Read Talaud YEREMIA 51 Bible Online

YEREMIA 51 - Talaud bible

YEREMIA 51

¹MAWU nabbisara, “I Ya'u sarun mandolokku anginna daromba apan tumiuppa watukku Babel wuṛṛu ringannu tumanange.

²Sarun Ta'u irolokka manga taumata raho apan sarun manggohakku Babel ere anginna mannalla'u wal᷊a'an gandumma. Su allo asasilaka udde i mangitou sarun mamangalo wanua udde wuassu al᷊awo'u tampa wuṛṛu manahangginna wanua ma'oman sara mawaresi.

³Ariete mangonggollu tempo su tantarane mamiti'u anaanne ara'e mamungan laubbu pangalone. Al᷊aṛṛanangnge saṛṛen tumuwo arie pabbala'a wiakka. Ṛimunsa'e anambon tantarane!

⁴I mangitou sarun mal᷊essa wahewalla wuṛṛu nate su manga lal᷊annu soan mangitou.

⁵I Ya'u, MAWU, Ruata Apan Lembontaṛṛino, Ruata Israel susi, sarun tawe manantangu Israel wuṛṛu Yehuda, salaiwe i mangitou buatte na'ola'a rosa su saruang-Ku.

⁶Panal᷊amatte watangannu! Tal᷊angke wuassu Babel, arie i yamiu lai iapate ana waugu paddarosane! Ana waugu indete tempone i Ya'u mabbal᷊issa al᷊al᷊eon Babel, wuṛṛu makkuumanni tou uasul᷊ungngu inolaanne.

⁷Babel dorone ere halasi wul᷊awanna apan Ta'u aagassanna wuṛṛu na'ola'a ahewallu runia wu'anna. Manga walahanna ma'inumma anggore wuassu halasi udde, na'oman sara i mangitou nabbewa.

⁸Arawe inaṛṛombanganne Babel nanawo wuṛṛu napesangnga. Luaie'o i tou, wuṛṛu rea'ete undamma pangundama'a manga lessane, asinungka i tou wotongnge mapia.

⁹Manga taumata raho apan uatana'a poiaroddi uahahatto sangkatou ringannu waine, ‘I ite buatte nattinsahadda mantul᷊ungngu Babel, arawe nal᷊iwue! Mappianne i ite manantangken banua indi wuṛṛu mapul᷊ete su wanuang kite sambau-sambau. MAWU nakkuumanten Babel ringannu maṛṛagissa, wuṛṛu mangke nakkimunsa'a.’ ”

¹⁰Umattu MAWU nabbisara, “MAWU buatte napal᷊iatta'a manungku i ite su samba'a apan naṛṛino. Wette inaite watukku Yerusalem wuṛṛu mabbatti'a poiaroddi apa apan buatte niola'u MAWU Ruatang kite.”

¹¹MAWU buatte nanondo manga ratu Media, ana waugu i Tou mappulu makkimunsa'a Babel. Eteudde lal᷊an-Ne i Tou mabbal᷊issa inolaannu manga taumata apan nakkimunsa'a wal᷊e-Ne. Manga tembonannu wuntuannu tantaran pangalo namarenta, “Takko'e anaanna! Riahite allungnga!

¹²Onggol᷊eten tialane napawe mamangalo manga darandungngu Babel. Tohasse pandariagga. Atoṛṛa'e mallaṛṛapa. Saddiate pananametta!” MAWU buatte napaamattu ṛiin-Ne su saruannu taumatan Babel.

¹³wanua tumaniten ala wuṛṛu manambo sal᷊ukke, arawe tempom pabbiaṛṛanne nasuete; panginsueannu pabbiaṛṛanne na'omate.

¹⁴MAWU Apan Lembontaṛṛino nassalu ringannu watangan-Ne sassane manungku i Tou sarun mandolokku taumata anambone ere saṛṛapalanna inai mamangalo Babel, wuṛṛu i mangitou sarun mangintul᷊in hahuressan auntunganna.

¹⁵MAWU nandiaddi runia ringannu taṛṛino-Ne, nallanginnu saṛṛen dunia ringannu asingkan-Ne, wuṛṛu namilattu langitta ringannu asasirrong-Nge.

¹⁶Tumba'u ringannu mangonggollu parenta, mangngelekke ua'e su winalanganna. Wuassu manga pentakku runia niaparanta-Ne winabbawa, wuṛṛu niolang-Nge sawallo malleessa sulal᷊ummu uranna, see niaparanta-Ne anginna wuassu tampa araddoanne.

¹⁷Naasilo sarangkanambone udde naatutukke taumata, manungku i tou woddo wuṛṛu tawe passasunna. Manga mapapanden bul᷊awanna niawul᷊iannu aranne, ana waugu paal᷊uanna sassubbanna niolangnge palassu wuṛṛu tawe sasangngone.

¹⁸Manga paal᷊uanna udde tawe aregane, ṛinone aal᷊uandahanna wuṛṛu heloanna. Napawe nia'omante tempone, i mangitou sarun nate.

¹⁹Ruatan Yakub tawe ere manga paal᷊uanna udde; i Tou nandiaddi al᷊awo'u saranapa. Aran-Ne eteudde MAWU Apan Lembontaṛṛino; i Tou buatte namile Israel maola'a uman-Ne.

²⁰MAWU nabbisara, “Babel, i'o naal᷊ihidda darupa, ahi-U ipaatta mapapangalo. I'o Ta'u nipaatta ipandupa manga walahanna wuṛṛu manga araratuanna.

²¹I'o Ta'u ipaatta ipakkimunsa'a awal᷊o wuṛṛu sumasa'ene, see kereta wuṛṛu mangangapidde.

²²I'o Ta'u ipaatta ipamate esakka wuṛṛu wawine, timmadde aroddi lai dario'a, maṛṛuala wuṛṛu umbasanna.

²³I'o Ta'u ipaatta ipamate mallal᷊u'adda wuṛṛu winatangnga papadul᷊iananne, mabbawailla wuṛṛu sapin pajekone, tembonanne wuṛṛu manga perwira atanggaṛṛane.”

²⁴MAWU nabbisara, “Pa'ellete ringannu matanu sassane erepa i Ya'u orassa indi mabbal᷊issa Babel wuṛṛu tumanangnge al᷊awo'u al᷊al᷊eo apan niola'i mangitou su Yerusalem.

²⁵Ei Babel, i'o naal᷊ihidda wowone apan nanggohakku ahewallu runia. Arawe i Ya'u, MAWU, sarun mando'appa si'o. I'o sarun Ta'u wol᷊enganna wuṛṛu Ta'u ital᷊inggi see Ta'u iwala matambunna maola'a awu.

²⁶Tawe saran sambau watu lai wuassu winal᷊alannu apan ipaatta apia ipa'ola'a wal᷊en. I'o sarun maola'a ere wadda'u anne sarangkal᷊o'enge. I Ya'u, MAWU, buatte nabbisara.”

²⁷“Ei ratu wuassu sawannakka! Onggol᷊eten tatialan pangalo! Tiuppe trompetta tadea'u manga walahanna maaringikka! Diarraa'e manga walahanna inai mapapangalo lumawangnga Babel! Doloṛṛa'e araratuannu Ararat, Mini wuṛṛu Askenas mamangalo. Pamilete sangkatou panglima iapapiaṛṛa'u pangalo udde. Piaṛṛa'e awal᷊o ringannu anambone ere ammul᷊annu saṛṛapalanna.

²⁸Riahite manga walahanna inai mapapangalo lumawangnga Babel. Waggoi manga ratu Media suadio'a ringannu manga tembonanne wuṛṛu manga piaṛṛangnge see tantara wuassu al᷊awo'u wanua apan paparentanni mangitou.

²⁹Runia tinumaraddalla wuṛṛu niumio'a ana waugu i Ya'u tantal᷊anna mappaamattu ṛiing-Ku ipa'ola'a Babel mal᷊unggukka wuṛṛu tate atanaanu taumata.

³⁰Taumatan Babel naddote mapapangalo wuṛṛu uatana'e su manga tanda batu. I mangitou niawul᷊iannu awawaṛṛani wuṛṛu tate maa'al᷊iore. Manga ngara pasallangannu soa buatte nihohakka, wuṛṛu manga wal᷊en nisoṛṛobba.

³¹Manga daroloṛṛanna tinumal᷊angnga ual᷊al᷊intuṛṛutta inai mamasingkatta su ratun Babel manungku soane tataliwunante wuassu al᷊awo'u pappi'uanne.

³²Tampa palliuanna aintaṛṛoanten seetta, wuṛṛu manga tanda batu pattilindumanna nisoṛṛobba. Tantaran Babel nassongkakka.

³³Tate mal᷊annu lai i mangitou iawaddo wuṛṛu mangke ṛindannu seetta ere gandumma su tampa pallaṛṛindanna. I Ya'u, MAWU Apan Lembontaṛṛino, Ruatan Israel, buatte nabbisara.”

³⁴Yerusalem niuno wuṛṛu nianna na'oman sara nasue ṛatangannu ratun Babel; i tou nanahangginna lal᷊oṛṛon soa udde ere taumata namoson botolla. Naal᷊ihidda sambau winatangnga wahewalla, i tou nangalluppa Yerusalem wuṛṛu nalloṛṛo tianne ringannu al᷊awo'a apan mapia wuassu soa udde, see lambene niramme.

³⁵Tumana'u Sion, wal᷊oa'e, “Antimanna Babel aṛṛiaannu araṛṛagissa apan niolangnge si ite!” Tumana'u Yerusalem, wal᷊oa'e, “Antimanna Babel aṛṛiaannu asasusa apan niolangnge si ite!”

³⁶Ana waugu udde MAWU nabbisara su tumana'u Yerusalem, “I Ya'u sarun manahekku hattonu wuṛṛu mabbal᷊issa inolaannu manga seennu si'o. Manga al᷊imatang kua'e wuṛṛu manga sal᷊ukku Babel sarun Ta'u iapaamara.

³⁷Wanua udde sarun maola'a wil᷊alanna, tampa pa'imbuniannu asun ahuranganna. Taumata matta'utta maasilo udde, wuṛṛu tawe saran sangkatou apan mappulu matana'a poiaroddi.

³⁸Taumatan Babel mammansinga ere singa, wuṛṛu mammansaga ere ana'u singa.

³⁹Tantal᷊anna apulu mangitou umanna niatambanna, i Ya'u sarun manaddia wiakki mangitou, wuṛṛu mapawu'anni mangitou wuṛṛu lumiṛṛibba ma'oman sara amatiil᷊anna wuṛṛu tate maatimpu'o apia.

⁴⁰I mangitou sarun Ta'u iapidda ṛatanna ere ana'u domba, ambinga, wuṛṛu domba esakka. I Ya'u, MAWU, buatte nabbisara.”

⁴¹MAWU nabbisara, “Babel apan raddaloannu ahewallu runia niaaṛṛote wuṛṛu niatanaante! Tumanite maata'utta wanua udde su manga walahanna.

⁴²Ua'en tahal᷊oangnga tinumompe'a su Babel; manga luangnge nirumapa naṛṛammon banua udde.

⁴³Manga soane nabbal᷊i tampa apan maata'utta, ere wadda'u anne apan maṛṛasa. Tawe taumata apan mappulu matana'a ara'e sumabbi isudde.

⁴⁴Bel, mongannu wanua Babel, sarun Ta'u iṛṛuumanna. I tou sarun Ta'u olaanna mapawelengngu apa apan buatte niaṛṛone. Manga walahanna tate massubba si tou apia. Manga darandungngu Babel naṛṛaate.

⁴⁵Ana waugu udde pangingkatte wua isudde, ei umattu Israel! Panal᷊amatte watangannu wuassu asasa'u-U apan bahewalla.

⁴⁶Ariete mata'utta ara'e suminggawanga ana waugu watti'a apan aaringiṛṛanni yamiu. Suapan tonna massal᷊iawukka watti'a apan uapapaṛṛala — watti'a su ola'u araṛṛagissa sulal᷊ummu wanua wuṛṛu su ola'u manga ratu apan uapapangalo sangkatou ringannu waine.

⁴⁷Pangimante, tempone sarun a'omanna i Ya'u makkuumannu manga paal᷊uannu Babel. Ahewallu wanua udde sarun heloanna, wuṛṛu anambon tumanangnge sarun pateanna.

⁴⁸Al᷊awo'u saranapa su langitta wuṛṛu su runia sarun lumuassa napawe Babel manawo su liman balahanna wuassu sawannakka apan nirumanta mapa'unone.

⁴⁹Manambo taumata su ahewallu runia nate niapate ana waugu Babel, arawe orassa indi Babel sarun manawo ana waugu taumatan Israel nipate. I Ya'u, MAWU, buatte nabbisara.”

⁵⁰MAWU nabbisara su taumatan Israel apan uatana'a su Babel, “I yamiu nal᷊iute wuassu pamamate! Nariaddi, roote orassa indi lai! Arie paṛṛaddo! Salaiwe i yamiu marau wuassu wal᷊en, pannaungke si Ya'u, Mawunu, wuṛṛu su Yerusalem.

⁵¹I yamiu mabbisara, ‘I yami haggeloanna wuṛṛu pappansilianna; i yamiu nasili ana waugu manga taumata raho ua'ianna su manga wabbo'a susi sulal᷊ummu Wal᷊en MAWU.’

⁵²Ne, paddaringikke wisara-U indi. Sarun dumanta tempone i Ya'u makkuumannu manga paal᷊uannu Babel. Su ahewallu wanua udde sarun aringiṛṛanna tingikku sasal᷊iomanna ana waugu nal᷊essa wahewalla.

⁵³Salaiwe Babel ma'asaa langitta wuṛṛu ma'ola'a tanda'a apan tawe a'omanna, i Ya'u sidutu sarun mandolokku taumata inai manggohakka. I Ya'u, MAWU, buatte nabbisara.”

⁵⁴MAWU nabbisara, “Paddaringikka! Su Babel pia taumata sussal᷊iomanna wuṛṛu lulluai massusa ana waugu ahahohakka apan nariaddi su wanua udde.

⁵⁵I Ya'u tantal᷊anna manggohakku Babel wuṛṛu mapaaddo manga tingikku hion damene. Seetta nirumanta naal᷊ihidda lua'a ruddapa, wuṛṛu tantarane mammangalo ringannu hahuressan pangalo.

⁵⁶I mangitou nirumanta manggohakku Babel, mannametta manga tantarane wuṛṛu namaddi manga ahiddi mangitou. Ete i Ya'u MAWU apan makkuumannu al᷊al᷊eo, wuṛṛu Babel sarun Ta'u wal᷊isanna uasul᷊ungngu inolaanne.

⁵⁷I Ya'u sarun mapawu'annu manga mangangumbele parenta su Babel — manga mapapande, mamamiaṛṛa'a wuṛṛu tantara. I mangitou sarun tate mapabbangunna apia, matiille saran mal᷊annu-l᷊annu. I Ya'u buatte nabbisara; ete i Ya'u ratu, i Ya'u MAWU Apan Lembontaṛṛino.

⁵⁸Darandungngu Babel apan mangkatohassa sarun Ta'u hohaṛṛanna ma'oman sara maddatakku leta'a. Ngarane apan mangkatanggakka sarun Ta'u soṛṛowanna sara masue. Tawe gunane inasaharannu manga walahanna, ana waugu anambon hessin manaran mangitou sarun ametannu ara'e masorobbu putungnga. I Ya'u, MAWU Apan Lembontaṛṛino, buatte nabbisara.”

⁵⁹Mandariaga si Ratu Zedekia eteudde i Seraya ana'i Neria pulunni Mahseya. Su tonna aiappanne i Zedekia naola'a ratun Yehuda, i Seraya tinumantalongnga si Zedekia watukku Babel. Ne i ya'u nangonggolla si tou sambau manara.

⁶⁰Anambon asasilaka apan sarun maṛṛia'a su Babel wuṛṛu manga inolaanna waine su ola'u wanua udde buatte ta'u niwoṛṛetta sulal᷊ummu sambau buke lal᷊ul᷊unanna.

⁶¹Wua'udde i ya'u nabbisara si Seraya, “Napawe i'o na'omate su Babel, paddea'e lal᷊anne tadea'u anambon woṛṛetta sulal᷊ummu buke indi wotongnge iwasanu su manga taumata poiaroddi.

⁶²Wua'udde aal᷊iomante arendi, ‘MAWU, I'o buatte nabbisara manungku soa indi sarun ṛimunsaan-Nu na'oman sara mawae taumata aroddi lai winatangnga mahangginna, wuṛṛu tampa indi mabbal᷊i ere wadda'u anne sarangkal᷊o'enge.’

⁶³Ne, napawe i'o buatte nabbasa lal᷊oṛṛon buke su manga taumata udde, i ita'a watu su buke indi, wua'udde tuntunga'e su pattangngannu Sal᷊ukku Efrat,

⁶⁴lapiddu mabbisara, ‘Etearendi sarun mariaddi ringannu Babel. Wanua indi sarun lumakkubba wuṛṛu tate lumapputta apia ana waugu asasusa apan niṛṛia'u MAWU si tou.’ ” Manga wisaran Yeremia naddusse isindi.