Read Talaud YEREMIA 27 Bible Online

YEREMIA 27 - Talaud bible

YEREMIA 27

¹Tawe nal᷊annu napawe i Zedekia ana'i Yosia naola'a ratun Yehuda, MAWU nandolo'u

²niapaandongngu manga tal᷊i wuassu pisi wuṛṛu pasanganna wuassu alu, wuṛṛu niandangnga su pal᷊u'a'u.

³I ya'u lai nandolo'u mamasingkattu tanata-Ne su manga ratun Edom, Moab, Amon, Tirus wuṛṛu Sidon, ringannu nitanata su manga daroloṛṛanni mangitou apan buatte nirumanta su Yerusalem mattembo si Ratu Zedekia.

⁴I ya'u ṛinone mamasingkatta si mangitou manungku MAWU Apan Lembontaṛṛino, Ruatan Israel, nabbisara,

⁵“Ringannu taṛṛino-U apan bahewalla wuṛṛu ringannu atatoha-U i Ya'u wotongnge mangonggolla sisai-sai apan ipaapulu-U.

⁶Ete i Ya'u apan buatte nanantillu al᷊awo'u walahanna indi sulal᷊ummu taṛṛinon allang-Ku, Nebukadnezar ratun Babel. Ewe'e winatangnga lai buatte Ta'u nitantilla si tou iapapiara.

⁷Al᷊awo'u walahanna sarun mattaṛṛamawu si tou, su parinsine, wuṛṛu su pulunne maddatingngu tempone araratuanne sassane manawo. Sutempo udde walahannu Babel sarun mattaṛṛamawu su manga walahanna apan matohassa wuṛṛu manga ratu apan bahewalla.

⁸Walahanna wuṛṛu araratuanna apan tawe tumuṛṛutta si Nebukadnezar sarun Ta'u iṛṛuumanna ringannu pangalo, ṛutumma, wuṛṛu al᷊aṛṛusa'itta, ma'oman sara panginsueanne tumuṛṛutta si tou.

⁹Imbaṛṛangnga maddaringikka manga nabi ara'e isai-isai lai apan maningaddi yamiu massuṛṛubbawa su ratu Babel, salaiwe i mangitou manga'u buatte nanarimmattu tatantiro wuassu wal᷊iawa, manga ghaṛṛaho al᷊ussa, ara'e ringannu mappaattu wal᷊i'in mata.

¹⁰I mangitou namahia si yamiu na'oman sara i yamiu niapidda wuassu wanuanu. I ya'u sarun mallimbuakka si yamiu wuassu wanuanu wuṛṛu i yamiu nate.

¹¹Arawe walahanna apan mappulu massuṛṛubbawa wuṛṛu mappulu tumuṛṛutta su ratun Babel sarun Ta'u iwala matana'a su wanuane sassane, wuṛṛu mabbailla isudde. I Ya'u, MAWU, buatte nabbisara.”

¹²Si zedekia ratun Yehuda, i ya'u, Yeremia mamasingkattu watti'a apan uasul᷊ungnga. I ya'u mabbisara, “Passuṛṛubbawate su ratun Babel. Paatuṛṛutte si tou wuṛṛu araratuanne, tadea'u i Tuangnga masal᷊amatta.

¹³MAWU buatte nabbisara, manungku walahanna apan maddiri massuṛṛubbawa su ratun Babel sarun nate sulal᷊ummu pangalo, ṛutumma, ara'e al᷊aṛṛusa'itta. Anio i Tuangnga wuṛṛu tumanangnge mappulu nate olangnge aroddi?

¹⁴Ariete paddaringikka manga nabi apan manningaddi Tuangnga massuṛṛubbawa su ratun Babel, ana waugu i mangitou mammahia si Tuangnga.

¹⁵I mangitou nabbisara manungku i mangitou mabbisara ringannu arannu MAWU, arawe i mangitou mangngawusu. MAWU sassane nabbisara manungku i Tou tawe nandolokki mangitou. Ana waugu udde i Tou sarun manal᷊iawukka wuṛṛu mamate si Tuangnga suadio'a ringannu manga nabi apan buatte nangawusu si Tuangnga.”

¹⁶Wua'udde i ya'u namasingkatta su manga imam wuṛṛu su anambon tumana'u soa manungku MAWU nabbisara arendi, “Ariete paddaringikka manga nabi apan mabbisara manungku tate lai mal᷊annu manga saranapa su Wal᷊e-U sarun iwelengnga apia wuassu Babel. I mangitou awusu.

¹⁷Arie paddaringikka si mangitou! Passuṛṛubbawate su ratun Babel, tadea'u i yamiu masal᷊amatta. Apa hunane soa indi ṛinone maṛṛimunsa'a?

¹⁸Amungkangngu i mangitou atonna nabi, wuṛṛu buatte nanengkamma tanata wuassia-U, natantunna orassa indi i mangitou maddorongnga si Ya'u, MAWU Apan Lembontaṛṛino, tadea'u manga saranapa apan ta'e pia su Wal᷊e-U wuṛṛu su wal᷊en araratuanna su Yerusalem tawe ṛootanna watukku Babel.

¹⁹Ana waugu i Ya'u, MAWU Apan Lembontaṛṛino, Ruatan Israel, buatte nakkawessa manungku anambon saranapa udde sarun ṛootanna watukku Babel, wuṛṛu mangke uatana'a poiaroddi maddatingngu i Ya'u mannaungnga apia. Sutempo udde i Ya'u mangapidda saranapa udde apia su tampa indi. I Ya'u, MAWU, buatte nabbisara.” Manga saranapa apan ta'e pia su Wal᷊en MAWU eteudde: manga diṛṛi, wensadda witu'a, manga kareta, wuṛṛu manga pira waine pussa'an Wal᷊e MAWU. Manga saranapa udde tawe naapidda watukku Babel, sutempo i Yoyakhin ana'i Yoyakim ratun Yehuda see matatimmaddu wanuan Yehuda wuṛṛu Yerusalem niapiddi Ratu Nebukadnezar watukku Babel.