Read Talaud YEREMIA 49 Bible Online

YEREMIA 49 - Talaud bible

YEREMIA 49

¹Eteindi wisara MAWU su ola'u Amon, “Anio leta'u ṛuangannu Gad niaṛṛo wuṛṛu niatanaannu manga taumata apan massubba si Monganna Milkom? Apa piate lai taumatan Israel apan botongnge manahekku leta'a udde?

²Arawe sarun a'omanna tempone i Ya'u ma'ola'a tumana'u Raba, inangngu soa Amon udde, maaringikka hahuressan pangalo. Soa udde maola'a winal᷊alanna wuṛṛu manga soa maranine masoṛṛobba abbi. Wua'udde Israel sarun mangul᷊e apia letangnge wuassu manga taumata apan dorone nangaṛṛo.

³Ei taumatan Hesybon, lalluaite ana waugu soan Ai naṛṛimunsa'e! Ei manga wawinen soa Raba, lallute! Palluṛṛete nasa karongnga tatiala massusa. Tal᷊angke pa'auwelenganna napenen awawingo. Milkom mongannu sarun iapidda su pamamuanganna suadio'a ringannu manga imam wuṛṛu manga tembonannu pamarentane!

⁴Ei i yamiu apan mal᷊awangnga! Anio i yamiu mangngunsandakku manga wawal᷊annu apan masuwukka? Anio i yamiu mangngasakku paa'alanu? Ereapa wotongnge i yamiu mabbisara manungku tawe saran sangkatou apan waṛṛani mamangalo si'o?

⁵I yamiu sarun aṛṛiaannu araṛṛagissa apan Ta'u iaparanta wuassu anambon tampa. I yamiu sarun tumal᷊angnga, sambau-sambau maddea'a manal᷊amatta watanganne sassane, wuṛṛu tateddu lai manggemonna yamiu apia.

⁶Arawe su allon sal᷊immurine, ola'u walahannu Amon sarun Ta'u iapawelengnga. I Ya'u, MAWU, buatte nabbisara.”

⁷Eteindi apan niwisara MAWU Apan Lembontaṛṛino su ola'u Edom, “Apa taumatan Edom tawe maaṛṛingidda ringannu asingkatta? Apa manga mananantirone tate mangonggollu tatantiro apia? Apa nawul᷊ite asingkatti mangitou!

⁸Ei tumana'u Dedan, pabbelengke wuṛṛu tal᷊angke! Roote pa'imbuni. I Ya'u sarun makkimunsa'a papapulunni Esau, ana waugu temponete i Ya'u makkuumanni mangitou.

⁹Amungkangngu taumata mani'o wuan anggore, sidutu piaddu ilambene, wuṛṛu amungkangngu taṛṛata'o rumanta sutempo ṛabbi, i tou tumba'u manganu saranapa apan ipaapulune.

¹⁰Arawe, i Ya'u manapu ma'oman sara mawaresi pussa'an papapulunni Esau wuṛṛu mani'attu addapingngu pa'imbunianni mangitou; i mangitou tate maapamunin batanganne apia. Taumatan Edom suadio'a ringannu manga tuṛṛangnge wuṛṛu manga al᷊indonganni mangitou, sarangkanambone sarun pateanna, tawe saran sangkatou apan maatal᷊angnga.

¹¹Ei Edom! Tantanga'e manga asisinu si Ya'u, i Ya'u sarun mappadul᷊i si mangitou. Wala'e manga inawal᷊uanna pia pangangimanna si Ya'u.

¹²Taumata apan ṛinone tawe iṛṛuumanna, aṛṛiaannu ṛuumanna lai, ṛatadde i yamiu tawe? I yamiu natantunte sarun iṛṛuumanna!

¹³I Ya'u massalu ringannu arang-Ku sassane manungku soa Bozra sarun maola'a tampa apan ma'ata'utta apan nitantangngu taumata. Taumata sarun lumagene wuṛṛu mappaattu aranne maola'a wawontoga. Anambon ampungnga maranine sarun mabbal᷊i winal᷊alanna saran mal᷊annu-l᷊annu. I Ya'u, MAWU, buatte nabbisara.”

¹⁴I ya'u, Yeremia, mabbisara, “Ei Edom, i ya'u buatte nanengkamma sambau watti'a wuassu MAWU. I tou buatte nandolokku daroloṛṛanna ringannu manga walahanna tadea'u mandolokki mangitou mangammullu tantara wuṛṛu mandiahite inai mamangalo si'o.

¹⁵MAWU sarun ma'ola'a si'o mabbal᷊i lome wuṛṛu haggealoannu taumata.

¹⁶I'o niawusuannu awawunganu. Taweddu mata'unnu ere su sunnanu. I'o uatana'a su manga wallattu watu, marau su puiddu wowone. Arawe, salaiwe i'o ma'ola'a wal᷊enu sutampa apan atanggaṛṛanne, ere atanggakku salakku manu'a asiaṛṛe, MAWU sarun mapal᷊intukku wua isudde. Tumba'u MAWU apan namasingkattu sarangkanambone udde.”

¹⁷MAWU nabbisara, “Asasilaka apan naṛṛia'a su Edom sarun aroddi ahewalle na'oman sara suapan taumata apan umamatta isudde sarun ṛumindu'a wuṛṛu mata'utta.

¹⁸Su ereapa Sodom wuṛṛu Gomora niṛṛimunsa'a suadio'a ringannu manga ampungnga maranine, aroddi lai Edom. Tawe saran sangkatou apan matana'a apia poiaroddi. I Ya'u, MAWU, buatte nabbisara.

¹⁹Naal᷊ihidda singa sinumabbangnga wuassu mahurangnge maranin Sal᷊ukku Yordan wuṛṛu nirumanta su wadda'a tampa domba u'anna nannal᷊o, aroddi lai Ya'u sarun dumanta wuṛṛu mapatal᷊angngu taumatan Edom wuassu wanua mangitou ringannu mamaroro. Wua'udde i Ya'u sarun mamile sangkatou piaṛṛa'a iapaparenta walahanna udde. Isai wotongnge isul᷊unga si Ya'u? Isai waṛṛani ma'ola'a hatto ringang-Ku? Apa pia piaṛṛa'a apan botongnge lumawangnga si Ya'u?

²⁰Ana waugu udde, paddaringikke apa apan buatte Ta'u nihol᷊aga su saruannu taumatan Edom, wuṛṛu apa apan Ta'u olaanna su saruannu tumana'u soan Teman. Al᷊aṛṛana'i mangitou sarun iapidda inai, wuṛṛu anambon taumata mangngiladdu atata'utta.

²¹Napawe Edom nanawo, sarun aringiṛṛanna hio apan aroddi ahewalle na'oman sara ahewallu runia niumio'a; manga aintul᷊in tumanangnge sarun aringiṛṛanna sara Tahal᷊oangngu Wungkal᷊o.

²²Naal᷊ihidda manu'a asiaṛṛe mangngametta ringannu papaidda uasiappakka, aroddi lai seetta sarun dumanta wuṛṛu mangametta Bozra. Su allo udde tantaran Edom sarun mata'utta ere wawine apan mangunsiwete.”

²³Eteindi apan niwisara MAWU su ola'u Damsyik, “Tumana'u soan Hamat wuṛṛu Arpad sussinggawanga wuṛṛu u'ambul᷊isadda ana waugu naaringikka watti'a lal᷊eo. Naungngi mangitou massusa wuṛṛu maal᷊isangnga ere lua'a su tahal᷊oangnga.

²⁴Tumana'u Damsyik nallome, wuṛṛu tuttal᷊angngu atata'utta. I mangitou sussal᷊iomanna wuṛṛu uatataṛṛangnga ere wawine apan mangunsiwete.

²⁵Soa tinumelengnga wuṛṛu napenen lul᷊uassa udde orassa indi mal᷊annabbe tate taumatane.

²⁶Su ollo udde manga umbasanne sarun mate su manga lal᷊annu soane, wuṛṛu anambon tantarane mate abbi.

²⁷Manga darandungngu Damsyik sarun Ta'u soṛṛowanna, wuṛṛu manga wal᷊en araratuanni Ratu Benhadad Ta'u iapa'epodda. I Ya'u, MAWU Apan Lembontaṛṛino, buatte nabbisara.”

²⁸Eteindi apan niwisara MAWU su ola'u ṛuanganni Kedar wuṛṛu manga wageangngu leta'a paparentanni Hazor, apan buatte niaṛṛo Nebukadnezar ratun Babel, “Ei Nebukadnezar, pangaloite ṛuangannu Kedar wuṛṛu patete manga taumata su samba'an ra'i!

²⁹Aṛṛote manga domba, unta, see lai manga rasanni mangitou ringannu al᷊awo'u lal᷊oṛṛone, wuṛṛu panginutul᷊ite si mangitou, ‘Pangalo uapal᷊iwutte si yamiu!’

³⁰Ei yamiu taumatan Hazor! I Ya'u, MAWU, mabbisara: Paal᷊ihakke inai mangingkatta, wuṛṛu ma'imbuni. I Nebukadnezar ratun Babel buatte nanggol᷊aga mamangalo si yamiu. I tou nabbisara,

³¹‘Otte inaite! Wette mamangalo manga taumata apan uapendamma mal᷊angnganna wuṛṛu matammudda udde. Soa mangitou tawe lal᷊indumme ana waugu tate ngaran pasallanganne wuṛṛu tate papal᷊ene.’ ”

³²MAWU nabbisara apia si Nebukadnezar, “Aṛṛote manga unta wuṛṛu anambon winatangnga papadul᷊iananni mangitou! Manga taumata apan utangnge nipol᷊o maautta udde sarun i Ya'u isal᷊iawukka su anambon tampa. I Ya'u sarun mandantan asasilaka si mangitou wuassu al᷊awo'u pappi'uanne.

³³Hazor sarun iwala aroddi saran mal᷊annu-l᷊annu wuṛṛu maola'a tampa pa'imbuniannu asun ahuranganna. Taweddu saran sangkatou apan matana'a poiaroddi lai. Ia'iu, MAWU, buatte nabbisara.”

³⁴Tawe nal᷊annu napawe i Zedekia naola'a ratun Yehuda, MAWU Apan Lembontaṛṛino nabbisara si ya'u su ola'u wanua Elam.

³⁵MAWU nabbisara, “I Ya'u sarun mamate anambon mapapande mammiti'a apan naaola'a Elam lembon matohassa.

³⁶I Ya'u sarun mapatiuppu anginna su Elam wuassu al᷊awo'u tampa, wuṛṛu manal᷊iawukku tumanangnge su anambon tampa na'oman sara tawe saran sambau wanua apan tawe niarantannu tumatal᷊angnga wuassu Elam udde.

³⁷i ya'u sarun ma'ola'a taumatan Elam matta'uttu seetta apan mamate si mangitou. I Ya'u tumaniten nasa'u si mangitou wuṛṛu sarun makkimunsa'a si mangitou. Sarun Ta'u irolokka tantara iapapangalo si mangitou ma'oman sara i mangitou maṛṛadda'a abbi.

³⁸Manga ratu wuṛṛu manga tembonanni mangitou sarun Ta'u ṛimunsaanna, wuṛṛu su wanua mangitou sarun Ta'u iaparisikka adderan araratuang-Ku.

³⁹Arawe su allo sal᷊immurine, ola'u Elam sarun Ta'u isul᷊e apia. I Ya'u, MAWU, buatte nabbisara.”