Read Talaud YEREMIA 20 Bible Online

YEREMIA 20 - Talaud bible

YEREMIA 20

¹Imam Pasyhur ana'i Imer uddewe tembonannu mandariaga Wal᷊en MAWU. Sutempo i tou naaringikka si ya'u mammasingkattu anambon olangnge udde,

²i tou namarenta tadea'u i ya'u puul᷊anna wuṛṛu imantungnga su Ngaran Benyamin, ngara al᷊iurosne su Wal᷊en MAWU.

³Rua'allo manansunna napawe i Pasyhur namallo'u wuasasu mantungnga, i ya'u nabbisara si tou, “Aranna apan ionggollu MAWU si'o wal᷊ine Pasyhur, arawe ‘Pangalo su al᷊awo'u tampa’.

⁴MAWU sassane nabbisara, ‘I'o sarun Ta'u olaanna pangalo su watangannu sassane wuṛṛu su manga hawenu. I'o sarun maasilo i mangitou pateannu seetti mangitou. Anambon taumatan Yehuda sarun Ta'u iwala tataṛṛinoannu ratun Babel; sambageanganna wuassi mangitou sarun iapidde maola'a tawananna watukku Babel, wuṛṛu lambene sarun pateanna.

⁵Seetti mangitou sarun Ta'u iwala lai mangaṛṛo wuṛṛu mangapidda watukku Babel anambon paa'alan soa indi, see lai anambon pussa'ane, ewe'e lai manga saranapa pussa'an ratun Yehuda.

⁶Wuṛṛu i'o, Pasyhur, suadio'a ringannu anambon amonannu lai sarun sametanna wuṛṛu iapidda watukku Babel. Poiaroddi i'o sarun mate wuṛṛu ilabbingnga; aroddi lai anambon hawenu apan buatte naddaringikka manga awusunu.’ ”

⁷MAWU, I'o nassal᷊o'u ne i ya'u niasal᷊o'a. I'o mattohasanna wuassia'u wuṛṛu buatte namaddo'u. I ya'u aal᷊uandahannu manga taumata, haggeloanna wuassu marua'allo naddatingngu wawallo.

⁸Suapan i ya'u mabbisara, i ya'u ṛinone mangintul᷊i ma'ikka-ikkatta, “Araṛṛagissa! Asasilaka!” MAWU, i ya'u haggeloanna wuṛṛu lallobbosanna suapan tempo, ana waugu mammasingkattu tanata-Nu.

⁹Arawe napawe sulal᷊ummu naungku i ya'u mabbisara, “Wala'e MAWU timbul᷊ianangkute, i ya'u maddirite lai maggahatto ringannu aran-Ne,” ne tanata-Nu naal᷊ihidda putungnga apan lukkenggamma sulal᷊ummu naungnga. I ya'u buatte naannamma manaṛṛangnga, arawe inauranna i ya'u tawe auatanna.

¹⁰Niaringiṛṛanna taumata sussal᷊imburunga suapan tampa, “Atata'utta suapan tampa! Wette alaea'e udde siapa pia taṛṛinone!” Ewe'e lai anambon hawe'u ate uaṛṛaddo ananawo'u. Unni mangitou, “Asinungka ringannu sasal᷊o'a, i tou wotongnge iawaddo, tadea'u wotongngete i ite mabbal᷊issa atataddu'u naungnga si tou.”

¹¹Arawe I'o, oh MAWU, uasamba'a si ya'u; I'o lembon matohassa wuṛṛu ma'uatta. I mangitou mangngenggenna wuṛṛu mangngallangnga si ya'u sarun manawo wuṛṛu tawe maailore. I mangitou sarun masili sarangkal᷊o'enge, tate nariaddi anambon hol᷊agi mangitou. Hahelo mangitou udde sidutu sarun nanaunganna.

¹²Arawe, oh MAWU Apan Lembontaṛṛino, ringannu atatul᷊idda I'o nanal᷊u'atta taumata; I'o masingkattu naungnga wuṛṛu ṛingiranni mangitou. Ana waugu udde walaawe i ya'u ma'ellega Si'o mabbal᷊issa al᷊al᷊eon seetta ana waugu tumba'u Si'o ta'u itantilla hatto'u.

¹³Pangantarite su MAWU wuṛṛu paddalote si Tou ana waugu i Tou namallossu taumata niallangnga wuassu taṛṛinon taumata mapotol᷊osanna.

¹⁴Niawontohante allo niasungkangangku! Wala'e nahelo tempone i ya'u nisungkangngu inangku.

¹⁵Niawontohante lai mangangapiddu watti'a apan naaola'a iamangku lembon lulluassa, sutempo niapasingkatta si tou, “I'o maasomba sangkatou ana'a esakka!”

¹⁶Wala'e i mangangapiddu watti'a udde ere manga soa apan niṛṛimunsa'u MAWU ringannu tawe aakkanna. Wala'e i tou maaringikka auaren atataddu'a su tempo marua'allo, wuṛṛu hahoressan pangalo su allattune.

¹⁷Ana waugu i tou tawe namate si ya'u sutempo i ya'u ta'e sulal᷊ummu illoṛṛo, tadea'u i ya'u sidutu sulal᷊ummu illoṛṛon inangku wuṛṛu illoṛṛone si ya'u mabbal᷊i labbingku.

¹⁸Anio i ya'u ṛinone iasungkangnga? Tumba'u iapaasusa wuṛṛu iapaasahadda? Wuṛṛu tadea'u wia'u mal᷊iudda sidutu mangke sulal᷊ummu asasili?