Read Talaud YEREMIA 50 Bible Online

YEREMIA 50 - Talaud bible

YEREMIA 50

¹Eteindi tanatan MAWU si ya'u su ola'u soan Babel wuṛṛu tumanangnge,

²“Pasea'e tatiala wuṛṛu al᷊iata'e su manga walahanna manungku Babel nanawote! Arie pa'adappinga'a olangnge udde! I Merodakh monganne naṛṛimunsa'e, wuṛṛu manga paal᷊uanne apan masandaga napesangke nattal᷊eṛṛonga, see manga mawune lembon haggeloanna.

³Sambau walahanna wuassu sawannakka sarun dumanta mamangalo Babel wuṛṛu ma'ola'a wanua udde mabbal᷊i wadda'a apan maṛṛasa. Taumata wuṛṛu winatangnga sarun tumal᷊angnga, wuṛṛu tate lai apan maapulu matana'a poiaroddi.”

⁴MAWU nabbisara, “Sutempo udde taumatan Israel sarun dumanta suadio'a ringannu lulluai, maddea'a si Ya'u, Ruata mangitou.

⁵I mangitou sarun maiwal᷊on lal᷊anna watukku Sion, ana see niumamatte su lal᷊anna udde. I mangitou sarun ma'ola'a pa'aire sarangkal᷊o'enge si Ya'u, wuṛṛu sidutu uaagassa pa'aire udde.

⁶Uma-U naal᷊ihidda domba apan niwalate manga mallal᷊u'adde nilamammiṛṛanne su panenteanna. I mangitou mammal᷊intadda wuassu wowone sambau watukku wowone waine wuṛṛu waggate tanne suapate wal᷊e mangitou.

⁷I mangitou nitalliwunanna wuṛṛu nisansaran anambon taumata apan nassomba mangitou. Manga seettu uma-U mabbisara, ‘Apa apan niola'i ite, tawe sal᷊ane, ana waugu manga taumata udde narosate su lantakku hati MAWU. Al᷊amonan mangitou mangngimanna MAWU, nariaddi ṛinone lai i mangitou sidutu satia si Tou.’

⁸Ei uma-U Israel, tal᷊angke watukku Babel! Ete i yamiu apan ṛinone paarorone inai, tadea'u ingana'a waine manantuṛṛutta.

⁹I Ya'u sarun mangal᷊oren anambon balahanna apan mangkatohassa wuassu sawannakka tadea'u i mangitou mamangalo Babel. I mangitou sarun mangatokku barisanna mapapangalo mando'appa Babel wuṛṛu mamaddone. I mangitou udde manga taṛṛa piti'a pande apan anaanne tawe massal᷊a.

¹⁰Babel sarun pangaṛṛoanna, wuṛṛu mangangaṛṛone sarun manganu al᷊awo'a ringannu apulun naungnga. I Ya'u, MAWU, buatte nabbisara.”

¹¹MAWU nabbisara, “Ei taumatan Babel, i yamiu mangngaṛṛo uma-U. I yamiu sussolo'u al᷊al᷊uassa ere awal᷊o manuntingi, wuṛṛu ere sapi apan tantal᷊anna u'anna.

¹²Arawe i yamiu sarun maola'a walahanna apan lembon tawe gunane suwallattu al᷊awo'u walahanna. Soanu sassane apan bahewalla udde sarun heloanna wuṛṛu pansilianna. Wanuanu sarun maola'a wadda'u anne apan maṛṛasa wuṛṛu mamara.

¹³Ana waugu i Ya'u nasa'u, ne Babel sarun mallambe ete tuidda wuṛṛu taweddu matana'a. Sarangkanambone apan sumabbi isudde sarun ṛumoro wuṛṛu mata'utta.

¹⁴Ei i yamiu manga taṛṛa piti'a! Atoṛṛa'e barisannu palliwunna wuṛṛu pamangalo Babel. Pitia'e anambon anaannu watukku Babel, ana waugu i tou buatte na'ola'a rosa si Ya'u.

¹⁵Intul᷊ia'e hahoressan pangalo pamal᷊iwuta'a soa udde! Orassa indi Babel nawaddote. Manga darandungnge buatte nihohakka wuṛṛu naṛṛaate. I Ya'u tantal᷊anna mabbal᷊issa Babel. Ana waugu udde sansaraite i mangitou ere lai i mangitou mannansara taumata waine.

¹⁶Arie pabbala'a taumata mabbailla ara'e mangitingnga su wanua udde. Anambon taumata raho apan uatana'a isudde sarun mapul᷊e su wanuane, ana waugu i mangitou matta'uttu tantara apan mammangalo.”

¹⁷MAWU nabbisara, “Taumatan Israel ere ammul᷊annu domba apan a'enggenanna wuṛṛu nisal᷊iawukku singa. Paarorone i mangitou nipangaloannu ratun Asyur, wua'udde i Nebukadnezar ratun Babel nallaso'a manga duṛṛi mangitou.

¹⁸Ana waugu udde, i Ya'u, MAWU Apan Lembontaṛṛino, Ruatan Israel, sarun makkuumanni Ratu Nebukadnezar wuṛṛu wanuane ere lai Ya'u nakkuumannu ratun Asyur.

¹⁹I Ya'u sarun mamelengngu taumatan Israel su wanuan mangitou. I mangitou sarun umanna wuassu hessin leta'u Wowon Karmel wuṛṛu leta'u Basan. I mangitou sarun mal᷊aiddu hessin leta'u Efraim wuṛṛu Gilead.

²⁰Sutempo udde Israel wuṛṛu Yehuda sarun mawaresi wuassu rosa, ana waugu i Ya'u sarun mangampungnga manga taumata apan buatte i Ya'u niapaasal᷊amatta. I Ya'u, MAWU, buatte nabbisara.”

²¹MAWU nabbisara su sambau walahanna wuassu sawannakka, “Pangaloite tumana'u Merataim wuṛṛu Pekod. Pate wuṛṛu insuete i mangitou. Amata'e parenta-U. I Ya'u, MAWU, buatte nabbisara.”

²²Tingikku pangalo ruddallu'a su wanua, ne nariaddite ahahohakka apan bahewalla.

²³Ahewallu runia nirupan Babel na'oman sara naṛṛimunsa'a, arawe orassa indi darupa udde napaddite! Al᷊awo'u walahanna niṛṛumoro naaringikka apa apan buatte nariaddi su wanua udde.

²⁴MAWU nabbisara, “Babel, i'o nilumawangnga si Ya'u, ana waugu udde nul᷊ussa sulal᷊ummu sedda apan Ta'u nitaingnga si'o, arawe i'o tawe maatutukka.

²⁵Gudangu ahi-U buatte Ta'u niwu'a, wuṛṛu ringannu nasa'u Ta'u nisabbangnga manga ahidda udde, ana waugu i Ya'u MAWU Apan Lembontaṛṛino ṛinone ma'ola'a sambau manara su Babel.

²⁶Pangaloite Babel wuassu al᷊awo'u pappi'uanne, wuṛṛu hohaṛṛa'e manga gudangu gandumme! Ammul᷊a'e manga saranapa apan niaaṛṛo ere lai yamiu mangngammullu gandumma! Ṛimunsa'e wanua udde! Arie piaddu pia lambene!

²⁷Patete anambon tantarane! Ṛawate i mangitou! Nasilakate walahannu Babel! Nia'omante tempone i mangitou iṛṛuumanna!” (

²⁸Manga taumata apan tinumal᷊angnga watukku Yerusalem wuassu Babel mabbatti'a ereapa MAWU Ruatang kite mabbal᷊issa inolaannu taumatan Babel su Wal᷊en Babel.)

²⁹MAWU nabbisara, “Doloṛṛa'e manga taṛṛa piti'a mamangalo Babel. Ammul᷊a'e suapan taumata apan pande mamiti'a. Talliwunete soa udde wuṛṛu arie pabbala'a saran sangkatou apan matal᷊angnga. Wal᷊isete anambon inolaanne wuṛṛu ola'e i tou uasul᷊ungngu inolaanne, ana waugu i tou buatte na'ola'a tawe addanne su saruang-Ku, Apan Lembonsusi, Ruatan Israel.

³⁰Su allo udde manga saṛṛentumuwone sarun mate su manga lal᷊annu soane, wuṛṛu anambon tantarane ṛimunsaanna. I Ya'u, MAWU, buatte nabbisara.

³¹Babel, naungngu tumaniten matanggakka! Ana waugu udde i Ya'u, MAWU Apan Atanggaṛṛanne, Ruata Apan Lembontaṛṛino, mando'appa si'o. Nia'omante tempone i'o Ta'u iṛṛuumanna.

³²Walahannu apan mawunga udde sarun matara wuṛṛu mawal᷊atta. Tawe saran sangkatou apan mantul᷊ungngu dumarisikka. Manga soanu sarun Ta'u soṛṛowanna, wuṛṛu al᷊awo'a maranine sarun ṛimunsaanna.”

³³MAWU Apan Lembontaṛṛino nabbisara, “Taumatan Israel wuṛṛu taumatan Yehuda ua'ol᷊obba. Sarangkanambone apan nanawanna si mangitou uariagga si mangitou matoha-tohassa wuṛṛu mangke tawe mamallossi mangitou.

³⁴Arawe i Ya'u mananal᷊amatti mangitou udde matohassa, arang-Ku MAWU Apan Lembontaṛṛino. Ete i Ya'u sassane apam nangesakku hatto mangitou wuṛṛu nangapiddu paddarame su wowon dunia. Arawe su taumatan Babel i Ya'u sarun mandantan pabbawawul᷊o wuṛṛu atata'utta.”

³⁵MAWU nabbisara, “Matete Babel suadio'a ringannu tumanangnge wuṛṛu tembonannu araratuanna see lai manga mapapande mangitou!

³⁶Matete manga nabi su Babel! I mangitou taṛṛa awusu wuṛṛu longonna. Natete tantaran Babel apan matohassa! Aroddi ata'unne i mangitou!

³⁷Naṛṛussa'e awal᷊o wuṛṛu keretan pangalone! Natete manga tantara nassewanne! Aroddi al᷊omene i mangitou! Nasuete pa'aalan Babel! Aṛṛote manga darotongnge!

³⁸Paamara'e al᷊awo'u sal᷊ukka wuṛṛu wawail᷊anne! Ana waugu, Babel napenen pasasubba paal᷊uanna apan maarantinna, apan naaolala ingana'a maddaralone nabbewa.

³⁹Ana waugu udde Babel sarun maola'a tampa manga ringnga wuṛṛu manga ghaṛṛaho lal᷊eo see manga manu'a unta. Saran mal᷊annu-l᷊annu tawe taumata apan mappulu matana'a apia poiaroddi.

⁴⁰Su ereapa i Ya'u nanggohakku Sodom wuṛṛu Gomora suadio'a ringannu ampungnga maranine, aroddi lai Ya'u sarun makkimunsa'a Babel. Tawe saran sangkatou apan matana'a lai poiaroddi. I Ya'u, MAWU, buatte nabbisara.

⁴¹Sambau walahanna apan matohassa tantal᷊anna u'amatta wuassu wanua apan marau su sawannakka. I mangitou nirumanta suadio'a ringannu mararatu inai mapapangalo.

⁴²Ahiddi mangitou anaanna wuṛṛu tambakka; i mangitou maṛṛagissa wuṛṛu wagga mangampungnga. Ere tingikku tahal᷊oangnga mattandi'a aroddi lai tingikku lempangngu awal᷊o i mangitou apan tantal᷊anna sassasanna inai mamangalo Babel.

⁴³Naaringikka watti'a udde, ratun Babel nabbal᷊i nallome. I tou papal᷊iwutannu atata'utta, wuṛṛu uatataṛṛangnga ere wawine apan mangunsiwete.

⁴⁴Ere singa apan sinumabbangnga wuassu mahurangnge maappalla maranin Sal᷊ukku Yordan wuṛṛu nirumanta su wadda'a tampa manga domba mannioma, aroddi lai Ya'u, MAWU, sarun dumanta wuṛṛu ma'ola'a taumatan Babel tumal᷊angnga wuassu manga soa mangitou ringannu namaṛṛoro. Wua'udde i Ya'u sarun mamile sangkatou piaṛṛa'a iapaparenta walahanna udde. Isai apan botongnge isul᷊ung-Ku? Isai waṛṛani ma'ola'a parakara ringang-Ku? Apa pia piaṛṛa'a apan botongnge mando'appa si Ya'u?

⁴⁵Ana waugu udde, paddaringikke apa apan Ta'u ihol᷊aga su saruannu soan Babel, wuṛṛu apa apan Ta'u olaanna su saruannu tumanange. Al᷊aṛṛana'i mangitou lai sarun wol᷊enganna inai, wuṛṛu anambon taumata sarun mata'utta.

⁴⁶Napawe Babel nanawote, sarun aṛṛingiṛṛanna paggahahio apan aroddi asaddanne na'oman sara ahewallu runia umio'a; manga aintul᷊in tumanangne sarun aringiṛṛannu manga walahanna waine.”