Read Talaud YEREMIA 19 Bible Online

YEREMIA 19 - Talaud bible

YEREMIA 19

¹MAWU nandolo'u inai niapawalli wensadda, wuṛṛu mangahe manga pira piaṛṛa'u walahanna see manga pira imam apan matatimmadde,

²tadea'u inai suadio'a ringanni mangitou watukku Wawal᷊annu Hinom umamattu Ngara Pasallangannu Beling. Poiaroddi i ya'u ṛinone mangal᷊iata tanata MAWU si ya'u.

³I Ya'u ṛinone mabbisara arendi, “Ei manga ratun Yehuda wuṛṛu tumana'u Yerusalem! Paddaringikka si Ya'u, MAWU Apan Lembontaṛṛino, Ruatan Israel, apan mabbisara si yamiu. I Ya'u sarun mandantan asasilaka apan bahewalla su tampa indi ma'oman sara taumata apan maaringikka ṛumindu'a.

⁴Olangnge udde Ta'u olaanna ana waugu walahanna indi buatte nanantang-Ku. I mangitou nandal᷊eo tampa indi ringannu mangngonggollu sasamba su manga monganna apan awagananni mangitou, awaganannu al᷊amona mangitou wuṛṛu manga ratun Yehuda. I mangitou lai buatte nalloṛṛo tampa indi ringannu daṛṛa manga taumata apan tawe sal᷊ane.

⁵I mangitou napararisikku mezbah si Baal tadea'u pangonggol᷊annu manga ana'i mangitou maola'a sasamba itattambunna, sumbal᷊i Ya'u tawe saran paassa nandolokki mangitou ma'ola'a inolaanna udde, ewe'e lai tawe saran paassa olangnge ereudde lumapputta sulal᷊ummu ṛingirang-Ku.

⁶Ana waugu udde, sarun a'omanna tempone tampa indi tate lai isaggo Tofet ara'e Wawal᷊annu Hinom, Wawal᷊annu Pamamototanna.

⁷Sutampa indi Ya'u sarun manal᷊are anambon hol᷊agu taumatan Yehuda wuṛṛu tumana'u Yerusalem. I mangitou sarun Ta'u iwala iwaddo manga seetti mangitou wuṛṛu pateanna sulal᷊ummu pangalo. Winal᷊unanni mangitou sarun Ta'u iwala inasannu manu'u winalanganna wuṛṛu winatangnga mal᷊aṛṛaga.

⁸I Ya'u sarun maṛṛia'u asasilaka apan wahewalla su soa indi, ma'oman sara suapan taumata apan sumabbi isudde sarun ṛumindu'a wuṛṛu mata'utta.

⁹Seetta sarun maaliwunna soa indi, wuṛṛu maddea'a mamate tumanangnge. Patatalliwunna udde aroddi ahewalle, na'oman sara manga taumata sulal᷊ummu soa indi uaa'inassa hawene, ewe'e lai manga ana'i mangitou sassane.”

¹⁰Wua'udde MAWU nandolo'u niapapesangnga wensadda udde su saruannu manga taumata apan uatantalongnga si ya'u.

¹¹I ya'u ṛinone mamasingkatta si mangitou manungku MAWU Apan Lembontaṛṛino nabbisara arendi, “Walahanna wuṛṛu soa indi sarun Ta'u ṛimunsaanna ma'oman sara maola'a ere wensadda apan napesangnga udde apan tate iasul᷊e apia. Taumata sarun mallabbingngu manga winal᷊unanni mangitou su Tofet, ana waugu tate tampan pallabbinganna waine.

¹²Soa indi ringannu tumanangnge sarun Ta'u olaanna ere Tofet.

¹³Anambon bal᷊e su Yerusalem anambon wal᷊en manga ratun Yehuda sarun mabbal᷊i luhudda ere Tofet; ana waugu su wowon atuppu manga wal᷊en udde taumata buatte nanambunnu amania huna manga monganna su langitta, wuṛṛu nangonggollu anggore su manga monganna waine.”

¹⁴Wua'udde i ya'u nanantangken Tofet, tampa i ya'u nirolokka iapapasingkattu tanata MAWU. I ya'u inaite watukku rallakku Wal᷊en MAWU wuṛṛu dirumarisikke isudde, ana namasingkatta su anambon taumata,

¹⁵manungku MAWU Apan Lembontaṛṛino, Ruatan Israel, nabbisara arendi, “Ana waugu mal᷊awangnga wuṛṛu maddiri maddaringikka, ne i Ya'u sarun mandantan su soa indi wuṛṛu su anambon ampungnga maranine al᷊awo'u asasilaka apan buatte Ta'u nihol᷊aga.”