Read Talaud YEREMIA 39 Bible Online

YEREMIA 39 - Talaud bible

YEREMIA 39

¹Su wul᷊anna appul᷊one tonna assione i ratu Zedekia uaparenta Yehuda, i Nebukadnezar ratun Babel ringannu anambon tantaran pangalone nirumanta wuṛṛu namangalo Yerusalem.

²Su allo assione wul᷊anna aiappanne tonna mapul᷊o assa sutempo i Ratu Zedekia uaparenta, darandungngu soa nihohakku seetta,

³wuṛṛu Yerusalem niaṛṛo. Ne anambon tembonannu araratuannu Babel nirumanta wuṛṛu inaite niuma'ianna su Ngara Pasallangannu Tangngane. Suwallatti mangitou isudde lai Nergal Sarezer, i Samgar Nebo, i Sarsekim tembonannu amonannu araratuanna, i Nergal Sarezer Rabmag wuṛṛu manga perwira waine.

⁴Sutempo i Ratu Zedekia wuṛṛu anambon tantarane naasilo al᷊awo'u arariaddianna udde, i mangitou maddea'a lassanganne tumal᷊angngu watanganne inai watukku Wawal᷊annu Yordan ṛabbi udde lai. I mangitou niumamattu lal᷊anna sumabbi waillu wungan araratuanna, see sinumabbangnga nalliu ngara pasallanganna apan passombannu darandungnga darua su tampa udde.

⁵Arawe tantaran Babel nangenggenna si mangitou wuṛṛu nanametta si Zedekia su wawal᷊annu Yerikho. Wua'udde i tou niapidda ringanni Ratu Nebukadnezar su soan Ribla su wageangngu Hamat, ana see niandangannu ṛuumanna pateanna.

⁶Su soa udde lai manga anangnge nipate aellehanne sassane, wuṛṛu anambon tembonannu Yehuda lai nipate.

⁷Wua'udde i Zedekia nilasso'a matane, see niṛṛapussa wuṛṛu niapidda su Babel.

⁸Tantal᷊anna udde manga taumatan Babel nanoṛṛobba wal᷊en araratuanna wuṛṛu manga wal᷊en tumana'u soa, see lai naṛṛa'a manga darandungngu Yerusalem.

⁹Panginsueanne tumanangnge apan nallambe su soa, suadio'a ringannu manga taumata apan tinumal᷊angnga su samba'an taumatan Babel, niapiddi Nebuzaradan watukku Babel, tembonannu tantaran Babel.

¹⁰Sambageanganna wuassu tumanangnge apan aasianganne wuṛṛu tawe darotongnge, nitantangnge su Yehuda see nionggol᷊annu waillu anggore wuṛṛu wawail᷊anna waine.

¹¹Ratu Nebukadnezar buatte nandolokki Nebuzaradan, darua perwira tantarane, mapasabbangngu parenta ereindi.

¹²“Roote paddea'a si Yeremia, wuṛṛu paariagai mapia-pia. Arie pa'ola'a apa-apa si tou; tuṛṛutete apa apan raddoronganne.”

¹³Ne i Nebuzaradan suadio'a ringannu tembonanne atanggaṛṛane, i Nebusyazban wuṛṛu Nergal-Sarezer see anambon perwira tantaran Babel waine,

¹⁴nangal᷊appa si ya'u wuassu rallakku wal᷊en araratuanna. Wua'udde i ya'u nitantilla si Gedalya ana'i Ahikam wuṛṛu pulunni Safan, apan ṛinone manguntu'u mapul᷊e ringannu sal᷊amatta. Ne i ya'u uatana'e suwallattu tumana'u soa.

¹⁵Sutempo i ya'u ta'e uaṛṛuumanna su rallakku wal᷊en araratuanna, MAWU nandolo'u

¹⁶niapapasingkatta si Ebed-Melekh taumatan Sudan udde manungku MAWU Apan Lembontaṛṛino, Ruatan Israel, nabbisara arendi, “Ere buatte i Ya'u niwisara dorone, i Ya'u sarun mandanta su soa indi asasilaka, wuṛṛu wal᷊ine lal᷊umanna'a. I'o sarun maasilo olangnge udde mariaddi.

¹⁷Arawe i Ya'u, MAWU, sarun mallu'adda si'o. I'o tawe itantilla su manga taumata apan iaata'unnu.

¹⁸I'o tawe pateanna, ana waugu i Ya'u sarun manal᷊amatta si'o. Niawanu sarun masal᷊amatta ana waugu I'o uaantimma si Ya'u. I Ya'u, MAWU, buatte nabbisara.”