Read Talaud YEREMIA 26 Bible Online

YEREMIA 26 - Talaud bible

YEREMIA 26

¹Tawe nal᷊annu napawe Yoyakim ana'i Yosia naola'a ratun Yehuda,

²MAWU nabbisara si ya'u, “Roote darisikka su rallakku Wal᷊e-U wuṛṛu pabbisarate su tumana'u Yehuda apan uddanta mattaṛṛamawu isudde. Wal᷊oa'a si mangitou sarangkanambone apan Ta'u nirolokka si'o tadea'u iapasingkatta si mangitou. Arie hainganna sarang kaddio'a.

³Asinungka walahanna udde maddulu maddaringikka, ana see maddote ma'ola'a al᷊al᷊eo, ma'oman sara i Ya'u tate manakkuttu apulu-U eteudde manilaka si mangitou uasul᷊ungngu inolaanni mangitou apan dal᷊eo.”

⁴MAWU nandolo'u mabbal᷊o ereindi si mangitou, “I Ya'u, MAWU, buatte namarenta tadea'u i mangitou tumuṛṛutta si Ya'u wuṛṛu mappaamattu manga tita apan buatte Ta'u nionggolla si yamiu.

⁵I yamiu ṛinone lai maddaringikka apan apan niwal᷊on allang-Ku, manga nabi apan sidutu Ta'u niorolokka ringanni yamiu. Arawe i yamiu maddiri maddaringikka si mangitou.

⁶Amungkangngu i yamiu sidutu uatatana'a lullawangnga, wal᷊en patataṛṛamawuanna indi sarun Ta'u olanna ere Silo, na'oman sara anambon araratuanna su runia mappaattu arannu soan Yerusalem indi maola'a wawontoga.”

⁷Anambon apan niwisara'u su Wal᷊en MAWU udde niraringiṛṛannu manga imam, manga wuṛṛu tumana'u soa.

⁸Tawe nal᷊annu napawe i ya'u buatte namasingkattu anambon tanata MAWU ere buatte niparenta MAWU, i mangitou nanametta si ya'u lapiddu mangngintul᷊i, “I'o ṛinone nate!

⁹Waṛṛani atonna i'o mabbisara sulal᷊ummu arannu MAWU manungku Wal᷊en-Ne indi sarun maola'a ere Silo, wuṛṛu amungkangngu soa indi sarun ṛimunsaanna wuṛṛu maola'a tampa apan tawe atanaanna lai.” Wua'udde niṛṛimpulanannu awadaalla.

¹⁰Sutempo manga tembonannu araratuannu Yehuda naaringikka apa apan buatte nariaddi, i mangitou nasasaṛṛawutta sinumabbangnga wuassu wal᷊en araratuanna ana see inaite watukku Wal᷊en MAWU, wuṛṛu niuma'ianna su Ngara Pasallanganna Wakku.

¹¹Manga imam wuṛṛu manga nabi nabbisara su manga tembonanne udde wuṛṛu su tumanangnge, “Taumata indi ṛinone iṛṛuumanna pateanna ana waugu buatte napasabbangngu manga wisara apan lullawangnga soang kite indi. I yamiu sassane buatte naaringikka si tou.”

¹²Wua'udde i ya'u nabbisara, “Ete MAWU apan nandolo'u niapapasingkattu tanata apan lullawangnga Wal᷊en MAWU wuṛṛu soa indi ere buatte niaringiṛṛanni yamiu.

¹³Ana waugu udde, pamal᷊ute ola'u pabbiaṛṛannu wuṛṛu manga inolaannu; paatuṛṛutte MAWU Ruatanu, tadea'u i Tou marru'udden ṛiin-Ne ipanilaka si yamiu.

¹⁴Su ola'u watangangku, atonna sulal᷊ummu taṛṛinonu ipa'ola'a manga apa tumuṛṛuttu apulunu.

¹⁵Arawe naunge, amungkangngu i yamiu mamate si ya'u, i yamiu wuṛṛu tumana'u soa indi sarun mamasanna pasasal᷊a su pamamate taumata apan tawe sal᷊ane. Ana waugu, ete MAWU apan nandolo'u mamasingkattu tataggu udde si yamiu.”

¹⁶Ne manga tembonannu araratuanna wuṛṛu tumanangnge nabbisara su manga imam wuṛṛu manga nabi udde, “Taumata indi mabbisara ringannu arannu MAWU Ruatan kite; tawe su ṛinone i tou iṛṛuumanna pateanna.”

¹⁷Wua'udde manga pira suwallattu piaṛṛa'u walahanna dirumarisikka su saruanne wuṛṛu nabbisara su manga taumata apan uaammulla isudde,

¹⁸“Sutempo i Hizkia naola'a ratun Yehuda, i Nabi Mikha wuassu Moresyet namasingkatta su tumanangnge wisara indi wuassu MAWU Apan Lembontaṛṛino, ‘Sion sarun pajekoanna ere wailla, Yerusalem sarun maola'a winal᷊al᷊anna, wuṛṛu wuiddu Wal᷊e MAWU sarun mabbal᷊i mahurangnge.’

¹⁹Arawe i Ratu Hizkia wuṛṛu taumatan Yehuda tawe namate si Mikha. I Hizkia ewe'e lai nata'uttu MAWU wuṛṛu naiakkanna. Ne MAWU tate nanakkuttu asasa'u-Ne ipanilaka si mangitou. Wuṛṛu orassa indi, eteaddio'a i ite mandantan asasilaka apan wahewalla su watanganni ite.”

²⁰Buatte lai sangkatou waine nabbisara mannal᷊are soa wuṛṛu walahanna indi ringannu arannu MAWU, ere buatte ta'u niola'a. Taumata udde aranne i Uria ana'i Semaya wuassu Kiryat-Yearim.

²¹Sutempo i Ratu Yoyakim susambau ringannu manga tembonannu tantarane wuṛṛu manga tembonannu araratuanna naaringikka manga wisaran Uria, ratu naddea'a lal᷊anne mamate si tou. Arawe i Uria naaringikka olangnge udde nabbal᷊i nata'utta ana see tinumal᷊angnga watukku Mesir.

²²Arawe i Ratu Yoyakim nandolokki Elnatan ana'i Akhbor susambau ringannu manga pira taumata waine inai watukku Mesir wuṛṛu mangal᷊appa si Uria.

²³Ana see i mangitou nangapiddi tou mabbelengna ringanni Ratu Yoyakim. Wua'udde ratu nandolokka niapapate si tou, wuṛṛu winal᷊unanne niramme su labbingngu awadaalla.

²⁴Arawe orassa indi, ana waugu al᷊amattu patatul᷊ungngi Ahikam ana'i Safan, i ya'u Yeremia tawe nitantilla su tumana'u wanua niapapate.