Read Talaud YEREMIA 21 Bible Online

YEREMIA 21 - Talaud bible

YEREMIA 21

¹I Zedekia ratun Yehuda nandolokka ringangku i Imam Pasyhur ana'i Malkia, wuṛṛu Imam Zefanya ana'i Maaseya. I tou nandolokki tarua niapapasingkatta si ya'u darorongnga indi,

²“Paddorongke tatantiro wuassu MAWU si ite, ana waugu i Nebukadnezar ratun Babel ringannu tantarane tantal᷊anna malliwunna soang kite. Asinungka MAWU sarun ma'ola'a al᷊aṛṛindu'a si ite, wuṛṛu mamata'i Nebukadnezar mantal᷊angngu tantarane.”

³Wua'udde MAWU nabbisara si ya'u, ne i ya'u nandolokku manga taumata apan nirolokka udde

⁴mamasingkatta si Zedekia manungku MAWU, Ruatan Israel, nabbisara arendi, “Zedekia, i Ya'u sarun mamaddon tantaranu apan tantal᷊anna uapapangalo mando'appa ratun Babel wuṛṛu tantarane. Manga ahiddu tantaranu sarun Ta'u iammulla su pattangngannu soa.

⁵I Ya'u sassane sarun mamangalo si yamiu ringannu ahewallu auatanna ringannu asasa'u apan nangillembo.

⁶Tumana'u soa indi sarun Ta'u pateanna; mawae ete taumata aroddi lai winatangnga sarun mate ana waugu al᷊aṛṛusa'itta apan bahewalla.

⁷I'o wuṛṛu manga mammamanaran araratuannu see manga taumata apan naatal᷊angnga wuassu pangalo, ṛutumma wuṛṛu al᷊aṛṛusa'itta, sarangkanambone sarun Ta'u iwala sametanni Ratu Nebukadnezar wuṛṛu manga seetta apan mappulu mamate si yamiu. I Nebukadnezar sarun mamate si yamiu sarangkanambone ringannu tawe ampungnge wuṛṛu tawe aakanne. I Ya'u, MAWU, buatte nabbisara.”

⁸Wua'udde MAWU nandolo'u nabbisara arendi lai su uman-Ne, “Paddaringikke, i Ya'u, MAWU, nangonggolla si yamiu sambau iapapile: lal᷊anna apan mattuddan pabbiaṛṛanna, ara'e lal᷊anna apan mattudan papate.

⁹Suapan taumata apan uatana'a sulal᷊ummu soa sarun mate ana waugu pangalo, ṛutumma, al᷊aṛṛusa'itta. Arawe i mangitou apan sinumabbangnga nanantillu watanganne su taumatan Babel apan tantal᷊anna mammangalo soa indi, sarun mal᷊iu wuṛṛu tawe pateanna.

¹⁰I Ya'u buatte nakkawessa makkimunsa'a soa indi, wuṛṛu tawe umakkanne. Soa indi sarun itantilla su ratun Babel; i tou sarun manoṛṛobba ma'oman sara mepodda. I Ya'u, MAWU, buatte nabbisara.”

¹¹MAWU nandolo'u mamasingkattu tanata indi su amonanni ratun Yehuda, papapulunni Daud: “Paddaringikke si Ya'u, MAWU, mabbal᷊o. Pattinsahadde tadea'u atatul᷊idda sidutu ia'amatta miallo-miallo. Pallosa'e taumata apan a'allanganna wuassu taumata apan mangngallangnga. Amungkangngu tawe ne al᷊al᷊eo apan a'olaannu sarun mandantan asasa'u-U sussal᷊oi ere putungnga apan tawe iapaddumma.”

¹³Wua'udde MAWU nabbisara su Yerusalem, “Ei Yerusalem! Addonu mattanggaṛṛanna wuassu manga wawal᷊anne maraninu. I'o naal᷊ihidda wuidda watu apan uapasi'a matanggakka su wadda'a ratakke. I'o mabbisara manungku tawe saran sangkatou apan botongnge mamangalo si'o ara'e manggohakke manga tanda batunu,

¹⁴arawe i Ya'u sarun makkuumannu ana waugu inolaannu. Wal᷊en araratuannu sarun Ta'u soṛṛowanna, wuṛṛu al᷊awo'a maranine sarun masoṛṛobba lai. I Ya'u, MAWU, buatte nabbisara.”