Read Talaud YEREMIA 5 Bible Online

YEREMIA 5 - Talaud bible

YEREMIA 5

¹Ei tumana'u Yerusalem, pal᷊intara'o manga lal᷊anna su soanu! Rea'ete su al᷊awo'u tampa, wuṛṛu ellehete sassane. Parikisete su leta'a mal᷊alangnga soa suapane apan pia sangkatou taumata apan matul᷊idda apan mattinsahadda tadea'u satia su Ruata. Amungkangngu pia, ne MAWU sarun mangampungnga Yerusalem.

²I yamiu mabbisara manungku i yamiu massubba MAWU, wutte'e pandumanni yamiu wal᷊ine aroddi.

³Mangke atonna raddorongannu MAWU eteudde tatuṛṛutta. MAWU namuulla si yamiu, arawe i yamiu ma'ielen bagga. I tou nakkimunsa'a si yamiu, arawe i yamiu maddiri aṛṛaanna. I yamiu puane maattikka, wuṛṛu maddiri mawal᷊u wuassu manga rosanu.

⁴I ya'u naṛṛingidda, “Eh, i mangitou tumba'u tumanangnge lal᷊ebbone apan waggan apa-apa. Inolaanni mangitou woddo, ana waugu wagga apa apan ipaapulu wuṛṛu raddorongannu MAWU Ruata wuassi mangitou.

⁵Mappianne i ya'u inaite ringannu manga tembonanne, wuṛṛu maggahatto mangitou. I mangitou sarun maasingkatta apa apan ipaapulu wuṛṛu raddorongannu MAWU Ruata wuassi mangitou.” Arawe, i mangitou sarangkanambone lai maddiri parentannu MAWU; i mangitou maddiri tumuṛṛutta si Tou.

⁶Ana waugu i mangitou sarun pateannu singa wuassu mahurangnge, wuṛṛu ringanna wangngasannu serigala wuassu wadda'u anne. Macan tutul sarun mammal᷊intadda maddea'a inassa maranin manga soa mangitou, wuṛṛu suapan taumata apan sumabbangnga sarun tamboanne. Sarangkanambone udde mariaddi ana waugu i mangitou manambote rosane, wuṛṛu masokka-sokka tumal᷊i'udda Ruata.

⁷MAWU nabbisara, “Anio i Ya'u ṛinone mangampungnga manga rosan uma-U? I mangitou buatte nanantang-Ku wuṛṛu massubba wal᷊ine Ruata. I Ya'u mangngonggollu anna si mangitou ma'oman sara i mangitou mal᷊aidda, arawe i mangitou sinumandaga, wuṛṛu masokka mattembo wawine masandaga.

⁸I mangitou naal᷊ihidda ere awal᷊o esakka apan matawa wuṛṛu apulune mabbawatianna tumaniten bahewalla; sambau-sambau maapulun awingngu hawene.

⁹Apa tawe suṛṛinone i Ya'u makkuumannu walahanna ereudde wuṛṛu mabbal᷊issa anambon inolaanni mangitou?

¹⁰I Ya'u sarun mandolokku seetta inai iapahohakku waillu anggori mangitou, arawe wal᷊ine iapaamussa abbi. I Ya'u sarun mandolokku seetta udde mamaresi manga rannan anggori mangitou, ana waugu manga ranna udde wal᷊ine pussa'a-U.

¹¹Umattu Israel wuṛṛu Yehuda mangke atonna-tonna buatte namahia si I Ya'u. I Ya'u, MAWU, buatte nabbisara.”

¹²Umattu MAWU maggahatton apa apan tawe suṛṛinone su ola'u MAWU. I mangitou nabbisara, “Eh, i Tou tawe ma'aola'a apa-apa. I ite tawe aṛṛiaannu asasilaka wuṛṛu tawe lai maapendamma pangalo wuṛṛu ṛutumma.

¹³Ellehete manga nabi udde tumba'u ere anginna, ana waugu tanata MAWU tawe baddi'a si mangitou.”

¹⁴Ana see MAWU Apan Lembontaṛṛino nabbisara si ya'u, “Yeremia, ana waugu manga taumata udde nabbisara aroddi, ne i mangitou sarun aṛṛiaannu asasilaka apan tumuṛṛutti mangitou tawe mariaddi. I Ya'u sarun ma'ola'a manga wisara-U ere putungnga sulal᷊ummu moṛṛongngu. Walahanna udde sarun maola'a ere anutungnga, wuṛṛu putungnga udde sarun manoṛṛobba si mangitou ma'oman sara masue.”

¹⁵Ei ummattu Israel, MAWU tantal᷊anna mandantan sambau walahanna wuassu wanua apan marau tadea'u iapapangalo si yamiu. Walahanna udde piate ro'en al᷊amonane, pabbawisarane tawe asunnanni yamiu,

¹⁶wuṛṛu manga taṛṛa piti'i mangitou waṛṛani wuṛṛu matohassa; i mangitou mammate tawe aakkanne.

¹⁷I mangitou sarun manginsue hessin leta'a wuṛṛu annu see lai mamate manga anangngu. Sapi wuṛṛu dombanu sarun ṛatanni mangitou, wuṛṛu manga waillu anggore see manga alun aranu sarun paddaṛṛanni mangitou. Manga soa pia tanda batune apan ia'asakki yamiu sarun ihohakki mangitou.

¹⁸MAWU nabbisara, “Salaiwe aroddi, sutempo udde lai uma-U tawe Ta'u pateanna.

¹⁹Arawe amungkangngu i mangitou maiwal᷊o anio i Ya'u na'ola'a sarangkanambone udde su saruanni mangitou, wal᷊oa'e ei Yeremia, manungku ereapa i Ya'u buatte tinantangngi mangitou su wanua mangitou sassane huna mattaṛṛamawu manga mongannu walahanna waine, aroddi lai i mangitou sarun maola'a allangngu manga taumata raho su wanua waine.”

²⁰I ya'u nirolokku MAWU niapapasingkattu tanata-Ne indi su papapulunni Yakub apan uatana'a su Yehuda,

²¹“Paddaringikka, ei i yamiu taumata woddo wuṛṛu longonna! I yamiu pia mata arawe tawe maasilo, pia tal᷊inga arawe tawe maaringikka!

²²Ete i Ya'u MAWU; anio i Ya'u tawe iata'utti yamiu? Ṛinone i yamiu mangngindo su saruang-Ku! Ete i Ya'u apan nallanginnu apanne apan naola'a sasaran tahal᷊oangnga apan tawe al᷊iuanna saran mal᷊annu-l᷊annu. Tahal᷊oangnga wotongnge mattandi'a wuṛṛu walladde mandi'uṛṛungnga, arawe tawe maal᷊iu passaranne udde.

²³Arawe puan kamiu maattikka wuṛṛu apulune lumawangnga; i yamiu buatte sinumewadda i Ya'u tinantangkeng kamiu.

²⁴Taambe saran paassa i yamiu mannaungnga tadea'u mangaddatta si Ya'u, sumbal᷊i ete i Ya'u apan nandolokku uranna, mawae ete su panattaṛṛanne aroddi lai su panginsueannu tempon uranna. Ete i Ya'u lai apan nangonggolla si yamiu tempon pangitinganna suapan mattonna.

²⁵Arawe manga rosanu eteudde maola'a hal᷊ahe su al᷊awo'u apapia, na'oman sara i yamiu tawe maatemma udde.

²⁶Ei uma-U, suwallatti yamiu manga taumata lal᷊eo. Ere taumata apan uataṛṛapa sedda apan nitaingnga ipanametta manu'a, aroddi lai i mangitou nantaingngu sedda ipanametta taumata.

²⁷Ere mananaputta manu'a nantaṛṛo manu'a lai su sal᷊akke, aroddi lai i mangitou mantaṛṛo wal᷊en mangitou ringannu manga saranapa apan niwahianna. Etearoddi i mangitou naola'a mattaṛṛino wuṛṛu naala

²⁸lapiddu natawa wuṛṛu su lal᷊umanna'a. Al᷊al᷊eon mangitou tawe patta'al᷊anne. I mangitou tawe pallal᷊aghu matul᷊idda sulal᷊ummu hatton manga ana'a asisitimpal᷊ussa, wuṛṛu tawe manamba'a taumata apan niallangnga.

²⁹Arawe, i Ya'u, MAWU, sarun makkuumanni mangitou ana waugu sarangkanambone udde; i Ya'u sarun mabbal᷊issa manga inolaannu walahanna indi.

³⁰Sambau arariaddianna apan bahewalla wuṛṛu ma'ata'utta buatte nariaddi su wanua indi:

³¹manga nabi mangngawusu, manga imam mangngimbe tumuṛṛuttu apulun naungnge sassane wuṛṛu i yamiu uma-U mappulun inolaanna udde. Arawe apa apan sarun olaanni yamiu napawe nia'omante allo panginsueanne?”