Read Talaud YEREMIA 31 Bible Online

YEREMIA 31 - Talaud bible

YEREMIA 31

¹MAWU nabbisara, “Sarun a'omanna tempone i ya'u maola'a Ruata anambon ṛuangannu Israel, wuṛṛu i mangitou mabbal᷊i uma-U.

²Su wadda'u anne i Ya'u mapal᷊iatta'u darangngu-U si mangitou apan buatte napallossa wuassu papate. Sutempo umattu Israel maddea'a atatammudda,

³wuassu marau i Ya'u naipasilon batangang-Ku si mangitou. Ei umattu Israel, ro'en dorone i Ya'u sidutu mandangngu si yamiu, wuṛṛu sarangkal᷊o'enge i Ya'u sidutu mappal᷊iatta'a manungku i Ya'u sidutu marangngu si yamiu.

⁴Walahannu sarun ta'u olaanna tumelengnga ere dorone. Paassa lai i yamiu sarun manganu rebana, wuṛṛu massal᷊aingnga ringannu lulluassa.

⁵I yamiu sarun mabbaillu anggore su panenteannu Samaria, wuṛṛu iapa massuanna sarun mani'o wuane lai.

⁶Atonna, sarun a'omanna tempone manga mandariaga soa umui su panenteannu Efraim, ‘Wette i ite sumaate su Sion, ringannu MAWU Ruatang kite.’ ”

⁷MAWU nabbisara, “Pangantarite ringannu lulluassa su Israel uma-U — balahanna apan apianne wuassu anambon walahanna. Pangantarite aantarin daralo, wuṛṛu pabbatti'e; ‘MAWU buatte nanal᷊amatta si ngana'a lambene wuassu uman-Ne.’

⁸Wuassu sawannakka i mangitou Ta'u niapidda apia; Ta'u nihemonna i mangitou wuassu manga pentakku runia. Taumata wuta wuṛṛu taumata lome sarun tumantalongnga ringanni mangitou, see lai wawine apan wakkute nangunsiwe wuṛṛu apan uailloṛṛo mawakkatte. I mangitou sarangkanambone sarun rumanta apia sulal᷊ummu reenganne apan manambo su wanua indi.

⁹I mangitou u'amatta ringannu allo mata apan mappinapi, Ta'u niwinalatanna wuṛṛu Ta'u niehetta i mangitou. Ta'u niapidda i mangitou niumamattu tampa apan manambo ua'ene, niummatta su lal᷊anna ratakke su tampa i mangitou tawe matara. Su Israel, i Ya'u maola'a Iamangnga; Efraim uddewe ana-U pahul᷊une.”

¹⁰MAWU nabbisara, “Paddaringikka ei manga walahanna! Wal᷊oa'e tanata-U su samba'an tahal᷊oangnga: Uma-U apan buatte Ta'u nisal᷊iawukka sarun Ta'u ihemonna wuṛṛu paddul᷊iananna ere mallal᷊u'adda uataṛṛapa dombane.

¹¹Umattu Israel buatte Ta'u niapasal᷊amatta, wuṛṛu Ta'u nipallossa wuassu taṛṛinon balahanna apan matohassa.

¹²Watukku Wuiddu Sion i mangitou sarun dumanta ringannu hati apan matilangnga, lapiddu mangngantari ringannu lullala'a ana waugu anambon aonggo-U si mangitou, eteudde gandumma, lana, anggore, sapi wuṛṛu domba. I mangitou naal᷊ihidda wailla apan ua'ene natimu, tawe atalannu apa-apa.

¹³Sutempo udde manga maṛṛuala sarun massal᷊aingnga ringannu naungnga mal᷊uassa. Timmadde wuṛṛu dario'a suadio'a lullala'a, ana waugu i Ya'u sarun malluassa naungngi mangitou. Asasusa mangitou Ta'u wal᷊uanna maola'a al᷊al᷊uassa, lal᷊uai mangitou Ta'u wal᷊uanna mabbal᷊i lal᷊umanna'a.

¹⁴Manga imam sarun Ta'u wusannu anna apan manambo; wuṛṛu anambon apan pappandumannu uma-U sarun Ta'u ionggolla. I Ya'u, MAWU, apan nabbisara.”

¹⁵MAWU nabbisara, “Su Rama niaringiṛṛanna tingikku lal᷊allu, wuṛṛu auare apan tatilla'upannu asasusa. I Rahel lulluain anangne, i tou tawe al᷊imbatanna ana waugu mangitou tate baddi'a.

¹⁶Illol᷊oa'e lal᷊uainu wuṛṛu peddate allo matanu! Sahaddu sarun pia lal᷊antakke su al᷊aṛṛanangngu. Si'o sarun pia bawal᷊inne, manga anangngu sarun mapul᷊e wuassu wanuan seetta.

¹⁷Pia antimma si'o sutempo addantane; manga anangngu sarun mawelengnga su tampa inariaddianne.

¹⁸I ya'u naaringikka umattu Israel mabbisara napenen asasusa, ‘Oh MAWU, i yami naal᷊ihidda winatangnga apan taambe niaṛṛaro arawe ninaram-Mu i yamiu ringannu matuṛṛutta wuṛṛu orassa indi i yami nasaddiate mabbelengnga ringan-Nu. Nariaddi, apira'e i yami mapul᷊e, oh MAWU, Ruatang kami.

¹⁹I'o buatte tinal᷊i'uranni yami, arawe inolaanna udde iassasilli yami. Napawe I'o nakkuumanni yami, puang kami niumaruutta ana waugu massusa. I yami massili wuṛṛu nahelo ana waugu buatte na'ola'a rosa sutempo dario'a.’

²⁰Israel, i'o ana'a arangnguang-Ku, ana'a iaakkanna, tatuno naung-Ku. Suapawe i Ya'u mamakkamma si'o i Ya'u sidutu uanaungnga si'o ringannu ṛintulu. I'o sarun Ta'u olaanna ringannu ahewallu tatal᷊antuppa.

²¹Tialaite manga lal᷊anna, pasia'e manga tatialane paddea'e lal᷊anna apan amatannu paarorone. Ei, Israel, apul᷊ete! Apul᷊ete su manga soanu apan dorone.

²²Maddatingngu tingngera i'o tawe homago'a, ei walahanna apan mal᷊awangnga si Ya'u? I Ya'u buatte nandiaddi manga apa apan wakku su runia, sambau apan maaṛindu'a — ma'atiangnga ere wawine uariaga esakka.”

²³MAWU Apan Lembontaṛṛino, Ruatan Israel nabbisara, “Napawe uma-U buatte Ta'u niola'a tumelengnga ere dorone, ne su wanua Yehuda wuṛṛu su manga ampungnge sarun aringiṛṛanna apia taumata mabbisara, ‘Antimanna MAWU mangal᷊amatta wuidda susi su Yerusalem tampa atatanaanna apan niṛṛae si Tou.’

²⁴Taumata sarun matana'a su Yehuda wuṛṛu su manga ampungnge. Poiaroddi sarun pia mabbawailla wuṛṛu mamamadul᷊i winatangnga sapi wuṛṛu dombane.

²⁵I mangitou apan nallome sarun iapaatohassa, wuṛṛu mallappu ana waugu niamal᷊unusanna sarun Ta'u iapaal᷊aidda.

²⁶Sutempo udde taumata sarun mabbisara, ‘Napawe mattiille mal᷊angnga, i ya'u naapendamma mal᷊uassa.’

²⁷I Ya'u, MAWU, mabbisara manungku sarun a'omanna tempone wanua Israel wuṛṛu Yehuda Ta'u peneannu taumata wuṛṛu winatangnga.

²⁸Su ereapa dorone i Ya'u buatte nallu'adda si mangitou tadea'u wua'udde i Ya'u mangabbutta, maṛṛa'a wuṛṛu makkimunsa'a si mangitou, aroddi lai i Ya'u sarun mallu'adda si mangitou tadea'u i Ya'u manohassa wuṛṛu i mangitou mabbangunna apia.

²⁹Sutempo udde taumata tate lai mabbisara, ‘Timmadde u'anna wua apan mapakkadda, isin anangnge ma'apendamma mangirassa,’

³⁰ewe'e isai umanna wua apan mapakkadda, ete i tou sassane apan maapendamma mangirassa su isine. Suapan taumata sarun nate ana waugu rosane sassane.”

³¹MAWU nabbisara, “Sarun a'omanna tempone i Ya'u ma'ola'a pa'aire apan bakku ringannu umattu Israel wuṛṛu Yehuda.

³²Arawe pa'aire udde wal᷊ine ere pa'aire apan Ta'u niola'a ringannu al᷊amona mangitou sutempo Ta'u ni'ehetta i mangitou sinumabbangnga wuassu Mesir. Salaiwe i Ya'u ere sangkatou awingngi mangitou, arawe i mangitou nassinaaddu pa'aire-U si mangitou.

³³Eteindi pa'aire wakku apan Ta'u niola'a ringannu umattu Israel: Manga tita-U sarun Ta'u iaddo sulal᷊ummu naungngi mangitou, wuṛṛu Ta'u iwoṛṛetta sulal᷊ummu ate mangitou. I Ya'u sarun maola'a Ruatan mangitou, wuṛṛu i mangitou sarun maola'a uma-U.

³⁴Tate gunane lai wuassi mangitou mangaṛṛa'a sansul᷊ungnge ipa'illal᷊a MAWU. Ana waugu i mangitou sarangkanambone, wahewalla addio'a, sarun maaillal᷊a si Ya'u. Manga pasasal᷊a mangitou sarun timbul᷊ianang-Ku, manga rosa mangitou Ta'u ampunganna. I Ya'u, MAWU, buatte nabbisara.”

³⁵Matannallo nisaddia MAWU ipanemakka allo; wul᷊anna wuṛṛu manga anumpitanna ipannemakka ṛabbi. Tahal᷊oangnga niongkene na'oman sara nallua'a, MAWU Apan Lembontaṛṛino, uddewe aranne.

³⁶MAWU naddiandi, “Tantal᷊anna titan dunia tawe mawal᷊u Israel lai sidutu maola'a sambau walahanna.

³⁷Unnuwisara su sambau tempo langitta wotongnge uuṛṛanna, wuṛṛu wantan dunia wotongnge asaṛṛasiranna, sutempo uddewe Israel sarun Ta'u itol᷊a'a ana waugu al᷊awo'u inolaanni mangitou apan dal᷊eo. I Ya'u, MAWU, buatte nabbisara.”

³⁸MAWU nabbisara, “Sarun a'omanna tempone ahewallu Yerusalem iapararisikka apia maola'a soa-U, wuassu Menara Hananeel maddatingngu Ngara Pasallanganna Pi'une.

³⁹Wua isudde akkittu passaranne mabbatukku Wuiddu Gareb, ana see mabbeṛṛo watukku Goa.

⁴⁰Ahewallu wawal᷊anne udde, apan nipaatta naola'a pallabbinganna wuṛṛu tampa pandammeannu sapadda, wuṛṛu anambon wawail᷊anna su wiwikku Sal᷊ukku Kidron maddatingngu Ngara Pasallanganna Awal᷊o watukku ra'i, sarun iṛṛa'e si Ya'u. Soan Yerusalem tate ihohakka apia ara'e ṛimunsaanna.”