitou mangaddon ola'u pabbiaṛṛanni mangitou apan marosa udde see mangapia pallal᷊agu wuṛṛu inolaanni mangitou.

¹²Arawe i mangitou sarun sumimbakka, ‘Apa hunane? I yami sidutu mannan tuṛṛutta apulung kami sassane! I yami sambau-sambau sarun ma'ola'a apulun naungngi yami apan dal᷊eo!’ ”

¹³MAWU nabbisara, “Iwal᷊oi su anambon balahanna apa buatte nariaddi olangnge ereudde. Umattu Israel buatte na'ola'a sambau inolaanna apan ma'ata'utta!

¹⁴Tawe saran paassa salju mawul᷊i wuassu wowone watu su Libanon. Tawe saran paassa ua'e masunge apan mangngelekka su panenteanna mabbal᷊i mamara.

¹⁵Arawe uma-U buatte naabul᷊i-U, wuṛṛu mannambunnu amania su paal᷊uanna. I mangitou nitara su lal᷊anna paarorone apan ṛinone amatanni mangitou, wua'udde sinumewadda su lal᷊anna apan taambe nilaukka.

¹⁶Wanua indi buatte niola'i mangitou tampa apan maata'utta, wuṛṛu sarangkal᷊o'enge maola'a aal᷊uandaga. Sarangkanambone apan umamatta sarun mapapa'ilingngu pua ana waugu matta'utta.

¹⁷Ere awu nitiuppu anginna ra'i, etearoddi lai uma-U sarun Ta'u isal᷊iawukka su saruannu seetta. Napawe rumanta asasilaka, i ya'u sarun tumal᷊iudda si mangitou wuṛṛu tawe mangontolla si mangitou!”

¹⁸Taumata mabbisara, “Wette i ite ma'ammulle lumawangnga si Yeremia. Wal᷊ine tumba'u i tou apan botongnge maggahatton Duata. Sidutu sarun pia imam apan botongnge mangonggollu al᷊aṛṛa'a, pia taumata pande apan botongnge mangonggollu tatantiro; wuṛṛu pia nabi apan wotongnge mamasingkatta si ite manga tanata wuassu Ruata. Wette i ite mangalaen tou su mallaṛṛuungnga wuṛṛu lai maddirite maddaringikka manga wisarane.”

¹⁹Ne i ya'u niumal᷊iomanna, “MAWU, daringiṛṛewe aal᷊iomangku; paatutuṛṛewe manga wisaran see'u su ola'u!

²⁰Wotongngewe apapia wal᷊isannu al᷊al᷊eo? Arawe i mangitou buatte naal᷊i loṛṛangnga tadea'u i ya'u mawontolla sulal᷊umme. Naungete manungku i ya'u buatte nanamba'a si mangitou su saruan-Nu, tadea'u I'o tawe masa'u si mangitou.

²¹Arawe orassa indi, MAWU, wala'awe manga ana'i mangitou mate amal᷊unusanna wuṛṛu nate sulal᷊ummu pangalo. Wala'e manga wawinen mangitou awul᷊iannu iamangngu ana'a wuṛṛu ana'a; wala'ewe manga esakka nate ana waugu al᷊aṛṛusa'itta wuṛṛu ingana'a umbasanna nate sulal᷊ummu pangalo.

²²Doloṛṛa'e manana'o rumanta ringannu tawe bawal᷊one su wal᷊e mangitou, ma'oman sara i mangitou mangintul᷊in atata'utta. I mangitou buatte naal᷊i loṛṛangnga tadea'u i ya'u manawo sulal᷊umme, wuṛṛu i mangitou buatte nantaingngu sedda ipanametta si ya'u.

²³Arawe I'o, MAWU, masingkattu sarangkanambone apan ihagol᷊agi mangitou ipanginsue niawa'u. Ana waugu udde, arie mangampungnga si mangitou; arie pamappassa pasasal᷊a mangitou. Puulle i mangitou ma'oman sara manawo. Pandonate si mangitou sulal᷊ummu asasa'u-Nu.”