Read Talaud YEREMIA 38 Bible Online

YEREMIA 38 - Talaud bible

YEREMIA 38

¹MAWU nandolo'u mamasingkattu tanata indi su tumana'u soa, “Soa indi sarun Ta'u ionggolla su tantaran Babel, wuṛṛu i mangitou sarun mamaddon kamiu. Isai-sai apan uatana'a su soa sarun mate sulal᷊ummu pangalo, ara'e ana waugu ṛutumma ara'e al᷊aṛṛusa'itta. Arawe isai-sai apan sinumabbangnga wuṛṛu nanantillu watanganne su taumatan Babel, sarun tawe pateanna; niawane sarun masal᷊amatta.” I Sefaca ana'i Matan, i Gedalya ana'i Pasyhur, i Yukhal ana'i Selemya, wuṛṛu i Pasyhur ana'i Malkia uararingikka anambon apan Ta'u iwabbisara udde.

⁴Ne inaite manga tembonanne udde ringannu ratu wuṛṛu nabbisara, “Taumata indi ṛinone iṛṛuumanna pateanna. Ana waugu, ringannu nabbisara aroddi i tou mangngaddio'a ikkattu anambon tantara wuṛṛu taumata waine apan ta'e uatana'a su soa indi. I tou tawe mantul᷊ungnga tumanangnge, ewe'e lai manilaka si mangitou.”

⁵Ratu Zedekia sinumimbakka, “Mapia! Ola'e i tou ere su apulun kamiu, i ya'u tawe maawo'a si yamiu.”

⁶Wua'udde i mangitou nanganute si ya'u wuṛṛu i ya'u nisossokka ringannu tal᷊i sulal᷊ummu paṛṛihi Malkia parinsin datu, apan aaddone su rallakku wal᷊en araratuanna. Tawe ua'e sulal᷊ummu paṛṛihi udde, tumba'u labbo, ne i ya'u sinumuttate sulal᷊ummu labbo udde.

⁷Sutempo udde pia sangkatou Sudan apan mammanara su wal᷊en araratuanna. Aranne i Ebed-Melekh. I tou naaringikka manungku i ya'u buatte nitaṛṛo sulal᷊ummu paṛṛihi udde. Sutempo ratu tantal᷊anna mammiaṛṛa'u ammul᷊anna su Ngara Pasallangannu Benyamin,

⁸i Ebed-Melekh inaite poiaroddi wuṛṛu nabbisara ratu,

⁹“Tuangnga Apan Mawantuga, inolaannu manga taumata udde dal᷊eo. I mangitou buatte nantaṛṛon Nabi Yeremia sulal᷊ummu paṛṛihi; i tou sarun mate amal᷊unusanna isudde, ana waugu anna nasuete su soa indi.”

¹⁰Ana see ratu namarentate si Ebed-Melekh, “Apira'e siri tallu wuṛṛu pasabbanga'e i Yeremia wuassu paṛṛihi udde tantal᷊anna i tou taambe nate.”

¹¹Ne i Ebed-Melekh inaite ringannu siri tallu udde su gudangngu wal᷊en araratuanna, wuṛṛu nanganu manga mal᷊aṛṛenessa tabbe wua isudde, ana see nisossokke ringannu tal᷊i si ya'u sulal᷊ummu paṛṛihi.

¹²I Ebed-Melekh nandolo'u mangaddo manga mal᷊aṛṛenessa udde su anggal᷊ea'u maola'a aampakka, tadea'u tal᷊i udde tawe malliwitta si ya'u. Ne i ya'u tinumuṛṛutta parentan Ebed-Melekh.

¹³Wua'udde i mangitou nabbatunna si ya'u, sinumabbangnga wuassu paṛṛihi udde. Wua'udde i ya'u tinaṛṛanganna su rallakku wal᷊en araratuanna udde.

¹⁴Su sambau tempo apan baine, Ratu Zedekia nandolokku taumata mangapi'u sumaruanna si tou su ngara pasallanganna apan atallune su Wal᷊e MAWU. I tou nabbisara si ya'u, “I ya'u mappulu maiwal᷊o si'o, wuṛṛu i'o ṛinone sumimbakka ringannu masema-semakka. Imbaṛṛangnga piaddu iwuni.”

¹⁵I ya'u sinumimbakka, “Amungkangngu i ya'u mabbisara atonna, i Tuangnga sarun mangema'u ṛuumanna pateanna si ya'u; wuṛṛu amungkangngu i ya'u mangonggollu tatantiro, i Tuangnga maddiri tumuṛṛutta tatantiro udde.”

¹⁶Ratu Zedekia ringannu mal᷊anna-l᷊annabba naddiandi si ya'u, wisaran, “Ringannu arannu Ruata apan biakka, Ruata apan mangngonggollu wiakka si ite, i ya'u massalu manungku i ya'u tawe mamate si'o ara'e manantillu su manga taumata apan mappulu mamate si'o.”

¹⁷Ana see i ya'u nabbisarate si Zedekia manungku MAWU Apan Lembontaṛṛino, Ruata apan sassubbannu taumatan Israel, nabbisara arendi, “Amungkangngu i'o massuṛṛubbawa su manga tembonannu ratun Babel, i'o tawe pateanna, wuṛṛu soa indi lai tawe soṛṛowanna. I'o wuṛṛu amonannu sarun masal᷊amatta.

¹⁸Arawe amungkangngu i'o maddiri massuṛṛubbawa, soa indi sarun manawo su liman taumatan Babel. I mangitou sarun manoṛṛobba sara masue, wuṛṛu i'o tawe maatal᷊angnga.”

¹⁹Ratu sinumimbakka, “I ya'u matta'uttu manga taumatan balahanni ite apan buatte tinumal᷊angnga ringannu taumatan Babel. Aṛṛengenne i ya'u itantilla si mangitou wuṛṛu sansaranna.”

²⁰“Tawe,” sasimba'u, “I Tuangnga tawe itantilla si mangitou. I ya'u mangke sumal᷊ande tadea'u i Tuangnga tumuṛṛutta tanata MAWU; sal᷊immurine sarangkanambone maola'a ringannu mapia, wuṛṛu i Tuangnga tawe pateanna.

²¹Arawe amungkangngu i Tuangnga maddiri manatillu watangannu, MAWU buatte namasilo si ya'u apa apan sarun mariaddi.

²²Sulal᷊ummu aellega udde i ya'u naasilo anambon bawine apan ta'e su wal᷊en araratuannu Yehuda niapasabbangnga su liudde ṛattangannu manga tembonannu Babel. Lapiddu u'amatta i mangitou mabbisara, ‘Ratu niaawusuante manga hawene ate, wuṛṛu paparentanni mangitou. Orassa indi, napawe leddane nal᷊ioṛṛo'a sulal᷊ummu labbo, i mangitou sarangkanambone sinumoṛṛotta.’ ”

²³I ya'u nabbisara apia, “Anambon ana'a, awingngi Tuangnga sarun iapidda ringannu taumatan Babel. I Tuangnga sassane lai tawe maatal᷊angnga si mangitou. Tuangnga sarun sametannu ratun Babel, wuṛṛu soa indi soṛṛowanna sara masue.”

²⁴Wua'udde i Zedekia nabbisara, “Arie pasingkata'a sisai-sai hattong kadua indi, tadea'u niawanu tawe masilaka.

²⁵Amungkangngu manga tembonanne maaringikka manungku i ya'u buatte naggahattonu, i mangitou sarun dumanta wuṛṛu maiwal᷊o si'o hatton kadua udde. I mangitou sarun maddiandi tadea'u mamate si'o, amungkangngu i'o mabbatti'u sarangkanambone udde si mangitou.

²⁶Wal᷊oa'e manungku i'o massal᷊o'u tadea'u i ya'u tawe mandolokku apia watukku tattupanna wuṛṛu mate poiaroddi.”

²⁷Tawe nal᷊annu wua'udde anambon tembonanne nirumanta wuṛṛu mangke ma'iwal᷊o si ya'u. I ya'u namasingkatta si mangitou uasul᷊ungngu ere niparentan datu si ya'u. Ringannu aroddi i mangitou tawe napa'ola'a apa-apa ana waugu tawe saran sangkatou apan naasingkatta hatto'u wuṛṛu ratu.

²⁸I ya'u sidutu tataṛṛanganna su rallakku wal᷊en araratuanna na'oman sara allo Yerusalem niaṛṛon seetta.