Read Talaud YEREMIA 8 Bible Online

YEREMIA 8 - Talaud bible

YEREMIA 8

¹Sutempo udde manga duṛṛin mararatu wuṛṛu manga tembonannu wanua su Yehuda, aroddi lai duṛṛi manga imam, nabi wuṛṛu tumana'u Yerusalem baine sarun iapasabbangnga wuassu labbingngi mangitou,

²wal᷊ine tadea'u iammulla wuṛṛu ilabbingnga apia ewe'e iawala su leta'a maola'a sapadda. Duṛṛi manga taumata udde sarun iwati su saruannu matannallo, wul᷊anna wuṛṛu manga anumpitanna apan sassubbanni mangitou, a'imbeanna, sassubbanna, wuṛṛu paddoronganna tatantiro.

³Ne manga taumata apan ta'e wiakka wuassu walahanna apan dal᷊eo indi apan buatte Ta'u nisal᷊iawukka su al᷊awo'u tampa sarun mappulun mate wuassu mabbiakka. I Ya'u, MAWU Apan Lembontaṛṛino, buatte nabbisara.”

⁴MAWU nandolo'u niapawisara arendi su uman-Ne, “Amungkangngu taumata manawo, i tou sarun mabbanguna apia, wuṛṛu amungkangngu taumata nilamammiṛṛanne su lal᷊anna, i tou sarun mabbelengnga apia.

⁵Arawe anio i yamiu, uma-U, sidutu sussempalla wuṛṛu mannantang-Ku? I yamiu uaagassa matohassa su manga paal᷊uannu, wuṛṛu maddiri mabbelengnga ringang-Ku!

⁶I Ya'u buatte naddaringikka mapia-pia, arawe i yamiu buatte nabbisara su ereapa olangnge. Tawe saran sangkatou wuassi yamiu sumassillu inolaanna apan dal᷊eo. Taweddu mabbisara, ‘Apate pasasal᷊a'u?’ I yamiu sarangkanambone maddea'a lal᷊annu sassane naal᷊ihidda awal᷊o sinumutta su tampan papangaloanna.

⁷Waṛṛoa lai masingkatta tempone i tou mabbelengnga; tekukur, tal᷊umpiso'a wuṛṛu murai lai masingkattu tempone mangingkatta. Arawe i yamiu, uma-U, tawe maaillal᷊a manga tita apan Ta'u nionggolla si yamiu.

⁸Waṛṛani atonna i yamiu mabbisara manungku i yamiu pande, wuṛṛu masingkattu manga tita-U! Annama'o ellehe manga tita-U udde niwal᷊u manga mapapanden agama apan taṛṛa linga!

⁹Manga mapapande suwallatti yamiu sarun pansilianna. I mangitou sarun awul᷊iannu ṛingidda wuṛṛu asametanna. I mangitou maddiri manengkamma tatantiro-U; orassa indi, asingkatta apa apan ta'e pia si mangitou?

¹⁰Ana waugu udde i Ya'u sarun mangonggollu wailla su manga mawun leta'a waine, wuṛṛu awingngi mangitou su taumata waine. I mangitou sarangkanambone, wahewalla addio'a, maddea'a auntungnganna ringannu lal᷊anne mammahia. Ewe'e lai manga nabi wuṛṛu imam mangngawusu taumata.

¹¹Manga lessan uma-U su sunna mangitou tumba'u lessa addio'a. ‘Eh, tawe apa-apane,’ unni mangitou, ‘Sarangkanambone mapia wuṛṛu mal᷊angnganna.’ Wutte'e mangke tawe.

¹²Ei uma-U, ṛinone i yamiu masili ana waugu buatte na'la'a sarangkanambone apan dal᷊eo udde! Arawe wambalang kamiu maappalla wuṛṛu tawe masili. Ana waugu udde i yamiu sarun manawo ere taumata waine apan nanawote; nasuete hattone napawe i Ya'u makkuumanni yamiu.

¹³Mappulu atonna i Ya'u mangammullu uma-U ere taumata mangammullu hessin letangnge. Arawe, uma-U ere punnu anggore wuṛṛu punnu alu ara apan tawe mabbua, ewe'e lai manga rongngane tinumolangke. Ana waugu udde i Ya'u buatte namalan taumata raho rumanta wuṛṛu mangagassa wanuan mangitou. I Ya'u, MAWU, buatte nabbisara.”

¹⁴“Anio i ite mangke mal᷊anna-l᷊annabba?” unnu umattu Ruata. “Wette i ite suaddio'a inaite massal᷊iu watukku manga soa apan pia tanda batune wala'e i ite mate poiaroddi. MAWU Ruatang kite buatte nanantunna manungku i ite ṛinone mate. I tou buatte nangonggolla si ite racunna iapa'inumma ana waugu i ite marosa si Tou.

¹⁵Tawe gunane i ite mangngantimma paddarame wuṛṛu tempon pangangapia, ana waugu pia tumba'u araṛṛagissa.

¹⁶Seetta poite su soan Dan; tingikku awal᷊o mangitou niaringiṛṛante wuṛṛu ahewallu wanua nabbal᷊i matta'utta. Seetta nirumanta tadea'u makkimunsa'a ahewallu wanuang kite, see lai manga soang kite wuṛṛu anambon tumanangne.”

¹⁷“Pa'inunute!” wisara MAWU. “Orassa indi Ya'u mandolokku manga atoanna su pattangnganni yamiu iapai'i si yamiu, atoanna mawisa apan tawe awotongannu daroa.”

¹⁸Naungku na'iṛṛitta wuṛṛu maṛṛagge, asasusa'u tawe aundumanna.

¹⁹Paddaringikka! Su ahewallu wanua pia sanseongnga aintul᷊i lal᷊uain balahangku apan ma'iwal᷊o, “MAWU tate lai su Sion? Suapate ratune orassa indi?” Sasimbakku MAWU, ratu mangitou, “Anio i'o massubba manga monganna apan mangke tawe gunane? Anio i'o mannaddu'a naung-Ku? ringannu massubba manga paal᷊uanna?”

²⁰Umattu Israel ma'ialal᷊ore, “Tempo mangitingnga wuṛṛu tempon paddissa indi nal᷊iudde, arawe i ite taambe lai nasal᷊amatta.”

²¹Naungku naṛṛimunsa'a ana waugu walahangngu maradda'a mawakkatta; i ya'u lullal᷊o wuṛṛu u'ambul᷊isadda.

²²Apate apan naahal᷊ahe na'oman sara walahangku naddatingngu orassa indi taambe lai napia? Apa su ahewallu Gilead tawe doktere ara'e undamma?