Read Talaud YEREMIA 29 Bible Online

YEREMIA 29 - Talaud bible

YEREMIA 29

¹I ya'u namoṛṛettu suratta su manga imam, manga nabi, manga piaṛṛa'u walahanna apan ta'e wiakka, wuṛṛu su anambon taumata waine apan buatte niapiddi Nebukadnezar wuassu Yerusalem watukku Babel.

²Suratta udde ta'u niwoṛṛetta napawe i Ratu Yoyakhin, inangnge, manga mammamanaran araratuanna, manga tembonannu araratuannu Yehuda wuṛṛu Yerusalem, manga base, wuṛṛu manga mapapande manara apan niapidda su pamuanganna.

³I ya'u napaapiddu suratta udde si Elasa ana'i Safan, wuṛṛu si Gemarya ana'i Hilkia apan nirolokki Zedekia ratun Yehuda ringanni Nebukadnezar ratun Babel. Suratta udde tingikke,

⁴“Etearendi wisara MAWU Apan Lembontaṛṛino, Ruatan Israel su anambon taumata apan buatte niwuangnga wuassu Yerusalem watukke Babel:

⁵‘Pamanuate isudde. Pallanginte manga wal᷊enu. Pamabbasse wailla wuṛṛu pabbiakken hessine.

⁶Paawingke tadea'u i yamiu maasomba ana'a, wuṛṛu wala'e manga anangngu lai maawingnga tadea'u i mangitou maasomba ana'a. Reenganne ṛinone aatambanna wuṛṛu tawe wotongnge mahaingnga.

⁷Pammanarate hunan lal᷊umanna'u manga soa su tampa i yamiu Ta'u niwuanga. Aal᷊iomante si Ya'u su hausannu manga soa udde, ana waugu amungkangngu manga soa udde su lal᷊ummanna'a, i yamiu lai su lal᷊umanna'a.

⁸I Ya'u MAWU, Apan Lembontaṛṛino, Ruatan Israel, mapanaungnga si yamiu tadea'u arie mamala batangannu awusuannu manga nabi apan uatana'a su pattangnganni yamiu ara'e isai-sai lai apan mabbisara manungku i mangitou wotongnge mani'attu tempo addantane. Ariete maṛṛingiddu manga wal᷊iawa mangitou.

⁹I mangitou mappaattu arang-Ku ipabbatti'a si yamiu manga inolaanna awusu. I Ya'u tawe nandolkki mangitou. I Ya'u, MAWU, buatte nabbisara.’

¹⁰MAWU nabbisara, ‘Napawe nia'omante tempone pitun pul᷊o su tonnane su Babel, i Ya'u sarun ma'ellega si yamiu apia, wuṛṛu manipussa pa'aire-U mangapiddi yamiu mabelengnga apia su tampa indi.

¹¹Wal᷊inewe i Ya'u sassane mamasingkattu manga ṛiing-Ku si yamiu? Manga ṛiinna udde wal᷊ine ma'asilaka si yamiu, arawe hunan lal᷊umanna'i yamiu wuṛṛu mangonggolla si yamiu tempo addantane apan piaddu a'antimanna.

¹²Ne i yamiu sarun maiontolla si Ya'u. I yamiu sarun dumanta umal᷊iomanna si Ya'u, wuṛṛu i Ya'u sarun sumimbakka aal᷊iomannu.

¹³I yamiu sarun maddea'a si Ya'u wuṛṛu maasomba si Ya'u, ana waugu i yamiu maddea'a ringannu ahewallu naungnga.

¹⁴Atonna, i yamiu sarun maasomba si Ya'u. I yamiu sarun Ta'u ihemonna wuassu pattangngannu al᷊awo'u walahanna wuṛṛu wuassu tiappu wanua su tampang kamiu nisal᷊iawukka wuṛṛu niwuanga. I yamiu sarun Ta'u iapidda watukku wanua inariaddiannu indi see mamelengngu ola'u pabbiaṛṛanni yamiu. I Ya'u, MAWU, buatte nabbisara.’

¹⁵Tumuṛṛuttu yamiu, MAWU buatte nangonggolla si yamiu manga nabi su Babel.

¹⁶Paddaringikke wisara MAWU su ola'u ratu apan uaparenta orassa indi, eteudde ratu papapulunni Daud, wuṛṛu su ola'u tumana'u soa indi, eteudde manga ana'u tuṛṛangngu apan tawe niapidda su pamamuanganna suadio'a ringanni yamiu.

¹⁷MAWU Apan Lembontaṛṛino nabbisara, ‘I Ya'u sarun mandantan pangalo, ṛutumma, wuṛṛu al᷊aṛṛusa'itta si mangitou. I mangitou sarun Ta'u olaanna ere manga wuan ara apan tumanite mawukku'a na'oman sara tate iaanna.

¹⁸I mangitou sarun Ta'u enggenanna ringannu pangalo, ṛutumma, wuṛṛu al᷊aṛṛusa'itta ma'oman sara al᷊awo'u walahanna su ahewallu runia sarun maapendamma atata'utta maasilo ola'i mangitou. Sauapan tampa i Ya'u manal᷊iawukki mangitou, taumata sarun maapendamma atata'utta maasilo apa apan buatte nariaddi si mangitou. I mangitou sarun al᷊uandahanna, wuṛṛu aranni mangitou ipaatta maola'a wawontoga.

¹⁹Sarangkanambone udde sarun mariaddi si mangitou, ana waugu i mangitou tawe tumuṛṛutta tanata-U apan sidutu Ta'u iapappasingkatta si mangitou wuassu manga nabi manga allang-Ku. I mangitou maddiri manutukka tanata-U udde.

²⁰Wuṛṛu i yamiu sarangkanambone buatte Ta'u niwuanga watukku Babel, paddaringikka si Ya'u, MAWU, apan nabbisara.’

²¹MAWU Apan Lembontaṛṛino, Ruatan Israel, buatte nabbisara su ola'i Ahab ana'i Kolaya, wuṛṛu su ola'i Zedekia ana'i Maaseya apan nappaattu arannu MAWU ipamasingkattu manga inolaanna awusu. MAWU nabbisara manungku i Tou sarun manantilli mangitou su taṛṛino Nebukadnezar ratun Babel, apan sarun mamate si mangitou su saruannu matanu.

²²Ne amungkangngu manga taumata apan buatte niapidda wuassu Yerusalem watukku Babel mappulu mamontoga sangkatou taumata, i mangitou sarun mabbisara, ‘Antimanna MAWU ma'ola'a si'o ere i Zedekia wuṛṛu i Ahab, apan buatte nitambunnu ratun Babel ta'e wiakka.’

²³Etearoddi ola'u wiakki mangitou ana waugu buatte na'ola'a manga rosa wahewalla su Israel: i mangitou sussandaga, wuṛṛu nappaattu arannu MAWU ipabbatti'u manga inolaanna awusu. Udde napapaṛṛalan apulu MAWU. I tou masingkattu apa apan a'olaanni mangitou, wuṛṛu i tou sassane nabal᷊i tialane lumawangnga si mangitou. MAWU buatte nabbisara.”

²⁴MAWU Apan Lembontaṛṛino, Ruatan Israel nangonggollu tanata si ya'u iapasingkatta si Semaya, taumatan Nehelam, ana waugu i Semaya buatte nangirimmu suratta ringannu aranne sassane su anambon tumana'u Yerusalem, su Imam Zefanya ana'i Maaseya, wuṛṛu su anambon imam baine. Sulal᷊ummu suratta udde i Semaya namoṛṛetta arendi si Zefanya:

²⁶“MAWU buatte namile si'o maola'a imam mallol᷊ossa si Yoyada, wuṛṛu orassa indi ete i'o uaumbele manara apan atanggaṛṛanne su Wal᷊en MAWU. Manaranu eteudde mammarenta tadea'u suapan taumata wewa, apan mangnga'u watanganne nabi, imantungnga ringannu ṛate atta'a su ullekkane.

²⁷Arawe anio i'o tawe mangatokki Yeremia taumatan Anatot udde apan naola'e ere nabi suwallattu walahanni ite?

²⁸Taumata udde ṛinone sappinganna moṛṛongnge, ana waugu i tou mabbisara su manga taumatang kite su Babel manungku i mangitou ta'e mal᷊annu matana'a poiaroddi. Wuṛṛu ana waugu udde, wisarane, i mangitou ṛinone mapararisikku wal᷊en see mamabbassa wailla wuṛṛu umanna hessine.”

²⁹Suratta udde niwasan Imam Zefanya si ya'u.

³⁰Ana waugu udde MAWU nandolo'u

³¹nangirimmu watti'a su ola'i Semaya su anambon taumatan Israel apan niwuanga su Babel. Eteindi watti'a udde, “Semaya buatte nabbisara si yamiu ere ola'u i tou nabi; sumbal᷊i Ya'u, MAWU, tawe nandolokki tou. Ana waugu i tou buatte na'ola'a si yamiu mangngimanna su wisara awusu,

³²wuṛṛu ana waugu i tou buatte nandolokki yamiu lumawangnga si Ya'u, ne i Ya'u sarun makkuumanni tou wuṛṛu papapulunne. Tawe saran sangkatou wuassu wallatti mangitou apan sarun matana'a suwallatti yamiu tadea'u ma'ellega manga inolaanna mangkapia apan sarun Ta'u olaanna su anambon uma-U. I Ya'u, MAWU, buatte nabbisara.”