Read Talaud YEREMIA 3 Bible Online

YEREMIA 3 - Talaud bible

YEREMIA 3

¹MAWU nabbisara, “Amungkangngu sangkatou inangngu ana'a sindoannu awingnge, ana see wawine udde nabbal᷊i awingngu taumata waine, ne iamangngu anangnge dorone tate wotongnge manganu si tou apia maola'a inangngu anangnge, ana waugu olangnge udde sarun maahohakka wanua indi. I'o Israel, piate tunanga tumanite manambo, ereapa orassa indi i'o ma'apulu mabbelengnga ringang-Ku!

²Annama'o paningngara, su manga puiddu wuidda! Tampa suapa apan taambe niddantannu inai sumandaga? Ere taumatan Arab su wadda'u anne, etearoddi lai i'o ua'ianna si winggin dal᷊anna uaṛṛaddo taumata apan uaa apulunu. I'o nalluhudda wanua indi ringannu sasandaga wuṛṛu al᷊al᷊eonu.

³Ana waugu udde ua'e wuassu langitta nataṛṛanganna, wuṛṛu uranna sutempon batianna tawe mangansalla. I'o naal᷊ihidda sumasandagga, wuṛṛu tawe masili.

⁴Sutempo asasuṛṛipinnu udde i'o nabbisara si Ya'u manungku i Ya'u iamangngu, manungku i Ya'u marangngu si'o ro'en ta'e addio'a.

⁵I'o nabbisara lai manungku i Ya'u tawe sidutu massa'u si'o. Eteudde apan niwisaranu, ei Israel, arawe tantal᷊anna udde i'o ma'ola'a al᷊awo'u al᷊al᷊eo apan botongnge olaannu.”

⁶Sutempo i Ratu Yosia uaparenta, MAWU nabbisara arendi si ya'u, “I'o naasilote inolaannu Israel, wawine apan mal᷊awangnga udde? I tou nanantang-Ku wuṛṛu mammanara sussandaga su puiddu anambon wuidda apan matanggakka wuṛṛu su al᷊ungngu suapan aaluanna apan mapaṛṛampunga.

⁷Ṛingi-U napawe i tou buatte na'ola'a sarangkanambone udde, i tou sarun mabbelengnga apia ringang-Ku. Arawe i tou tawe nabbelengnga, ewe'e inai sinumandaga. Ana waugu udde i Ya'u nanindo wuṛṛu nallimbuakka si tou. Yehuda, tuṛṛangngu Israel, apan mal᷊awangnga udde maasilo sarangkanambone udde, arawe i tou tawe nata'utta. Ewe'e i tou lai nabbali masandaga,

⁹wuṛṛu mangke tawe maapendamma asasili. I tou sinumandaga ana waugu massubba watu wuṛṛu alu, na'oman sara wanua indi naola'a lal᷊eo.

¹⁰Napawe buatte na'ola'a sarangkanambone udde, Yehuda apan mal᷊awangnga udde mabbelengnga ringang-Ku arawe ringannu mammahia, ana waugu naungnge wengkolla. I Ya'u, MAWU, buatte nabbisara.”

¹¹Wua'udde MAWU namasingkatta si ya'u manungku salaiwe Israel buatte tinumal᷊iudda si Tou, arawe inauranna Israel ta'e mappianne wuassu Yehuda apan mal᷊awangnga udde.

¹²MAWU nandolo'u inai mamasingkattu olangnge indi su Israel: “Ei Israel apan mal᷊awangnga, pabbelengke ringang-Ku! I Ya'u napenen aakkanna wuṛṛu mangke sidutu massa'u si yamiu.

¹³Panga'ute manungku i'o nassala wuṛṛu buatte nilumawangnga su saruannu MAWU, Ruatanu. Panga'ute manungku su al᷊ungngu suapan punnu alu apan mappaṛṛampunga i'o buatte namatu'a apulunu su manga mawun balahanna waine, wuṛṛu tawe tumuṛṛutta manga parenta-U. I Ya'u, MAWU buatte nabbisara.”

¹⁴MAWU nabbisara, “Ei umatta apan mal᷊awangnga, pabbelengke ringang-Ku! I yamiu uddewe pussa'a-U. I Ya'u sarun manganu si yamiu, sangkatou wuassu suapan soa, ruang katou wuassu suapan amonanna, wuṛṛu mangapiddi yamiu apia su Wuiddu Sion.

¹⁵I Ya'u sarun mangonggolla si yamiu manga mamamiaṛṛa'a apan matuṛṛutta si Ya'u. I mangitou sarun mamiaṛṛa'i yamiu ringannu asingkatta wuṛṛu napenen pasasunna.

¹⁶Ana see napawe i yamiu niatambante anambone su wanua indi, taumata tate mabbisara lai su ola'u Wantallu Paaire-U. I mangitou tate lai maṛṛingidda ara'e mannaungnga lai, ewe'e i mangitou lai tate mappandumma ara'e mallanginnu Wantallu Pa'aire waine.

¹⁷Sutempo udde soan Yerusalem sarun isaggo, ‘Aianannu MAWU’, wuṛṛu anambon walahanna sarun ma'ammulla su soa udde massubba MAWU. I mangitou tate lai tumuṛṛutta apulu naungngi mangitou apan maattikka wuṛṛu lal᷊eo udde.

¹⁸Israel sarun ma'aukku Yehuda, wuṛṛu su sampunna rumanta wuassu wanua pinamuanganna su samba'an sawannakka. I mangitou sarun mabbelengnga su wanua apan buatte Ta'u nionggolla maola'a leta'a pussa'an al᷊amonanu.”

¹⁹MAWU nabbisara, “Israel, i Ya'u mappulu manengkamma si'o maola'a ana-U, wuṛṛu mangonggolla si'o wanua apan ma'al᷊uassa, wanua apan apianne su ahewallu runia. I Ya'u mappulu tadea'u i'o mamaggo si Ya'u iamangnga, wuṛṛu tate mangingkatta apia wua dingang-Ku.

²⁰Arawe naal᷊ihidda inangngu ana'a apan tawe satia, i'o lai tawe satia si Ya'u. I Ya'u, MAWU, buatte nabbisara.”

²¹Roso su manga puiddu wowone niaringikka tingikku hio; udde tingikku walahannu Israel apan lulluai wuṛṛu mangke sussal᷊ande, ana waugu i mangitou narosate, wuṛṛu naabul᷊ite MAWU Ruata mangitou.

²²Ei i yamiu sarangkanambone apan nanantangke MAWU, pabbelengke! I tou sarun mangapia si yamiu, wuṛṛu ma'ola'a si yamiu mabbal᷊i satia. I yamiu mabbisara, “Ore, orassa indi i yami rumantate ringannu MAWU, ana waugu i Tou Ruatan kami.

²³Mangke suadio'a i yami mangngelekka massubba paal᷊uanna su manga puiddu wowone! Aontolla su Israel tumba'u darantane wuassu MAWU Ruatang kami.

²⁴Pasasubba si Baal, paal᷊uanna apan ma'asili udde naaola'a i yami niawul᷊iannu manga ana'i yami see lai manga sapi wuṛṛu domba, eteudde al᷊awo'u inasaharannu al᷊amonang kami ro'en paarorone.

²⁵Nariaddi, wala'e i yami mamasanna asasili, wuṛṛu wala'e i yami mabbal᷊i lal᷊ebbone. Ana waugu, i yami wuṛṛu al᷊amonan kami narosate su lantakku hati MAWU Ruatang kami, wuṛṛu taambe saran paassa tumuṛṛutta manga parenta-Ne.”