Read Talaud LAL᷊ALLU 5 Bible Online

LAL᷊ALLU 5 - Talaud bible

LAL᷊ALLU 5

¹Naungete, oh MAWU, apan apan nariaddi si yami. Tannoite i yami, wuṛṛu ellehete al᷊al᷊eon kami.

²Pussa'an kami nanawote su liman taumata waine, manga wal᷊en kami niatanaannu taumata lo'a.

³Iamangngi yami buatte nipaten seetta; orassa indi inangngi yami inawal᷊uabba wuṛṛu i yami asisi.

⁴Ua'e a'inumanna wuṛṛu alu papputunganna ṛinone wallianni yami.

⁵Naal᷊ihidda winatangnga, i yami niwata'a mammanara mawakkatta, i yami nal᷊otakke, arawe tawe nionggol᷊annu tempo mangillol᷊o.

⁶I yami inaite massaṛṛi su Mesir, i yami maddorongnga anna su Asyur.

⁷Al᷊amonan kami na'ola'a rosa, orassa indi i mangitou tate su runia; arawe i yami ṛinone matataṛṛangnga, ana waugu manga rosan mangitou.

⁸I yami paparentannu manga taumata apan tawe nilumebbe wuassu allangnga; taweddu mataṛṛino mamallossi yami wuassi mangitou.

⁹Su liuddu soa, mamamate pasi amatta; niawan kami paatehamma sutempo maddea'a anna.

¹⁰I yami uatataṛṛangu al᷊al᷊unussa, na'oman sara pisi ere waṛṛa su sunggilla.

¹¹Manga wawine su Sion niṛṛampassa, manga maṛṛuala nil᷊al᷊eo su manga ampungngu Yehuda.

¹²Manga piaṛṛa'i yami nisametta wuṛṛu nihantonga, manga matatimmadi yami tate lai addatanna.

¹³Manga umbasanni yami niwata'a mammanara su panggahilinganna, al᷊aṛṛana'a esakka niumpisanannu alu papasannanna na'oman sara napinsanna.

¹⁴Matatimmadde tate lai mammulla su ngaran soa musikka tate lai aringiṛṛanna suwallattu taumata saṛṛen tumuwo.

¹⁵I yami niawul᷊ianten lal᷊umanna'a; manga sal᷊aingnga nawal᷊ute lal᷊al᷊o.

¹⁶Al᷊al᷊uassi yami nasuete, i yami nasilaka ana waugu marosa.

¹⁷Wowon Sion nallannabba wuṛṛu nitantangnga; poiaroddi asun ahuranganna pasi lallele. Ana waugu udde naungngi yami nasusa, i yami lulluai na'oman sara aellegi yami mal᷊abbukke.

¹⁹Arawe I'o, oh MAWU, sidutu uataṛṛino, I'o mammarenta saran mal᷊annu-l᷊annu.

²⁰Anio I'o nanantangngi yami aroddi al᷊annune? I'o naabul᷊iten kami su al᷊o'engngu tempo?

²¹Oh MAWU, apira'e i yami mabbelengnga ringan-Nu; i yami sarun mabbelengnga ringan-Nu! Sul᷊ea'e lal᷊umanna'i yami ere dorone.

²²Arawe i yami buatte niramme-Nu atonna-tonna? Tawe pattaal᷊anne asasa'u-Nu si yami?