Read Talaud LAL᷊ALLU 4 Bible Online

LAL᷊ALLU 4 - Talaud bible

LAL᷊ALLU 4

¹Wul᷊awanna apan lullendappa naola'e mawol᷊a manga watun Wal᷊en Duata uasal᷊iawukka su lal᷊anna.

²Dorone manga saṛṛen tumuwo su Soa Sion ere wul᷊awanna apan maarega, arawe orassa indi naola'e ere wensadda wuassu leta'a.

³Sumbal᷊i inangngu serigala mammasusu anangne, arawe umaku tumaniten maṛṛagissa ere manu'a unta su wadda'a.

⁴Manga ana'a maraddio'a tawe iapasusu, na'oman sara nate namarouanna. Al᷊aṛṛana'a maddorongnga anna, arawe taweddu mangonggolla.

⁵I mangitou apan ninumaramma mabbiakku anna mangkatemangnga, wuṛṛu mabbiakka sulal᷊ummu asasuungnga, orassa indi u'omangnga maddea'a anna su ombon sapadda, wuṛṛu nateten lunussa su manga lal᷊anna.

⁶Uma'u buatte niṛṛuumanna mabbakkatanna wuassu tumana'u Sodom apan tumba'u sulal᷊ummu sangkaṛṛondapa naṛṛimunsa'u liman Duata ringannu tawe inolaannu taumata.

⁷Dorone manga piaṛṛa'i yami waresi ere sangeranna apan mawira waresi. I mangitou uatagekka wuṛṛu matohassa, waddangnga mapia tawe maradda'a.

⁸Arawe orassa indi hatin mangitou ma'itumanna wuassu parumma uatal᷊allada su manga lal᷊anna taweddu maaillal᷊a si mangitou. Pisin mangitou naal᷊umpissa su manga duṛṛi, ere alu apan naaigga.

⁹I mangitou nasansara wuṛṛu nate u'onggamma, ana waugu atonna-tonna tawe anna; iapa nate su papangaloanna, ma'untunganna wuassu nate namal᷊unusanna.

¹⁰Tumaniten bahewalla asasilaka udde apan naṛṛia'a su uma'u na'oman sara manga inangnga apan masaṛṛionto'a nantunnu anangnge su urinna ipalloṛṛo tianna.

¹¹MAWU napasabbangngu asasa'u-Ne wuṛṛu nanoṛṛobba Soa Sion na'oman sara naddatakku leta'a.

¹²Su wallattu manga ratu wuṛṛu tumana'u runia tawe saran sangkatou apan mangngimanna manungku manga ngaran soa Yerusalem wotongnge asuttannu seetta.

¹³Arawe olangnge udde nariaddite, ana waugu rosan manga imam wuṛṛu nabi. I mangitou buatte napatuṛṛon daṛṛa, wuassu taumata apan tawe sal᷊ane.

¹⁴Naal᷊ihidda taumata wuta mammal᷊intaddu manga lal᷊anna etearoddi lai manga piaṛṛa'u soa Yerusalem. Laubbi mangitou nallal᷊uhurannu daṛṛa na'oman sara taweddu mapulu mangeṛṛetta si mangitou.

¹⁵Taumata mabbisara, “Pangingkatte wua isindi! I yamiu nallal᷊uhuranna, arie pangaggassa si yami!” Ne i mangitou inaite wuṛṛu mammal᷊intaddu manga walahanna, arawe tawe niwala matana'a wuassi sai-sai lai.

¹⁶MAWU tate lai mannaungnga uman-Ne; i Tou sassane apan nanal᷊iawukki mangitou wuṛṛu na'ola'a manga imam tate lai iaregga; manga piaṛṛangnge tateddu umakkanna.

¹⁷Matan kami naasilote, ual᷊aṛṛaddo sumbala apan tawe rumanta. I yami uaantimma aontollu sambau walahanna, apan ṛinone tawe mapangonggollu manga apa.

¹⁸I yami tawe maasabbangnga watukku lal᷊anna, sumabbangnga sidutu tataṛṛasooannu seetta. Panginsueannu wiakki yami maranite, ana waugu manga allon kami natipusse.

¹⁹Mangangenggenni yami tumaniten mal᷊ihakka mallihaṛṛanna wuassu manu'a rajawali. I mangitou mangngenggenna si yami su wowone, wuṛṛu nangampangnga si yami su wadda'u anne.

²⁰I mangitou nanametta ratu nipilen MAWU, taumata apan iaasakki yami apan mangngonggollu wiakka wuṛṛu mallal᷊indumma wuassu seetta.

²¹Ei walahannu Edom wuṛṛu Us, ore lallagete, lalluasse, suapawe ta'e wotongne! Asasilaka sarun rumanta lai ringannu wuṛṛu ana waugu wu'anna i'o nanantol᷊e watangannu.

²²Sion buatte nangamattu ṛuumanne su manga rosa apan niolangne; orassa indi i yami tate iwalan MAWU wuṛṛu tate iapidda apia sulal᷊ummu pamuanganna. Arawe i'o, ei Edom, sarun iṛṛuumannu MAWU. Manga rosanu sarun iapal᷊iatta'a.