Read Talaud YEREMIA 42 Bible Online

YEREMIA 42 - Talaud bible

YEREMIA 42

¹Wua'udde anambon taumata, wahewalla addio'a, suadio'a ringannu manga tembonannu tantara, nasutta lai i Yohanan ana'i Kareah wuṛṛu i Azarya ana'i Hosaya nirumanta

²ringangku wuṛṛu nabbisara, “Papa, ere lai aellehenni Papa sassane, i yami indi dorone manambo, orassa indi ete addio'a. I yami sumal᷊ande si Papa umal᷊iomanni yami su MAWU Ruata apan sassubbanni Papa. Al᷊iomana'e i yami apan lambene indi,

³tadea'u MAWU Ruata mapal᷊iatta'a si yami watukku apa ṛinone i yami inai wuṛṛu apa apan ṛinone manaranni yami.”

⁴I ya'u sinumimbakka, “Mapia amungkangngu aroddi. I ya'u manarimmattu darorongngu udde. I ya'u sarun umal᷊iomanna su MAWU Ruatang kite, wuṛṛu salaiwe apa sasimbak-Ke, i ya'u sarun mamasingkatta sarangkanambone udde si yamiu; saran sambau tawe ta'u iwuni si yamiu.”

⁵I mangitou nabbisara si ya'u, “I yami sumal᷊ande si Papa umal᷊iomanna su MAWU Ruatang kite, ana waugu i yami tumuṛṛutte si Tou, tadea'u wiakki yami maola'a mapia. Nariaddi, mapia ara'e lal᷊eo tanata MAWU udde, i yami sarun tumuṛṛutta. Wala'e MAWU maola'a matatialane apan matul᷊idda wuṛṛu satia si yami, amungkangngu i yami tawe tumuṛṛutta anambon parenta nionggollu MAWU si yami wuassi Papa.”

⁷Mapul᷊o allo wua'udde MAWU nabbisara si ya'u.

⁸Ne i ya'u namaggo si Yohanan see manga tembonannu tantara wuṛṛu anambon taumata waine apan nirumanta suadio'a ringanni tou.

⁹I ya'u nabbisara si mangitou, “I yamiu nandolo'u mamasingkattu darorongngu su MAWU, Ruatan Israel. Ne, MAWU nabbisara,

¹⁰‘Amungkangngu i yamiu mappulu sidutu uatana'a su wanua indi, i Ya'u sarun mabbatunna si yamiu, wal᷊ine mamontolla; i Ya'u sarun mapararisikki yamiu, wal᷊ine manggohakka.

¹¹I ya'u tumaniten massusa ana waugu buatte nandantan asasilaka si yamiu. Ariete mata'uttu ratun Babel udde. I Ya'u supattangngannu tadea'u mantul᷊ungnga wuṛṛu mamallossi yamiu wuassu kuasane.

¹²Ana waugu i Ya'u tuttal᷊antuppi yamiu, i Ya'u sarun ma'ola'a ratun Babel umakkanni yamiu wuṛṛu mamalan kamiu mapul᷊e. I Ya'u, MAWU, buatte nabbisara.’ ”

¹³Arawe i yamiu apan ta'e uatana'a su Yehuda ariete lumawangnga MAWU Ruatanu wuṛṛu ariete mabbisara, “I yami maddiri matana'a su wanua indi. I yami inaite watukku Mesir wuṛṛu matana'e su wanua udde. Poiaroddi i yami tate maapendamma pangalo, tate maaringikka tingikku trompetta apan mammaggo mapapangalo, wuṛṛu tate matataṛṛangnga ṛutumma.” Amungkangngu naungngi yamiu nautulle inai watukku Mesir wuṛṛu matana'a poiaroddi, indite tanatan MAWU Apan Lembontaṛṛino, Ruatan Israel, si yamiu:

¹⁶“Pangalo wuṛṛu al᷊aṛṛutumma apan iaata'utti yamiu sarun uatantalongnga si yamiu maddatingngu Mesir, wuṛṛu i yamiu sarun nate su wanua udde.

¹⁷Anambon taumata apan naungnge nautulle apan inai su Mesir wuṛṛu matana'a poiaroddi sarun mate sulal᷊ummu pangalo, ara'e nate amal᷊unusanna ara'e al᷊aṛṛusa'itta. Tawe saran sangkatou apan mal᷊iu wuassu asasilaka apan Ta'u iaparanta si yamiu; sarangkanambone sarun mate.

¹⁸Su ereapa i Ya'u, MAWU Ruatan Israel napasabbangngu asasa'u wuṛṛu araṛṛagi-U su tumana'u Yerusalem, aroddi lai Ya'u mapasabbangngu araṛṛagi-Ku si yamiu apan inai watukku Mesir. Taumata sarun marantinna maasilo si yamiu; i yamiu sarun heloanna, wuṛṛu arannu tate ipaatta maola'a wawontoga. I yamiu tate maasilo apia leta'a niariaddiannu indi.”

¹⁹Wua'udde i ya'u nabbisara apia, “MAWU buatte namarenta tadea'u i yamiu apan ta'e lambene su Yehuda tawe inai su Mesir. Ana waugu udde i ya'u mapanaungnga si yamiu orassa indi

²⁰manungku i yamiu buatte na'ola'a sambau pasasal᷊a apan wahewalla. I yamiu sussal᷊ande tadea'u i ya'u umal᷊iomanna su MAWU Ruatang kite hunang kamiu, wuṛṛu i yamiu naddiandi mapaamattu sarangkanambone apan niwisara MAWU.

²¹Orassa indi i ya'u buatte namasingkattu tanata MAWU Ruatang kite si yamiu, arawe i yamiu maddiri tumuṛṛutta tanata udde.

²²Ana waugu udde, naungete: su wanua apan rantanni yamiu wuṛṛu matana'a isudde, i yamiu sarun mate sulal᷊ummu pangalo, ara'e waugu ṛutumma ara'e al᷊aṛṛusa'itta.”