Read Talaud YEREMIA 25 Bible Online

YEREMIA 25 - Talaud bible

YEREMIA 25

¹Su tonna aiappanne napawe i Yoyakim ana'i Yosia naola'a ratun Yehuda, i ya'u naasomba tanata wuassu MAWU su ola'u anambon balahannu Yehuda. Tempo udde tonna paarorone napawe i Nebukadnezar naola'a ratun Babel.

²I ya'u nabbisara su anambon walahannu Yehuda wuṛṛu tumana'u Yerusalem,

³“Al᷊annune ruan pul᷊o su tonnane, ro'en tonna mapul᷊o tallu ro'en i Yosia ana'i Amon uaparenta Yehuda, naddatingngu allo indi, MAWU buatte nabbisara si ya'u wuṛṛu tate lai maabul᷊i mamasingkatta si yamiu apa apan buatte niwisara-Ne. Arawe i yamiu maddiri maddaringikka.

⁴MAWU lai sidutu mandoloka ringanni yamiu manga allang-Nge, arawe i yamiu tawe maddaringikka wuṛṛu tawe mappandumma si mangitou.

⁵I mangitou mandolokki yamiu manatangngu ola'u pabbiaṛṛannu apan dal᷊eo, wuṛṛu manga inolaannu apan ma'arosa, tadea'u i yamiu wotongnge sidutu uatana'a su wanua indi apan buatte nionggollu MAWU si yamiu wuṛṛu al᷊amonanu maola'a pussa'a.

⁶Manga nabi udde manningaddi yamiu massubba wuṛṛu mattaṛṛamawu mawu waine. I mangitou manningaddi yamiu massubba manga paal᷊uanna lanna'u limanu sassane, ana waugu olangnge udde ma'asa'u MAWU. Amungkangngu i yamiu tuttuṛṛutta parenta MAWU udde, i Tou tawe makkuumanni yamiu.

⁷Arawe MAWU sassane nabbisara manungku i yamiu tawe maddaringikka si Tou. I yamiu ewe'e napaarantan asasa'u-Ne ana waugu manga paal᷊uannu udde. Ete i yamiu sassane apan nandatan ṛuman-Ne su watangannu sassane.

⁸Ana waugu i yamiu maddiri maddaringikka manga wisara-Ne, ne MAWU Apan Lembontaṛṛino nabbisara,

⁹‘I Ya'u sarun mamaggo anambon balahanna wuassu sawannakka, wuṛṛu lai allang-Ku, i Nebukadnezar ratun Babel. I mangitou sarun Ta'u parentanna iapapangalo mando'appa Yehuda wuṛṛu tumanangnge see lai al᷊awo'u walahanna maranine. Walahannu Yehuda suadio'a ringannu manga walahanna al᷊indonganne sarun Ta'u pateanna wuṛṛu Ta'u iwala maṛṛimunsa'a saran mal᷊annu-l᷊annu. Manga taumata apan naasilo udde sarun ṛumindu'a wuṛṛu maapendamma atata'utta. I Ya'u, MAWU, buatte nabbisara.

¹⁰Manga tingikki mangitou apan lullala'a wuṛṛu ramean andeangngu awingnga sarun Ta'u iapaaddo. I mangitou sarun tawe maatahuanna lana ipande'omma sol᷊o, wuṛṛu gandummi mangitou sarun masue.

¹¹Ahewallu wanua indi sarun Ta'u iwala maṛṛimunsa'a wuṛṛu mabbal᷊i mal᷊annabba. Manga walahanna maranine sarun mattaṛṛamawu ratun Babel pitun pul᷊o su tonnane al᷊annune.

¹²Wua'udde i Ya'u sarun makkuumannu walahannu Babel wuṛṛu ratune ana waugu rosa mangitou. Wanuan Babel sarun Ta'u iṛṛa'a wuṛṛu Ta'u iwala naṛṛimunsa'a saran mal᷊annu-l᷊annu.

¹³Babel sarun Ta'u iṛṛuumanna ringannu anambon asasilaka apan buatte Ta'u niṛṛiinna su manga walahanna wuṛṛu apan buatte Ta'u niapasingkatta wuassi Yeremia — eteudde anambon asasilaka apan uawoṛṛetta sulal᷊ummu buke indi.

¹⁴Manga inolaannu taumatan Babel sarun Ta'u wal᷊isanna; i mangitou sarun allangngannu manga ratu wahewalla wuṛṛu anambon balahanna.’ ”

¹⁵MAWU, Ruatan Israel, nabbisara si ya'u, “Panganute halasin anggore indi apan buatte nilloṛṛoannu anggoru asasa'u-U. Apira'e su al᷊awo'u walahanna watukkuapa i'o Ta'u irolokka, wuṛṛu i mangitou doloṛṛa'e painuma'a anggore indi.

¹⁶Napawe i mangitou ma'inumma anggore udde, i mangitou mabbal᷊i sumassendekka wuṛṛu awul᷊ianten ṛingidda ana waugu pangalo apan Ta'u iaparanta si mangitou.”

¹⁷Ne i ya'u nanengkamma halasin anggorre udde wuassu lima MAWU, wuṛṛu inaite ringannu anambon balahanna watukkuapa MAWU buatte nandolo'u, ana see i ya'u napa'inummi mangitou anggore udde.

¹⁸Yerusalem wuṛṛu anambon soa su Yehuda, suadio'a ringannu manga ratu wuṛṛu manga tembonannu araratuanna, Ta'u onggol᷊annu anggore udde, ma'oman sara i mangitou mabbal᷊i ere wadda'a apan mamara wuṛṛu ma'ata'utta. Naddatingngu allo indi aranni mangitou ipappaatta ipammontoga.

¹⁹Eteindi manga arannu manga taumata waine apan ṛinone ma'inumma wuassu halasin anggoru MAWU udde: ratu Mesir ringannu manga mammamanarane wuṛṛu tembonannu araratuanna; anambon taumatan Mesir wuṛṛu taumata raho su Mesir; anambon ratu su wanua Us; anambon ratu su manga soa Filistin su Askelon, Gaza, Ekron; anambon taumata apan ta'e wiakka su Asdod; anambon taumatan Edom, Moab wuṛṛu Amon; anambon ratu su Tirus wuṛṛu Sidon; anambon ratu su wageangngu apannu Tahal᷊oangngu Tangngane; manga soa Dedan, Tema, wuṛṛu Bus; anambon taumata apan mammol᷊o utangnge maautta; anambon ratun Arab; anambon ratun manga ṛuanganna nallal᷊o'a apan uatana'a su wadda'u anne; anambon ratu su Zimri, Elam, wuṛṛu Madai; anambon ratu su sawannakka, marau wuṛṛu marani, sangkatou ringannu sangkatou. Al᷊awo'u walahanna su ahewallu runia ṛinone ma'inumma anggore udde. Wuṛṛu taumata panginsueanne apan ṛinone ma'inumma anggore udde eteu(...)

²⁷Wua'udde MAWU nabbisara si ya'u, “Wal᷊oa'e su manga taumata udde manungku i Ya'u, MAWU Apan Lembontaṛṛino, Ruatan israel, nandolokki mangitou ma'inumma ma'oman sara iwu'anne wuṛṛu mammuta. I mangitou Ta'u olanna mal᷊iundu'a wuṛṛu tate maapabbangunna apia ana waugu pangalo apan Ta'u niaparanta si mangitou.

²⁸Wuṛṛu amungkangngu i mangitou maddiri manengkamma halasi udde wuassu limanu tadea'u pa'inummanna anggore, wal᷊oa'e manungku MAWU Apan Lembontaṛṛino buatte namarentan olangnge udde.

²⁹I Ya'u sarun manattakku panganguno udde su soa-U sassane. Arie ma'oman sara i mangitou massunna manungku i mangitou tawe iṛṛuumanna. I mangitou sarun iṛṛuumanna ana waugu i Ya'u sarun mandantan pangalo su al᷊awo'u walahanna su ahewallu runia. I Ya'u, MAWU Apan Lembontaṛṛino, buatte nabbisara.

³⁰Sarangkanambone apan buatte Ta'u niwal᷊o si'o, ṛinone iapasingkannu. Wal᷊oa'e si mangitou, ‘Tingikku MAWU ruddallu'a wuassu surga; wuassu araratuan-Ne apan na'ukkassa i Tou ruddallu'a mando'appa uman-Ne. Anambon tumana'u runia naaringikka i Tou nanggoressa naal᷊ihidda mammamanara apan mammakkan anggore sutampa paṛṛindanna anggore.

³¹Naddatingngu pentakku runia tingik-Ke nunnalunna; MAWU na'ola'a hatto su saruannu manga walahanna. Anambon taumata sarun parikisanna wuṛṛu iapa lal᷊eo sarun iṛṛuumanna pateanna.’ ”

³²MAWU Apan Lembontaṛṛino nabbisara, “Wuassu manga pentakku runia anginna ma'ikkatta sussal᷊induṛṛunga; asasilaka naṛṛia'a su manga araratuannu sambau-sambau.”

³³Su allo udde winal᷊unannu manga taumata apan nipate MAWU uatal᷊eṛṛongnga su ahewallu runia. I mangitou tawe luaianna, tawe lai wengketanna ilabbinga, arawe iwala aroddi su leta'a ere sapadda ua'ombo.

³⁴Ei manga piaṛṛa'a, ei manga mallal᷊u'addu umattu MAWU! Luaite pa'ikka-ikkatta! Tattal᷊inggite su awu, ana waugu nia'omante tempone i yamiu pateanna, wuṛṛu iapa naal᷊assanga sarun isal᷊iawukka. I yamiu naal᷊ihidda ere wensadda maarega apan nanawo see napesangnga.

³⁵I yamiu sarun tawe maal᷊assanga.

³⁶I yamiu sussal᷊iomanna wuṛṛu lulluai ringannu massusa ana waugu MAWU sulal᷊ummu asasa'u-Ne buatte namate walahannu see nakkimunsa'a manga wanuanu apan mal᷊angnganna udde.

³⁸Naal᷊ihidda singa sinumabbangnga wuassu loṛṛangnge, aroddi lai MAWU sumabbangnga makkuumannu uman-Ne. Araṛṛagissu pangalo wuṛṛu asasa'u MAWU buatte namal᷊u wanua indi naola'a wadda'u anne.