Read Talaud YEREMIA 46 Bible Online

YEREMIA 46 - Talaud bible

YEREMIA 46

¹MAWU nabbisara si ya'u su ola'u manga walahanna,

²manatakku Mesir. I tou namasingkatta si ya'u su ola'u tantara Nekho ratu Mesir, apan niawaddo su Karkemis maranin Sal᷊ukku Efrat ṛatanganni Nebukadnezar ratun Babel su tonna aiappanne sutempo i Yoyakim, ratun Yehuda uaparenta. Eteindi wisara apan niapasingkattu MAWU su ola'u udde,

³“Manga tembonannu tantara Mesir manggoressa hahoressan paatehamma su tantarane, ‘Takko'e tambakka! Palluṛṛete laubba atta'a wuṛṛu araposa waja! Riahite allungnga wuṛṛu suttate sulal᷊ummu warisanna! I yamiu, tantaran awal᷊o, ampaṛṛa'e aianannu! Sa'ete awal᷊onu, inaite mappangalo!’

⁵Arawe i Ya'u, MAWU, ma'asilo si mangitou sinumoṛṛotta matta'utta. Manga tantara mangitou niwaddo, wuṛṛu tinumal᷊angngu atata'utta ringannu tawe nanaille liudde.

⁶Iapa matikko'a tawe naatal᷊angngu watanganne, wuṛṛu iapa matohassa tawe naal᷊iu wuassu seetta. I mangitou natara wuṛṛu nanawo su sawannakka, su wiwikku Sal᷊ukku Efrat udde.

⁷Isai i tou apan nawitta ere ua'en Sal᷊ukku Nil, ere sal᷊ukka naṛṛammo manga winggine? Uddewe wanua Mesir. Wisarane, ‘I ya'u sarun rumarisikka wuṛṛu mangaggassa runia. Sarun ta'u ramunsaanna manga soa see tumanangne.

⁹Pattalumpe, ei awal᷊o! Aal᷊orete, ei kereta! Inaite, ei tumannaṛṛanne pangapiddu allungnga wuassu Sudan wuṛṛu Libia. I yamiu lai, ei manga mamamiti'a apianne wuassu wanua Lidia.’ ”

¹⁰Arawe i ya'u, Yeremia mabbiisara manungku eteindi allo MAWU Ruata Apan Atanggaṛṛane wuṛṛu Lembontaṛṛino; su allo udde i Tou ma'ola'a pabbawal᷊issa su anambon seen-Ne. Hal᷊ele-Ne sarun uminassa si mangitou ma'oman sara mal᷊aidda, wuṛṛu ma'inumma daṛṛa mangitou ma'oman sara mawusa. Allo indi MAWU Apan Lembontaṛṛino, naṛṛata manga sasamba-Ne su sawannakka, su winggin Sal᷊ukku Efrat udde.

¹¹Ei tumana'u Mesir, roote watukku Gilead paddea'a undamma! Arawe, salaiwe aroddi tawe undamma apan botongnge maapia si yamiu.

¹²Olangngu apan ma'asili niasingkatante manga walahanna. Tingikku aintul᷊inu niaringiṛṛante su ahewallu runia. Tantara sangkatou natara singana'a waine; i mangitou nal᷊iundu'a su sambau su leta'a.

¹³Sutempo i Nebukadnezar ratun Babel nirumanta mamangalo Mesir, MAWU nabbisara si ya'u, wisara-Ne,

¹⁴“Yeremia, al᷊iata'e watti'a indi su manga soa Mesir, eteudde su Memfis, Migdol wuṛṛu Tahpanhes, ‘Paasaddiate mangesakku watangannu ana waugu anambo apan tatahuanannu sarun masue sulal᷊ummu papangaloanna!

¹⁵Anio i Apis, mongannu apan matohassa udde tinumal᷊angkem batanganne? Ana waugu MAWU buatte namaddon tou!’

¹⁶Manambo tantaranu natara wuṛṛu nadduma'a. I mangitou uahahatto, ‘Wette i ite mapul᷊ete ringannu walahanni ite tadea'u i ite mal᷊iu wuassu asasilakan hal᷊elen seetta.’

¹⁷Onggol᷊eten aranna wakku su ratu Mesir; ‘Itaṛṛa hahio apan namalan tempo mapia.’

¹⁸I Ya'u Ruata apan biakka, i Ya'u ratu, MAWU Apan Lembontaṛṛino. Ere Wowon Tabor nanampal᷊iu manga wowone waine, wuṛṛu Wowon Karmel ual᷊iatta'a su wowon tahal᷊oangnga, etearoddi atohanne i tou rumanta mamangalo si'o.

¹⁹Pandiahite, tumana'u Mesir, maola'a tawananna wuṛṛu iapidda inai! Memfis sarun maola'a tuidda — tampa apan mal᷊annabba ana waugu tawe atanaanna.

²⁰Mesir ere ana'u sapi matawa, arawe nisal᷊asaannu lango wahewalla wuassu sawannakka.

²¹Ewe'e lai manga tantara apan nisewanne tawe naail᷊ore ere ana'u sapi apan tumanite matawa. I mangitou tawe naataṛṛangnga. Sarangkanambone nabbal᷊i'a wuṛṛu tinumal᷊angnga tadea'u masal᷊amatta. Allo ṛuumanni mangitou nia'omante; temponete i mangitou aṛṛiaannu asasilaka.

²²Mesir tinumal᷊angngu watanganne lapiddu sussiitta ere atoanna ana waugu tantaran seetta maranite. I mangitou namangalo si tou ringannu wal᷊iungnga ere taumata mannuwangnga alu

²³wuṛṛu nallol᷊okka mahurangnge maappalla apan tawe aamatanna. Tantaran seetta tawe iareengnga, mannamboanna wuassu saṛṛapalanna. I Ya'u, MAWU nabbisara.

²⁴Tumana'u Mesir sarun pansilianna, ana waugu niwaddon balahanna wuassu sawannakka. I Ya'u, MAWU, buatte nabbisara.”

²⁵MAWU Apan Lembontaṛṛino, Ruatan Israel, nabbisara, “I Ya'u sarun makkuumannu Amon, monganna wuassu Tebe, ahewallu Mesir ringannu manga monganne wuṛṛu manga ratune. Ratu Mesir wuṛṛu anambon taumata apan uatantaṛṛimanna tou

²⁶sarun Ta'u itantilla si Nebukadnezar ratun Babel ringannu tantara apan mappandumma mamate si mangitou. Arawe wua'udde, Mesir sarun atanaanna ere paarorone. I Ya'u, MAWU, buatte nabbisara.”

²⁷“Uma-U, Israel, ariete mata'utta! Allang-Ku Yakub, arie suminggawangnga! I yamiu wuṛṛu papapulunnu sarun Ta'u iapaasal᷊amatta wuassu wanua marau, su tampa i yamiu nitawanna. I yamiu sarun mapul᷊e wuṛṛu matana'a su wanuanu ringannu mal᷊angnganna. I yamiu sarun mabbiakka ringannu matammudda; taweddu pia iaata'utti yamiu.

²⁸Nariaddi ariete mata'utta, ei uma-U, i Ya'u sarun dumanta manal᷊amatta si yamiu. Manga walahanna, su tampa i yamiu Ta'u nisal᷊iawukka, sarangkanambone Ta'u pateanna, arawe i yamiu tawe Ta'u olaanna aroddi. Atonna i yamiu tawe mal᷊iu wuassu ṛuumanna arawe ṛuumang-Ku si yamiu udde matul᷊idda uasul᷊ungngu atoranna. I Ya'u, MAWU, buatte nabbisara.”